Югьан 6 - Гирами Китаб

Хьуд агъзур тухъ апӀуб

¹ Гьамдихъан Иса Галилей гьюлин тмуну гъирагъдихъ хъайи Тивериад шагьрин аьтрафарихъна гъягъюру.

² Исайихъди гизаф халкьра гъюри гъахьну, гьаз гъапиш дурариз Дугъу аьзарлуйириз гъапӀу аьламатар дяркънайи.

³ Хъа Иса, дагъдиина за духьну, Чан ученикарин кьялаъ деъру.

⁴ Жугьдарин Пасхайин машквар багахь шулайи.

⁵ Исайи, улар за гъапӀиган, Чахьна хайлин халкь гъюради дябкъну, Филипдиз кӀуру: – Мурариз ипӀуз ухьу гьамкьан уьлер наънан гъадагъухьайкӀан?

⁶ Исайи му, Филип ахтармиш апӀузди гъапиб вуйи, фицики Дугъаз гьапӀруш улихьмиди аьгъяйи.

⁷ – Дурариз варидариз уьлин саб кьацӀкьан ккубкьбан бадали, уьл гъадабгъуз кьюдварж динар пулра гьудрубкӀур, – жаваб туву Филипди.

⁸ Исайин жара ученик Петрин чве Андрейи кӀуру:

⁹ – Мушваъ сар балихь хьуб мухан уьлна кьюб балугъ хьа, хъа гьамукьан халкьдиз дурарикан фу шулухъа?

¹⁰ – Дурарихьди деуз гъитай, – гъапи Исайи. Думу йишвʼин гизаф укӀ алийи ва дурар гьадушвʼин деъру. Дурарин кьадар хьуд агъзуртӀан артухъ вуйи.

¹¹ Исайи Аллагьдиз баркаллагь дупну, уьлер гьудутӀну, деънайидариз тувру. Ва балугъарра гьаци дапӀну, гьардиз чаз ккунибкьан тувру.

¹² Адмийир ацӀбалан кьяляхъ, Исайи ученикариз кӀуру: – Зяя дархьбан бадали, хъригъу кьацӀар уч апӀинай.

¹³ Дурари ипӀуз хъюгъруган, хьуб уьл вуди, гьадрарихъан хъригъу кьацӀар уч гъапӀиган, йицӀикьюб тавра шулу.

¹⁴ Исайи гъапӀу му аьламат гъябкъиган, адмийири пуз хъюгъю: – Му Кас якьинди дюнʼяйиз дуфну ккуни Гьадму Пайгъамбар ву! –

¹⁵ Адмийири Чакан гужниинди чпин паччагь апӀуз ккунди айиб аьгъяди, Иса хъана, ялгъузди гъузбан бадали, дагълариз гъягъюру.

Иса гьюлилантина гъягъюб

¹⁶ Хябяхъ шулади, Исайин ученикар гьюлихъна ктучӀвуру.

¹⁷ МучӀура шулайи, хъа Иса дурарихьна мегьел гъюри адайи. Дурар, люткейиъ эъну, гьюлин тмуну гъирагъдихъ хъайи Кафернагьумдиз рякъюъ учӀвру.

¹⁸ Гужал микӀ хъивну, гьюлиин лепйир ягъал-ягъал хьуз хъюгъру.

¹⁹ Гъирагъдихъан хьуб-йирхьуб километр манзилназ сирнав гъапӀган, дурариз гьюлин лепйириланмина люткейихьна ликри гъюрайи Иса рякъюру ва гизаф гучӀ шулу.

²⁰ – Му Узу вуза, гучӀ мапӀанай! – кӀуру Исайи.

²¹ Дурариз Думу люткейиъ итуз ккун гъабхьнийи, аммаки, фу лигурва, дурар чпи гъярайи гъирагъдихъна хъуркьнади шулу.

Адмийир Исайихьна ахмиш шула

²² Хъайигъан гьюлин тлихъан гъирагъдихъ гъузу халкьдин гьюлин гъирагъдихъ саб люткетӀан хътарди хьуб ва дидиъра ученикар эъну гъушуб, хъа Иса, кӀуруш, дидиъ эдреуб кӀваин шулу.

²³ Гьадмуган Тиверияйиан гъафи сякьюдар люткйир, Агъайи баркаллагь дупну, халкьди уьл гъипӀу йишвахьна гъюру.

²⁴ Мушваъ я Иса, я Дугъан ученикар адруб гъябкъиган, дурари люткейиъди, Иса агури, Кафернагьумдиз сирнав апӀуру.

Иса – уьмрин уьл

²⁵ Иса гьюлин тмуну гъирагъдихъ дагну, Дугъаз дурари кӀуру: – Мялим! Уву мина фила гъафунва?

