1 SAMUELI 22 - Biblia Ilagho Jiboie Kwa Wandu Wose

Kubwaghwa kwa Wakohani

¹ Daudi ukafuma ghuja muzi ghwa Gathi ukaghenda na kungia mbangenyi iko Adulamu. Waruna na wose wa kichuku chake wiendasikira huwo, wikaghenda na kukukwanya nao.

² Kula mundu orekoghe na wasi, na uo orekoghe na sile, hata awo wiserekatoghe; wose wikamghendia, na kukukwanya nao, sa wandu maghana ana; nao moni ukakaia kilongozi wawo.

³ Daudi ukafuma aho, ukaghenda Mispa isanga ja Moabu; ukamzera mzuri wa Moabu, “Tafadhali nirumirie aba na mao wikaie kwako, hata nimanye agho Mlungu uchaanibonyera.”

⁴ Nao ukawisigha wavi wake kwa mzuri wa Moabu, nawo wikakaia aho matuku ghose Daudi orekoghe ukikuvisa.

⁵ Mlodi Gadi ukacha na kumzera Daudi, “Kusesindekuvisa aha, ghenda cha isanga ja Juda.” Niko Daudi ukafuma aho ukaghenda na kungia msidu ghwa Herethi.

⁶ Nao Sauli ukasikira kukaia Daudi wawonekie ukwanye na wandu wake. Sauli orekoghe kidombo aisi ya mudi ghumu ghwa kireti ghuwangwagha tamariski aja Gibea a mghondinyi. Orekoghe wawadia ifumu jake, na wadumiki wake wiko kimusi wammaria chia rose.

⁷ Sauli ukawizera awo wabaa wake, awo werekoghe kimusi wikimmaria, “Sikirenyi idana inyo Wabenjamini, huwo uo mwana wa Jese uchamneka kula umu onyu ndoe na mbuwa ra mizabibu; ucham'bonya mkaie wabaa wa maelfu na wabaa wa maghana,

⁸ hata ikaie inyo mmbose kubonya sheshe aighu yapo? Mwana wapo uduabonya mapatano na mwana wa Jese, mndungi ndecheenighoria; ndekuwadie ungi onyu wawuyaniwonia wughoma, hata unighorie kukaia mwana wapo wademua mdumiki wapo unileghe na kunilaliria sa iji iko idime.”

⁹ Niko Doegi uja Muedomu orekwanyeghe na wadumiki wa Sauli ukatumbulia, “Neremmbonieghe mwana wa Jese wacha kwa Ahimeleki mwana wa Ahitubu aja Nobu.

¹⁰ Ahimeleki ukakotia njama ya BWANA kwa wundu ghwake, ukamneka vindo na luja lufu lwa Goliathi Mfilisti.”

¹¹ Niko Mzuri Sauli ukaduma wandu mkohani Ahimeleki mwana wa Ahitubu uwango chiaimweri na wandu wose wa kinyumba cha ndee; nawo weni ni wakohani werekoghe Nobu. Na awo wose wikacha kwa mzuri.

¹² Sauli ukamzera Ahimeleki, “Sikira idana oho mwana wa Ahitubu.” Ahimeleki ukatumbulia, “Neko aeni bwana wapo.”

¹³ Nao Sauli ukamkotia, “Kwaki kopatanagha na mwana wa Jese kubonya sheshe, hata kukamneka vindo na lufu, sena kwalombie njama kwa BWANA kwa wundu ghwake, na huwu waawuyanilaliria sa iji iko idime?”

¹⁴ Ahimeleki ukatumbulia mzuri, “Nechi Daudi nuo urumirikie aghadi ya wabaa wako, sena ni mghosi wako na m'baa wa masikari ghekulindia, sena unekelo ishima nyumbenyi kwako.

¹⁵ Welee, idime niko jachakaia indo ja imbiri kulomba njama ya Mlungu kwa wundu ghwake? Ii hata, mzuri kuseniwikirie malagho ini mdumiki wako, hata wadumiki wako wa kinyumba cha aba; kwa kukaia ini siichi ilagho jingi ibaa angu itini ja agho malagho kwaghora.”

¹⁶ Mzuri ukaghamba, “Loli cheni kufwa chiaimweri na nyumba ya ndeyo Ahimeleki.”

¹⁷ Mzuri ukamzera umu wa walindiri wake, “Bwagha wakohani wose wa BWANA; kwa kukaia wawadane na Daudi; weremanyireghe wakimbia, wikalegha kunighoria.” Ela wadumiki wa mzuri wikalemwa ni kuwusira mikonu wibwaghe wakohani wa BWANA.

¹⁸ Nao mzuri ukamzera Doegi, “Bwagha awo wakohani.” Doegi Muedomu ukawibwagha awo wakohani. Ituku ijo ukabwagha wandu mirongo wunyanya na wasanu, awo wirwagha naivera ra kitani.

¹⁹ Ukabwagha wandu wose wa muzi ghwa Nobu kwa lufu, ugho ghorekailwagha ni wakohani; wandu wose wa womi na wa waka, wana watini na awo wiongagha, ng'ombe na weke punda na ng'ondi; vikabwaghwa vose.

²⁰ Ela mwana umu wa Ahimeleki uwangwagha Abiathari, wawae Ahitubu, ukafufunuka; ukakimbia na kumnugha Daudi.

²¹ Abiathari ukamghoria Daudi kukaia Sauli wawibwagha wakohani wa BWANA.

²² Daudi ukamzera Abiathari, “Neremanyireghe to, iji neremmbonieghe Doegi Muedomu aja, kukaia, uchamghoria Sauli malagho agho. Ni ini nashekeria kifwa cha awo wandu wose wa nyumba ya ndeyo.

²³ Kaianya nani kusakeobua; kwa kukaia uo wawuyalola unibwaghe, nuo moni wawuyakulola; kukekanya nani, kuchakaia banana.”