1 SAMUELI 12 - Biblia Ilagho Jiboie Kwa Wandu Wose

Samueli kughora na wandu

¹ Niko Samueli ukawizera wandu wose wa Israeli, “Olenyi namsikira kwa maza renyu rose munilombie nibonye; nani namerie kummbika mzuri om'bonyera nguma.

² Na idana wonenyi uo mzuri uchaamlongoza, nani nakaia mghosi wa imbu, na wana wapo hawo mokwanye; na ini namlongozere kufuma wanake ghwapo hata linu.

³ Shuhudienyi idana aighu yapo imbiri ya BWANA na imbiri ya mzuri umsaghue. Ni ng'ombe yani niiwusire? Angu nawusire punda wani? Nani nimsokie kindo chingi angu kumkoronga? Nani unihongie ukanibwagha meso? Shuhudienyi aighu yapo, na ini nichammbunjira.”

⁴ Nao wikaghamba, “Ndekudisokie kilambo chingi, hata kudikoronga; hata ndekuhongelo ni mndungi anduangi.”

⁵ Nao Samueli ukawizera, “Mlungu ni shahidi, na uo mshingwa mavuda wake wori ni shahidi idime kukaia ndemmbonie ikosa jingi kwapo.” Nao wikaghamba, “BWANA ni shahidi.”

⁶ Samueli ukachuria kuwizera wandu, “Uo BWANA nuo orewisaghueghe Musa na Haruni, ukawijosa chiaimweri na weke ndeyo kufuma isanga ja Misri.

⁷ Idana kaienyi kimusi nishuhudie imbiri ya BWANA aighu ya mabonyo ghose ghemkira agho BWANA orebonyereghe kwa wundu ghonyu na kwa wundu ghwa weke ndeyo.

⁸ Ngelo Jakobo oreghendieghe Misri chiaimweri na wandu wake, Wamisri werewikorongieghe; na weke ndeyo wikamkemia BWANA, nao ukawineka Musa na Haruni, wikawifunya weke ndeyo kufuma Misri na kuwiwika iji isanga mwawuyajikaia.

⁹ Ela wikamliwa BWANA Mlungu wawo, nao ukawifunya wikabo na kusimwa ni Sisera, m'baa wa majeshi gha Jabini mzuri wa Hazori; na Wafilisti, na mzuri wa Moabu.

¹⁰ Wikamkemia BWANA wikighamba, ‘Dabonyere kaung'a angu dikusighie oho BWANA na kutasa milimu Baali na Ashtorethi, ela kudikire idana disekabo ni wamaiza wedu, nesi dichakutasa.’

¹¹ Na BWANA ukawiduma Jerubaali na Baraki, na Jefuta na Samueli wikamkira na wamaiza wenyu kwa kula chia, mkakaia banana.

¹² Hata iji mwammbona Nahashi mzuri wa Waamoni wamchea, morenizerieghe, ‘Hata! Isi deekunda mzuri odibonyera nguma,’ ingelo cheni BWANA Mlungu orekoghe mzuri onyu.

¹³ “Idana wonenyi mzuri onyu uo mumsaghue, uo moremlombieghe; nenyo zighanenyi BWANA wameria kummbika ukaie mzuri aighu yenyu.

¹⁴ Ikakaia mchamuobua BWANA na kumdumikia, na kumsikira, hata mkaie msesighe memu ya BWANA; nao ikaie inyo chiaimweri na mzuri onyu muamnugha BWANA Mlungu onyu, mchawona nicha.

¹⁵ Ela mkalegha kumsikira BWANA, na kurilegha sharia rake, niko BWANA uchaamlegha inyo chiaimweri na mzuri onyu.

¹⁶ Idana kaienyi kimusi mpate kuwona ilagho ibaa BWANA uchaajibonya imbiri konyu.

¹⁷ Welee, idime si ngelo ekuwida ngano? Nichamlomba BWANA urede chukuwa na vua, mpate kumanya na kuwona kukaia wuwiwi ghonyu ni m'baa ugho mughubonyere imbiri ya BWANA kwa kulomba mzuri.”

¹⁸ Niko Samueli ukamlomba BWANA, nao ukareda chukuwa na vua ijo ituku; wandu wikamuobua BWANA na Samueli loli loli.

¹⁹ Na awo wandu wikamzera Samueli, “Dilombie kwa BWANA Mlungu wako isi wadumiki wako disechefwa; kwa kukaia dachuria wuwiwi aighu ya kaung'a redu kwa kulomba mzuri.”

²⁰ Niko Samueli ukawizera wandu, “Msakeobua hata ngera mwabonyere ugho wuwiwi, bora tu mseghaluke mkimsigha BWANA, ela mumdumikie kwa ngolo renyu rose.

²¹ Mseghaluke mkinugha vilambo va duu visemnekagha fwaida ingi, hata visedimagha kumkira, kwa kukaia vilambo ivo vose ni wuduu.

²² Kwa kukaia BWANA ndedimagha kuwisigha wandu wake kwa wundu ghwa ijo irina jake ibaa, angu odeboilwa moni kum'bonya inyo mkaie wandu wake.

²³ Aighu ya agho, hata ini moni ndeinifwane putu kum'bonyera BWANA kaung'a esigha kumlombia inyo, ela wulalo ghwaro, nichamfundisha chia iboie na ya loli.

²⁴ Inyo mumuobuo BWANA tu, mumdumikie kwa wuloli, kwa ngolo renyu rose, mkikumbuka agho malagho mabaa BWANA um'bonyere.

²⁵ Ela mkabonya maza rizamie, BWANA uchamtotesha inyo na mzuri onyu wori.”