²⁶ Исайи дурарин суалназ кӀуру: – Гьякьлу вуйи гьякь кӀуразачвуз: Йиз аьламатнан лишнарин учву гъавриъ а кӀури, Узу агурадарчва, хъа Узу туву уьли учву тухъ апӀбаз лигну агурачва!

²⁷ Ухди пуч шлу му дюнʼяйин хураг бадали ваъ, хъа гьаргандин уьмур тувру ва зат пуч даршлу хураг бадали чалишмиш йихьай. Гьациб уьмур учвуз Инсаниятдин Бали тувра, фицики ихь Адаш Аллагьди Инсаниятдин Бай Чан кьудратниинди, печать йивну, лишанламиш дапӀна.

²⁸ – Аллагьдиз хуш шлу ляхин апӀбан бадали, учу гьапӀну ккун? – пну, гьерху дурари.

²⁹ Исайи жаваб туву: – Магьа Аллагьдиз ккуниб: Дугъу Гьаурихъ хъугъай.

³⁰ – Уву Дугъу Гьаур вуш, учу Увухъ хъугъбан бадали, Уву учуз фициб аьламат улупидива? – гьерхру дурари. – Уву гьапӀдива?

³¹ Ич ата-бабйири ичӀи чюлиъ манна ипӀуйи. Мидкан Гирами китабариъра гьамци дибикӀна: «Дугъу дурариз ипӀуз уьл аьршариан гьапӀну».

³² Исайи жаваб туву: – Гьякьлу вуйи гьякь кӀуразачвуз: учвуз аьршариан уьл гьапӀур Муса дар. Учвуз гьякь уьл аьршариан туврайир Йиз Адаш ву.

³³ Фицики Аллагьдин уьл – аьршариан дуфну, му дюнʼяйиз уьмур бахиш апӀурайи Гьадму Кас ву.

³⁴ – Я ич аьхюр, – кӀуру дурари, – учуз гьациб уьл гьамусдихъантина гьаргандиз чава!

³⁵ Исайи дурариз кӀуру: – Узу вуза уьмур хурайи уьл. Фуж узухьна гъюруш, затра гашди гъузидар. Узухъ хъугънайир гьич затра харгидар.

³⁶ Хъа Узу учвуз улихьнасира дупнайзачвуз, учвуз Узу рякъюрачвуз кӀури, хъа учву хъугъри гъахьундарчва.

³⁷ Йиз Адашди Узʼина аманат гъапӀу гьарсар кас Узухьна гъиди ва, Узухьна гъафир, Узу гьич затра хътӀурккидарза.

³⁸ Фицики Узу аьршариан, Узуз ккуниб апӀуз ваъ, хъа Узу Гьаурин ният тамам апӀуз дуфнайир вуза.

³⁹ Хъа магьа Узу Гьаурин ният – Чав Узʼина аманат гъапӀдарикан гьич саркьан Узу дургуз гъидритуб, хъа гъияматдин йигъан дурар вари уьмрихьна кьяляхъ апӀуб.

⁴⁰ Даршуз магьа Йиз Адашдиз ккундайиб: Чан Бай рякъруриз ва Дугъахъ хъугъру гьарсар касдиз гьаргандин уьмур хьуб. Узу думу гъиямат йигъан гьаргандин уьмрихьна хътаидиза.

⁴¹ Исайи: «Узу уьл вуза, аьршариан дуфнайи», – гъапну, кӀури, жугьдарик иц кабхъру.

⁴² – Му Юсуфдин бай Иса даринхъа? – кӀуйи дурари. – Ухьуз Мугъан адашна дада аьгъдарди айинхъа? Гьаз Мугъу мици: аьршариан гъафир Вуза, кӀурахъа?

⁴³ – Иц макабхъанай, – кӀуру дурариз Исайи, –

⁴⁴ Узухьна, Узу гьау Адашди гъюз гъидритиш, сарихьанра гъюз хьибдар, хъа гъафир, Узу гъиямат йигъан учв уьмрихьна хътаидиза.

⁴⁵ Пайгъамбрарин Гирами китабарик дибикӀна: «Аллагьди дурариз варидариз улупиди». Гьарсар Адашдихъ хъпехъур ва Гьадгъухъан аьгъю гъапӀур Узухьна гъюру.

⁴⁶ Анжагъ Аллагьдихьан ГъафиризтӀан гъайри, гьеле гьич саризра Адаш гъяркъюндар.

⁴⁷ Гьякьлу вуйи гьякь кӀуразачвуз: фуж хъугъраш, гьадгъу гьаргандин уьмур гъазанмиш дапӀна.

⁴⁸ Узу уьмрин уьл вуза.

