Жугьдариз 8 - Гирами Китаб

Ухьу бадали дерккнайи Аллагьдин заан Гъуллугъчи

¹ Учу учвуз кӀурайибдин варитӀан кӀулинуб – аьршариъ айи Вариудукьрурин тахтнан арччул терефнахъинди хъайи заан Гъуллугъчи ухьуз ахьуз.

² Думу адмийири ваъ, хъа Аллагьди дивнайи гирами йишваъ ва гьякь гирами Чадриъ гъуллугъ АпӀурайир ву.

³ Гьарсар заан гъуллугъчи гъурбнар ва багъишар хуз дупну дерккрайир ву, гьаддиз ихь заан Гъуллугъчийизра саб фу-вуш гъурбан апӀуз шлуб ади ккундийи.

⁴ Эгер Думу гьаму ражари гьаму дюнʼяйиин алийиш, Дугъкан гъуллугъчикьан духьну адархьидийи, гьаз гъапиш Къанундин бинайиин алди гъурбнар хру гъуллугъчйир ади хьидийи.

⁵ Дурари, аьршариндиз ухшар айи ва гьаддин сиринтӀан дару гирами йишвʼин гъуллугъ апӀура. Гьаз гъапиш гирами Чадур апӀайиз улихьна Мусайиз гъапнийи: «Лиг, – гъапнийи Аллагьди, – увуз дагъдиин улупубдинси, вари дюзди апӀин».

⁶ Хъа гьаму ражари Месигьдиина, жилиин гъуллугънаъ гъахьидариина аманат гъапӀу гъуллугътӀан лап артухъ Гъуллугъ аманат дапӀна, фицики мугагьназдинтӀан ужудар шартӀар айи Аллагьдинна адмийин арайиъ гъийитӀу мугагьназдинтӀан ужудар гирами Йикьрар Гьадгъулантина ву.

⁷ Эгер сифтейин Гирами Йикьрарик камивал ктайиш, кьюбпи ражари Йикьрар йитӀуб гьазкӀа дайи.

⁸ Хъа Аллагьди, инсанариз тягьна йивури, кӀура: „Узу, – кӀура Агъайи, – Израилин ва Ягьудайин хулахъди цӀийи Йикьрар йитӀру вахт багахь шула.

⁹ Думу Йикьрар Узу чпин абйирихъди, Узу дурарин хилхъан дибисну, Египетдиан адаъган гъийитӀу йикьрарстар хьидар, гьаз гъапиш Узухъди гъийитӀу Йикьрар дурари тамам дарапӀган, Узура дурарихьан гьидицунза, – кӀура Агъайи. –

¹⁰ Гьаддиз, Узу гьамус йитӀуз ккайи Йикьрар Израилин хулахъди йитӀидиза, – кӀура Агъайи, – Йиз къайдйир дурарин фагьмиъ тӀаъдиза ва дурарин юкӀварик дикӀидиза. Узу хьидиза дурариз Аллагь, хъа дурар Йиз халкьди хьиди.

¹¹ Сар-сариз аьгъювалар улупуб гъубзри хьибдар, я гъардши чан гъардшиз: «Гьаммишанур аьгъю апӀин» кӀури, аьгъювалар улупуб лазим вуди гъубзидар, гьаз гъапиш, бицӀирилан гъадабгъну, аьхюриинакьан, варидариз Узу аьгъяди хьиди.

¹² Фицики Узу дурарин чӀуруваларилан хил алдабгъидиза, я дурарин гунгьар кӀваин алаидарза“.

¹³ Дугъу гьаму Гирами Йикьрарназ „цӀийиб“ гъапну, ва гьаддиинди сабпи Йикьрар йирси хьувал улупура. Хъа йирси гъабхьиб ва лазимди имдруб жвартӀ хьибди.