Юнус 4 - Гирами Китаб

Юнусдиз РАББИЙИКАН хъял гъюб

¹ Му аьгьвалатну Юнус хъюлу урхьури дерккнайи.

² Ва дугъу, ккарагури, РАББИЙИЗ гъапну: – Я РАББИ! Узу гьеле йиз уьлкейиъ имиди, гьамци шлуб аьгъяйзуз. Гьаддиз узу Таршишдиз гъажаргънийза. Уву кӀваъ ккунивал айи, рягьимлу, хъял дебккру, язухъ апӀру Аллагь вуйивал ва Увуз мициб мусибат даккнивал аьгъяйзуз.

³ Ва гьамус, РАББИ, йиз жандиан рюгь адабгъ, гьаз гъапиш, мици гъузайиз, узуз йикӀуб ужу вуйиз.

⁴ Ва гъапну РАББИЙИ: – Хъа увуз гьаз хъял гъафунвуз?

⁵ Юнус шагьриан удучӀвну, шагьриз фу шулуш, рябкъбан бадали, ригъ гьудубчӀвру терефнаъ чаз пажсиб дапӀну, дидин сирникк деъру.

⁶ Хъа РАББИ Аллагьди саб набатат ктубчӀвуз гъитну, ва думу, Юнус хъялкканна дерднаккан азад апӀбан бадали, дугъан кӀулʼина сирин гъюруси, за гъабхьну. Му набататдиин Юнус гизаф шад гъахьну.

⁷ Хъа Аллагьди гьаци дебккнуки, хъайигъан ахсрар ккиврайиган мялхъви набататдин ччивар ккидитӀну, ва думу гъеебццну.

⁸ Ригъ гьудубчӀвиган, Аллагьди думу гьудубчӀву терефнаан гъати микӀ гьапӀну, ва ригъди Юнусдин кӀул абгуз хъюбгъну, думу гьаци инжиг гъахьнуки – чаз аьжал ккун гъапӀну ва гъапну: – Мици гъузайиз, узуз йикӀуб ужу вуйиз!

⁹ Ва Аллагьди Юнусдиз гъапну: – Хъа увуз гьадму набатат гъеебццну кӀури, хъял гъафнийвуз? Дугъу жаваб тувну: – ЙикӀузкьан!

¹⁰ Ва думуган РАББИЙИ гъапну: – Уву, яв хил ктарди, уву гъайгъу дизригди, сад йишван кудубчӀвну, хъайишван гъудубгу набататдин язухъ апӀурава.

¹¹ Хъа Узхьан арччул хил гагулихьан жара апӀуз аьгъдру варжна къад агъзуртӀан артухъ инсанар ва гизаф мал-гъара айи зурба Ниневия шагьрин язухъ дарапӀри гъузуз шулин?