⁴⁹ Ичв ата-бабйири ичӀи чюлиъ чпиз Аллагьди гьапӀу манна ипӀури гъахьну ва имбударси дурарра гъийихну.

⁵⁰ Хъа аьршариан гъафи Уьл дициб дар: шли Думу гъипӀиш, дицир затра йикӀидар.

⁵¹ Узу вуза аьршариан гъафи чӀиви уьл. Шли думу Уьл гъипӀиш, гьадму зат ккудудубкӀрубкьан яшамиш хьиди. Узу туврайи уьл – му йиз беден вуйиз. Узу думу, дюнʼяйин уьмур бадали, тувраза.

⁵² Гьадмуган жугьдари: – Дугъхьан ухьуз ипӀуз Чан беден фици тувуз хьибди?! – кӀуйи, ва дурарин арайиъ яман гьюжат абхъру.

⁵³ Исайи дурариз жаваб тувру: – Гьякьлу вуйи гьякь кӀуразачвуз: эгер учву Инсаниятдин Балин беден дирипӀиш ва Дугъан ифи дурубхъиш, учвуз уьмур рубкьидар.

⁵⁴ Йиз беден ипӀруриз ва Йиз ифи убхъруриз гьаргандин уьмур хьибди, ва Узу дицир гъиямат йигъан уьмрихьна чӀиви апӀидиза.

⁵⁵ Йиз беден – магьа гьякьди вуйи хураг, Йиз ифи гьякьди вуйи убхъруб ву.

⁵⁶ Шли Йиз беден ипӀураш ва Йиз ифи убхъураш, гьадму Узуъ яшамиш хьиди, хъа Узу дугъаъ яшамиш хьидиза.

⁵⁷ Узу гьау чӀиви Адашдиантина Узу фици яшамиш шулаш, гьаци Йиз беден ипӀурайидарра Узʼантина яшамиш хьиди.

⁵⁸ Аьршариан гъафи Уьл магьа гьамциб ву. Хъа думу ичӀи чюлиъ ичв ата-бабйири гъипӀу завариан гъафи маннасиб дар – хъасин, гьар чан аьжалниинди, дурарра гъийихнийи. Хъа шли аьршариан вуйи гьаму Уьл ипӀураш, гьадгъу зат ккудудубкӀру уьмур хъапӀди.

⁵⁹ Гьамци аьгъювалар улупуйи Исайи Кафернагьумдин жугьдарин мистаъ.

Гьаргандин уьмрикан улупуб

⁶⁰ Дугъан ученикарикан гизафдари, му гафар гъеерхьиган, кӀури гъахьну: – Мурар фу аьжайиб гафар ву? Мурар шлихьан аннамиш апӀуз шул!

⁶¹ Хъа Исайи, Чан ученикар нарази вуйиб аьгъяди, дурариз гъапи: – Йиз гафари учвук гучӀ капӀрайин?

⁶² Хъа учву, Инсаниятдин Бай Учв наънан гъафнуш, гьадина за шули рякъруган гьапӀдичва?

⁶³ Беден фукӀа дар, анжагъ Рюгь ву уьмур хурайир. Узу учвуз кӀурайи гафариъ уьмрин Рюгь а.

⁶⁴ Аммаки ичв арайиъ хътругърударра а. ИкибаштӀан, Исайиз гьеле дюнʼя ккебгъайиз аьгъяйи: фужар Чахъ хъугъдайиш ва Учв шли масу тувуйиш.

⁶⁵ Дугъу давам апӀуру: – Гьаддиз учвуз гъапнийза Узу: анжагъ шлиз Адашди улупнаш, гьадму Узухьна гъиди.

⁶⁶ Гьаддихъан Исайин ученикарикан гизафдар Дугъхъан хътакнийи ва Дугъахъди шули гъахьундайи.

⁶⁷ Гьадмуган Исайи Чан йицӀикьюрид ученикарихьан гьерхру: – Белки учвузра Узхъан хътакуз ккунди ашулчвуз?

⁶⁸ – Агъа, – жаваб туву Симон Петри, – учу шлихьна гъягъидихъа? Зат ккудудубкӀру уьмур тувру гафар Увухь хьавухь.

⁶⁹ Гьамус учу хъугърача ва аьгъячуз, Уву Аллагьдин Гирамир вуйиб.

⁷⁰ – Узу дайкӀана учву йицӀикьюридра ктагъур? – гъапи дугъаз жаваб вуди Исайи. – Хъа учвкан сар иблис ву.

⁷¹ Исайи му Искариотдиан вуйи Симондин бай Ягьудайикан кӀурайиб вуйи. Дугъу, учв йицӀикьюрикан сар вуйири, хъасин Иса масу тувнийи.