1 SAMUELI 18 - Biblia Ilagho Jiboie Kwa Wandu Wose

Daudi na Jonathani

¹ Nyuma ya Daudi kudedanya na Sauli, ngolo ya Jonathani ikawadana na ya Daudi, nao ukamkunda seji ukukunde moni.

² Kufuma ijo ituku, Sauli ukamdwa Daudi cha kwake, hata nderemsighieghe uwuye nyumbenyi kwa ndee anduangi.

³ Nao Jonathani ukabonya ilaghano na Daudi, kwa kukaia oremkundieghe seji ukukunde moni.

⁴ Jonathani ukafunya ijoho jake na kumneka Daudi, chiaimweri na maswagha ghake, hata lufu lwake na ndana na zaka yake.

⁵ Daudi ukabonya nicha kula andu oredumiloghe ni Sauli; kwa huwo Sauli ukam'bonya ukaie m'baa aighu ya wandu welwa wuda. Ilagho ijo jikakaia icha mesonyi kwa wandu wose, na hata kwa wadumiki wa Sauli.

Sauli kuwadwa ni iriso aighu ya Daudi

⁶ Nao iji masikari gherekoghe ghikighala, nyuma ya Daudi kum'bwagha Goliathi, waka wose wa Israeli wikafuma kummara Mzuri Sauli, wikibora na kuvina kwa mayanga, na kinubi kwa kuboilwa.

⁷ Awo waka wikakaia wikibora, wikatumbuliana wikiboilwa, “Sauli wabwagha maelfu ghake, na Daudi wabwagha maelfu ikumi ghake.”

⁸ Sauli ukazamilwa na kuwawa nandighi kwa wundu ghwa agho madedo ghereborwagha, nao ukaghamba, “Kwa Daudi wiabora na kumneka maelfu ikumi na ini maelfu tu! Da niki chasigharika sena iseeka ni kuwusa ugho wuzuri?”

⁹ Sauli ukazoya kummbonia Daudi iriso kufuma ituku jija.

¹⁰ Nakesho yaro, ija roho mbiwi idumilo ni Mlungu ikamchea Sauli, ukakaia ukideda kisha kisha a nyumbenyi kwake ingelo Daudi orekoghe ukikaba kinubi sa matuku mazima ghiidie, na Sauli orekoghe wawadia ifumu jake mkonunyi.

¹¹ Nao Sauli ukajikumba ifumu jake ukighesha, “Nichamkwanya Daudi na wurigha.” Ela Daudi ukajiepa mando awi.

¹² Sauli ukamuobua Daudi, kwa kukaia BWANA orekoghe andwamweri na Daudi na kumsigha uo.

¹³ Kwa huwo Sauli ukamfunya kwake, na kummbika ukaie m'baa aighu ya majeshi gha wandu, elfu imweri; Daudi ukakaia ukiwilongoza wandu;

¹⁴ ukabonya nicha kwa kula ilagho orekoghe ukijibonya; kwa kukaia BWANA orekoghe andwamweri nao.

¹⁵ Sauli ukachuria kumuobua Daudi angu orewonieghe seji Daudi wawuyabonya nicha.

¹⁶ Ela wandu wa Israeli na Juda wikamkunda Daudi, angu orewilongozagha nicha.

Daudi kulowua mwai wa Sauli

¹⁷ Niko Sauli ukamzera Daudi, “Mwai wapo m'baa Merabu hoyu; nichakuneka kumlowuo iji kwakaia ing'oni na kuniluya wuda ghwa BWANA.” Kwa kukaia Sauli oregheshereghe, “Isekaie wei ni ini nam'bwagha, ela ubwagho ni Wafilisti.”

¹⁸ Nao Daudi ukamzera Sauli, “Ini na kichuku chapo deko kii andenyi ya Israeli hata niwuye mghosi wake mzuri?”

¹⁹ Ela ngelo ya Merabu kulowolwa ivika, ukanekwa Adrieli; M'meholathi wulalo ghonekwa Daudi.

²⁰ Nao Mikali mwai wa Sauli ukamkunda Daudi. Sauli uendaghorelwa, ukaboilwa.

²¹ Sauli ukaghesha, “Ni nicha ulowuo mwai wapo, upate kuwuya mdegho kwake, na Wafilisti wipate chia em'bwagha.” Kwa huwo Sauli ukamzera Daudi indo ja kawi, “Idana kuchawuya mghosi wapo.”

²² Nao Sauli ukawilaghira wadumiki wake ukighamba, “Ghendenyi mghore na Daudi kivisonyi mumzere kukaie waawuyaniboia, na wadumiki wapo wose weemkunda; idana ni nicha kuwuye mghosi wake.”

²³ Wadumiki wa Sauli wikaghenda na kumghoria Daudi agho malagho. Daudi ukaghamba, “Welee inyo muawona ni ilagho itini ja ini kuwuya mghosi wa mzuri, nani ne mundu mkiwa usemanyikie?”

²⁴ Wadumiki wikaghenda na kumghoria mzuri seji Daudi waghamba.

²⁵ Niko Sauli ukawilaghira wimzere Daudi huwu: “Mzuri ndena haja ewikilwa kilambo chingi, ela ookunda tu mavunyu ighana gha Wafilisti, upate kulipa kisasi kwa wamaiza wake.” Sauli oregheshereghe wei Daudi uchabwaghwa ni Wafilisti.

²⁶ Wadumiki wa Sauli wikamghoria Daudi seji mzuri waghora; nao moni ukaboilwa ni agho malagho ghewuya mghosi wake mzuri. Nao imbiri ngelo iseidie,

²⁷ Daudi ukawuka na wandu wake, ukabwagha Wafilisti maghana awi; na Daudi ukamghenjera Sauli mavunyu maghana awi kamili, eri upate kuwuya mghosi wake mzuri. Niko Sauli ukamfunya mwai wake Mikali ulowolo ni Daudi.

²⁸ Ela iji Sauli wawona na kumanya kukaia BWANA orekoghe chiaimweri na Daudi, na kukaia mwai wake Mikali wamkunde Daudi,

²⁹ ukachuria kumuobua Daudi; kwa huwo, Sauli ukawuya m'maiza wa Daudi matuku ghose.

³⁰ Wabaa wa Wafilisti wikacha sena kwa wuda, na sa matuku ghose, iji wamchea Daudi, Daudi ukakaia na wusimi m'baa kuchumba wabaa wose wa Sauli; na irina jake jikakaia na ishima ibaa.