1 SAMUELI 28 - Biblia Ilagho Jiboie Kwa Wandu Wose

¹ Matuku agho, Wafilisti wikakwanya majeshi ghawo, wipate kulwa na Waisraeli. Akishi ukamzera Daudi, “Kumanye oho na wandu wako dighendanya wudenyi.”

² Daudi ukamzera Akishi, “Ni nicha. Kuchawona sa iji ini mdumiki wako nichaabonya.” Akishi ukamzera Daudi, “Ni nicha, nanimoni nichakubonya kukaie mlindiri wapo wa matuku ghose.”

Sauli kulola njama kwa walaghui

³ Samueli orekoghe wameria kufwa, na Waisraeli wose werekoghe wamlilia na kumrika aho Rama, mzinyi kwake koni. Sauli orekoghe wawiinja walaghui wose na wasawi isangenyi.

⁴ Wafilisti wikakwanyika na kubonya kambi aja Shunemu. Sauli nao ukawikwanya Waisraeli wose na kubonya kambi aja Gilboa.

⁵ Sauli uendawona majeshi gha Wafilisti, ukaobua na ngolo yake ikangilwa ni kiture na kusughusika nandighi.

⁶ Hata iji wakotia njama kwa Mlungu, nderepatireghe matumbulio kwa ndodo hata kwa Urimu hata kwa chia ya walodi.

⁷ Nao Sauli ukawizera wabaa wake, “Nilolienyi muka ungi ulaghuagha, nipate kukotia malagho kwake.” Wabaa wake wikamzera, “Ola mlaghui umu oko Endori.”

⁸ Sauli ukakughalua, ukarwa marwao mazima. Ukaghendanya na wandu wawi, wikacha kwa uja muka nakio. Nao Sauli ukamzera, “Nilaghuye kwa kutumia maroho, nao kuniwangie mundu uo ose nichaamkunda kwa irina jake.”

⁹ Uja muka ukamzera, “Kwa loli kwaichi to seji Sauli ubonyere; seji uinjire walaghui na wasawi wose na kuwifunya isangenyi. Kwaki oho kubonyeragha irangi japo mdegho hata kuniredie kifwa?”

¹⁰ Ela Sauli ukam'bonyera ighemi kwa irina ja BWANA, “Naghema kwa BWANA uko moyo, ndekuchapatwa ni ilagho jingi.”

¹¹ Uja muka ukamkotia, “Kwakunde nikuwangie ani?” Ukaghamba, “Niwangie Samueli.”

¹² Uja muka uendammbona Samueli, ukakema na lwaka lubaa, ukamzera Sauli, “Kwaki kwanikalia huwu? Oho ko Sauli!”

¹³ Mzuri ukamzera, “Kusakeobua; kwawuyawona kii?” Uja muka ukamzera Sauli, “Naawuyawona mlungu ukijoka kufuma ndoenyi.”

¹⁴ Nao Sauli ukamkotia, “Wafwane wada?” Uja muka ukaghamba, “Ni mghosi wawuyajoka, nao waarwa ijoho.” Nao Sauli ukamanya kukaia ni Samueli; ukaghoghoma na kudunga wushu ghwake andonyi kwa ishima.

¹⁵ Nao Samueli ukamzera Sauli, “Kwaki kwanisumbua na kuniwanga?” Sauli ukatumbulia, “Nakaia na wasi m'baa, kwa kukaia Wafilisti wiabonya wuda na ini, na Mlungu wanisigha ndewuenitumbulia sena kwa walodi, angu kwa ndodo, niko nakuwanga kunighorie agho ghinifwanagha kubonya.”

¹⁶ Samueli ukamzera, “Kwaki kunikotiagha ini ikakaia Mlungu moni wakusigha na kuwuya m'maiza wako?

¹⁷ BWANA wakubonyera sa iji oreghorieghe ukinitumia; kwa kukaia BWANA wakusoka wuzuri na kughuneka mmbenyu, uo Daudi.

¹⁸ Angu ndekoremsikireghe BWANA, kughukatishe momu ghwake ghowitotesha Waamaleki, niko nao moni wabonya ilagho iji kwako idime.

¹⁹ Aighu ya agho, BWANA uchawingira Waisraeli chiaimweri na oho, mikonunyi kwa Wafilisti, na kesho oho, na wana wako mchakaia andwamweri nani; na wokoni BWANA uchabonya majeshi gha Israeli wisimo ni Wafilisti.”

²⁰ Ahoeni Sauli ukaghwa mzamba andonyi, wachulwa ni wowa kwa wundu ghwa madedo gha Samueli; hata nderesigharikieghe na dundighi dungi andenyi kwake, kwa kukaia nderejieghe kindo chingi dime dii na kio chee.

²¹ Uja muka uendawona angu Sauli wachulwa ni wowa nandighi, ukamchea na kumzera, “Ola ini mdumiki wako nakusikira hata ngawika irangi japo ndengonyi na kukubonyera sa iji kukundeghe.

²² Idana nakulomba kunisikire ini mdumiki wako, nikuboisire mkate kuje kupate ndighi, ima kuwoneghenda chia yako.”

²³ Sauli ukalegha ukighamba, “Sijagha kungi.” Ela wabaa wake chiaimweri na uja muka wikamshingira uje, hata ukadima wasikira malagho ghawo. Niko ukawuka kufuma andonyi, ukasea kidombo wulinyi.

²⁴ Uja muka orekoghe na ngache ibandie oreifughieghe nyumbenyi; ukaibwagha shwa na kuboisa mufu, ukaocha mkate ghusewadie chachu,

²⁵ ukamsoghoria Sauli na wabaa wake wikaja. Nao wikawuka nakio wikaghenda chia yawo.