1 SAMUELI 16 - Biblia Ilagho Jiboie Kwa Wandu Wose

Samueli kumshinga Daudi mavuda ukaie mzuri

¹ BWANA ukamzera Samueli, “Kumsirimikia Sauli hata lii, na oho kwawonie kukaia ini namerie kumlegha usekaie mzuri aighu ya Israeli? Idana chura lwembe lwako mavuda, kughende Bethlehemu mzinyi kwa mundu uwangwaghwa Jese; kwa kukaia namerie kumsaghua umu wa wana wake ukaie mzuri.”

² Samueli ukaghamba, “Nidima wada kughenda aho, na Sauli ukasikira ilagho ijo uchanibwagha?” BWANA ukaghamba, “Dwaa ngache kughende kughambe, ‘Naacham'bwaghia BWANA kizongona.’

³ Kumkaribishe Jese mkanye ngelo efunya kizongona, nani nichakuwonyera seji kuchaabonya; kumshinge mavuda kwa wundu ghwapo uo mundu nichaakuwonyera.”

⁴ Samueli ukabonya sa iji koni BWANA oremlaghirieghe; ukacha Bethlehemu. Wabaa wa muzi wikacha kummara wikisughusika, wikaghamba, “Kwaawuyacha kwa sere?”

⁵ Nao ukatumbulia, “Ni kwa sere; naacha kum'bwaghia BWANA kizongona. Kueleshenyi mchanye nani kizongonenyi.” Ukamuelesha Jese na kumkaribisha chiaimweri na wana wake wikanye ngelo efunya kizongona.

⁶ Wiendacha, Samueli ukammbona mwana wa Jese uwangwaghwa Eliabu, ukaririkanya, “Kwa loli msaghulwa wa BWANA hoyu imbiri kwake.”

⁷ Ela BWANA ukamzera Samueli, “Kusezighane fwana yake angu wulacha ghwake; kwa kukaia uo nameria kumlegha. BWANA ndezighanagha seji mdamu uzighanagha, kwa kukaia mdamu wadazighana cha shighadi ela BWANA wadazighana cha ngolonyi.”

⁸ Nao Jese ukammbanga mwana wake Aminadabu, ukamreda kwa Samueli. Ela Samueli ukaghamba, “Na uhu wori BWANA ndemsaghue kungi.”

⁹ Jese ukamreda Shama; Samueli ukaghamba, “Na uhu wori BWANA ndemsaghue kungi.”

¹⁰ Jese ukareda wana wake mfungade imbiri ya Samueli. Na Samueli ukamzera Jese, “Hata awa, BWANA ndewisaghue kungi.”

¹¹ Nao Samueli ukamzera Jese, “Sena wana wako wose weko aha?” Ukatumbulia, “Ii wasighwa umweri tu mtini wawo, nao waawuyalisha ng'ondi.” Samueli ukaghamba, “Mdumirienyi, kwa kukaia ndedichaahora hata wacha aha.”

¹² Niko Jese ukaduma, ukaredwa; nao orekoghe na mumbi ghuboie, ughokie, uko na meso ghifwano. Nao BWANA ukamzera Samueli, “Ola ni uo, wuka kumshinge mavuda.”

¹³ Nao Samueli ukawada lwembe lwa mavuda, ukamshinga Daudi mavuda uko aghadi ya waruna; na Roho wa BWANA ukamchea Daudi kwa ndighi kufuma ituku ijo. Niko Samueli ukawuka na kuwuya cha Rama.

Daudi kukaia wazenyi kwa Sauli

¹⁴ Nao Roho wa BWANA orekoghe wamsigha Sauli, na roho mbiwi ikadumwa ni BWANA kumsumbua.

¹⁵ Wadumiki wa Sauli wikamzera, “Isi dawona roho mbiwi idumilo ni Mlungu yaawuyakusumbua.

¹⁶ Idana dakunda bwana odu kudidume isi wadumiki wako diko imbiri kwako, dipate kumlola mundu uichi kukaba kinubi; hata iji roho iyo idumilo ni Mlungu yakakuchea, uo mundu uchakaia ukikaba kinubi, na oho kuchasikira nicha.”

¹⁷ Nao Sauli ukawiduma ukighamba, “Nilolienyi mundu uichi kukaba icho kinubi nicha, mumrede kwapo.”

¹⁸ Mndumu wa irika ukaghamba, “Ola nammbona mwana wa Jese M'bethlehemu, uichi kukaba kinubi loli loli; mundu uko ing'oni, uichi kulwa wuda, uichi kudeda kwa hikima; ni mundu ughokie, na BWANA oko andwamweri nao.”

¹⁹ Niko Sauli ukawiduma wandu kwa Jese ukighamba, “Niredie uo mwana wako Daudi ulishagha ng'ondi.”

²⁰ Nao Jese ukawada punda, ukamdukishira mkate, kiriba cha mrongo cha divei, na ndaghina; ukamduma mwana wake Daudi navo kwa Sauli.

²¹ Daudi ukaghenda kwa Sauli, ukazoya wudumiki ghwake. Sauli ukamkunda nandighi hata ukamsaghua ukaie mundu omdukia maswagha ghake.

²² Sauli ukaduma momu kwa Jese kughamba, “Msighe Daudi ubonyeghee kazi kwapo, wawuyaniboia nandighi.”

²³ Hata iji iyo roho mbiwi idumilo ni Mlungu yamchea Sauli, Daudi orekoghe ukiwada kinubi chake na kichikaba; na Sauli orekoghe ukiboilwa na kuboa, na iyo roho mbiwi kumsigha.