Югьан 21 - Гирами Китаб

Иса ургур ученикдиз ачмиш хьуб

¹ Хъасин Тивериад гьюлин гъирагъдихъ Иса Чан ученикариз хъана ачмиш шулу. Думу магьа гьамци гъабшиб ву.

² Симон Петр, КӀвятӀях кӀуру лакӀам али Фома, Галилей уьлкейиъ айи Кана шагьриан вуйи Нафанаил, Зеведейин кьюрид баяр ва Исайин кьюр жара ученикар – вари сатӀиди уч шулу.

³ – Узу балугъар дисуз гъяраза, – кӀуру дурариз Симон Петри. – Учура увухъди гъюрча, – кӀуру имбударира. Дурар душну люткейиъ эъру, аммаки думу йишван дурари фукӀара гъибисундайи.

⁴ Хъа аку хьуз хъюбгъиган, гъирагъдихъ Иса дугъужвнайи. Саки му Иса вуйибдин ученикар гъавриъ ахънадайи.

⁵ – Дустар, лисуз фукӀа-мукӀа гъибисунчва? – гьерхру дурарихьан Исайи. – Ваъ, – жаваб туву дурари.

⁶ – Чул люткейин арччулну гъвалхъанди ккипай, ва дисидичва, – кӀуру Дугъу. Дурари чул ккипру – гизаф балугъар ади хьпаз, дурарихьан чул ккадабгъуз шуладайи.

⁷ – Му Агъа ву! – кӀуру Петриз Исайин юкӀв али сар ученикди. Му Агъа ву пну гъеебхьубси, Петр чан гъяцӀли жандиин али плащдин канчӀар зина ккаъну, йитӀну, штузди урсру.

⁸ Хъа тмуну ученикар, балугъари абцӀнайи чулра хъчӀюбхюри, люткейиъди гъирагъдихъна гъюру. Гъирагъдихъна ярхла дайи – варж метркьан.

⁹ Гъирагъдихъна ктучӀвиган, дурариз кархьнайи аржлар рякъюру, дурариин балугъ илипнайи ва гъвалахъ уьлра хъайи.

¹⁰ – Учву гъидистарикан сякьюбсана балугъ акъинай, – кӀуру дурариз Исайи.

¹¹ Симон Петри, люткейихьна душну, чӀатху балугъарихьди абцӀнайи чул хъчӀюбхюру. Дидиъ варжна хьуцӀурна шубуб балугъ айи. Ва гьамкьан гизаф балугъар ади гъахьнушра, чул гъячӀябгъюндайи.

¹² – Деай гьириндин уьл ипӀуз, – кӀуру дурариз Исайи. Ученикарикан сарира Дугъхьан, Думу фуж вуш, гьерхундайи. Думу Агъа вуйиб дурар дишла гъавриъ ахънийи.

¹³ Исайи дуфну, гъадабгъну уьл, дурариз пай апӀуру, ва балугъра пай апӀуру.

¹⁴ Гьаму Иса, дукӀну чӀиви гъахьихъанмина, Чан ученикариз ачмиш шули шубубпи раж вуйи.

Исайин Петрихъди улхуб

¹⁵ Дурари гьирин уьл ипӀбалан кьяляхъ, Исайи Симон Петриз кӀуру: – Я Югьаннайин бай Симон, увуз Узу гьамраризтӀан гизаф ккундунуз? – Ав, Агъа, узуз Уву ккуниб Увузра аьгъявуз, – жаваб туву Петри. – Йиз ччилар уьрх, – кӀуру Исайи.

¹⁶ Кьюбпи ражарира Исайи Петрихьан гьерхру: – Я Югьаннайин бай Симон, увуз Узу ккундунуз? – Ав, Агъа, узуз Уву ккуниб Увузра аьгъявуз, – жаваб туву Петри. – Йиз марччарин гъайгъу зиг.

¹⁷ Ва шубубпи ражарира Исайи дугъаз кӀуру: – Я Югьаннайин бай Симон, увуз Узу ккундунуз? Дугъу, Учв ккундунуз кӀури шубубпи ражнура гьерхиган, Петриз иццру апӀуру. – Я Агъа, Увуз вари аьгъявуз, – кӀуру дугъу Исайиз. – Узуз Уву ккуниб Увуз аьгъявуз. – Йиз марччар уьрх, – кӀуру Исайи. –

¹⁸ Гьякьлу вуйи гьякь кӀуразавуз: уву жигьилди айиган, яв чӀул уву идибтӀну, увуз ккунишваз гъягъюйва. Хъа кьаби гъашиган, хилар гьатӀарццидива, жарари яв чӀул идибтӀиди ва увуз даккнишваз хъади гъахидиву.

¹⁹ Гьаму гафариинди Исайи, Петри фициб аьжалиинди Аллагь адлу апӀуруш, думу учв гъавриъ ахъбан бадали, дугъаз чаз гъапнийи. Ва гьадму гафарихъан Петриз кӀуру: – Узухъди гъач!

²⁰ Петр кьяляхъинди илдицуру ва дугъаз Исайин юкӀв али ученик рякъюру. Дугъу хябяхъдин уьл ипӀурайи вахтна Исайихьнаси гьачӀарккну: «Агъа, Уву шли масу тувди?» – кӀури гьерху гьадму ученик вуйи.

²¹ Ва думура чпихъди гъюрайиб дяркъну, Петри Исайихьан гьерхру: – Я Агъа, хъа мугъкан фу хьибди?

²² – Узуз думу, Узу хъадакну гъяйизкьан, яшамиш шули гъузну ккунди шул. Хъа яв фу хъаяв дугъахъ? – жаваб туву Дугъу. – Уву Узухъди гъач!

²³ Магьа гьаддиз гъардшарин арайиъ, думу ученик йикӀрур дар, кӀуру хабар арабгънийи. Аммаки Исайи, думу йикӀидар кӀури гъапундайи. Дугъу анжагъ: «Узуз думу, Узу хъадакну гъяйизкьан, яшамиш шули гъузну ккунди шул. Хъа яв фу хъаяв дугъахъ?» – гьамцитӀан гъапундайи.

²⁴ Думу гьадмуну ученик вуйи, гьаму вариб ктибтур ва гьаму вари гъибикӀур. Ва ухьуз аьгъяхьуз, дугъан шагьидвал гьякьлуб вуйиб.

²⁵ Исайи хъанара гизаф жара ляхнарра гъапӀну. Эгер дурар вари хъайи-хъайиси дикӀури гъашиш, вари дюнʼяйиъра гьадмукьан кьадар китабариз йишв гьудрубкӀрийи.