1 SAMUELI 13 - Biblia Ilagho Jiboie Kwa Wandu Wose

Wuda aighu ya Wafilisti

¹ Sauli orekoghe na miaka mirongo idadu ingelo orezoyagha kubonya nguma, ukawibonyera Waisraeli nguma kwa miaka mirongo ina.

² Nao Sauli ukasaghua wandu elfu idadu. Uo moni ukakaianya na wandu elfu iwi aho Mikmashi na isanga ja mighondinyi ja Betheli; na wandu elfu imweri wikakaianya na Jonathani aja Gibea ya kichuku cha Benjamini; na wandu wazima wose ukawizera wighale kula mundu cha mzinyi kwake.

³ Jonathani ukajikaba ijeshi ja Wafilisti werekoghe ngomenyi ya Geba ukawisima; na Wafilisti wikasikira. Nao Sauli ukakaba tarumbeta isangenyi kose ukighamba, “Waebrania ndewiche.”

⁴ Waisraeli wose wikaghorelwa kukaia Sauli wakabie wandu wa ngome ya Wafilisti, nawo waawuyazamilwa ni Waisraeli. Niko Waisraeli wikafuma kuwadana na Sauli aja Gilgali.

⁵ Nao Wafilisti wikakwanyika na kukuwika tayari kulwa na Waisraeli. Werekoghe na magare elfu mirongo idadu, na wajoki farasi elfu irandadu, na masikari mazima wengi sa msangagha ghwa baharinyi. Wikajoka na kubonya kambi yawo aja Mikmashi, mashariki ya Beth-aveni.

⁶ Waisraeli wiendawona kukaia wangia andenyi ya mashaka mabaa, angu werekoghe wamarwa chia rose, wikakuvisa wamu mbangenyi, na wamu mirumenyi, na maghonyi na makaburinyi na visimenyi visewadie machi.

⁷ Waisraeli wamu wikaruwuka Jordani cha isanga ja Gadi na Gileadi, ela Sauli orekoghe ukikaia Gilgali. Wandu wose wikamnugha wikisughusika.

⁸ Nao Sauli ukaweseria kwa matuku mfungade agho gherelaghiriloghe ni Samueli, ela Samueli nderechieghe shwa shwa; kwa huwo wandu wikazoya kusasarika na kumsigha Sauli.

⁹ Nao Sauli ukaghamba, “Niredienyi kizongona chekora aha, na kizongona cha mapatano.” Ukafunya kizongona chekora.

¹⁰ Uendameria kufunya icho kizongona chekora woruwu, Samueli ukabusa, na Sauli ukafuma kummara, ukamroghua.

¹¹ Samueli ukamzera, “Kwabonya wada?” Sauli ukatumbulia, “Niendawona wandu wazoya kusasarika na kunisigha, na ii chia nako oho ndekuchee andenyi ya agho matuku korelaghirieghe, sena na Wafilisti wakwanyika Mikmashi,

¹² ngaghamba, ‘Idana Wafilisti wichanichea wisee hata Gilgali nisebonyere njama na BWANA.’ Niko nawona nikufungishe ndighi nimoni, nifunye kizongona chekora.”

¹³ Nao Samueli ukamzera Sauli, “Kwabonya wukelu kwa kuleghawadia momu ghwa BWANA Mlungu wako seji orekulaghirieghe; huwu kumangu BWANA wamangisha wuzuri ghwako aighu ya Israeli kwa kala na kala.

¹⁴ Ela idana wuzuri ghwako ndeghuchaadua; BWANA wameria kulola mundu seji ngolo yake ikunde, nao wameria kumsaghua ukaie mzuri aighu ya wandu wake; kwa kukaia ndekorebonyereghe seji BWANA orekulaghireghe.”

¹⁵ Niko Samueli ukawuka na kufuma Gilgali, ukaghenda cha Gibea, isanga ja Benjamini. Na Sauli ukawitala wandu orekwanyeghe nawo ukawiwona kukaia wandu maghana arandadu.

¹⁶ Nao Sauli na mwana wake Jonathani chiaimweri na awo wandu orekwanyeghe nawo, wikakaia Geba, isanga ja Benjamini; ela Wafilisti wikabonya kambi yawo aja Mikmashi.

¹⁷ Masikari gha Wafilisti wikafuma kambinyi kwawo mafungu adadu; ifungu jimu jikaghenda cha Ofra, isanga ja Shuali;

¹⁸ ifungu jimu jikaghaluka cha Beth-horoni, na jimu jikaghaluka cha mpakenyi ghulangayagha vololo ya Zeboiimu noko cha kireti.

¹⁹ Aho Israeli ndekorekoghe na mchani vuma ungi, kwa kukaia Wafilisti ndewerekundieghe Waebrania wibonye chufu na mafumu.

²⁰ Waisraeli werekoghe wikisea kwa Wafilisti kwendakalisha kula mundu ighembe jake ja ng'ombe, maghembe, masoka, na miundu.

²¹ Ighuri jekalisha ighembe ja ng'ombe na sururu jerekoghe pesa ndinieri, na mando awi ya iro pesa kwa kukalisha masoka na shangari.

²² Kwa huwo ngelo ya wuda, mndungi wawo werekwanyeghe na Sauli na Jonathani nderekoghe na iswagha jingi ja lufu angu ifumu, ela Sauli na mwana wake Jonathani wiekeri.

²³ Wafilisti wikafuma ngomenyi kwawo kwendalindia mwanya ghwa Mikmashi.