Югьан 20 - Гирами Китаб

Исайин беден накьвдиъ имдар хьуб

¹ Гьяфтайин садпи йигъан гвачӀнин ухди, мучӀуди имиди, Магдалайиан вуйи Марʼям накьвдихьна гъюру ва, дугъаз накьвдин айитӀинди учӀврушвахь гьипнайи гъван гьидипнади рябкъюру.

² Думу жаргъури дуфну, Симон Петризна ва Исайин ккунди гъаши жара ученикдиз кӀуру: – Агъа накьвдиан гъурхну, аьгъдарчуз наана гъурхнуш.

³ Петрна гьадму ученик накьвдихьна жаргъуру.

⁴ Дурар кьюридра ккажагъуру, хъа ПетртӀан тмуну ученик зарбди жаргъуйи, ва думу накьвдихьна сарпирди хъуркьру.

⁵ Думу ис алахъну лигуру, фу лигурва: душваъ (майит диврушвʼин) кафнартӀан адар, амма думу накьвдин айитӀ учӀвундайи.

⁶ Дугъахьна Симон Петрра хъуркьру. Думу накьвдиъ учӀвру – душваъ дугъаз дипнайи кафан ва

⁷ Исайин кӀул илибтӀнайи чӀулар рякъюру. Му чӀулар кафнихьан тина йишвахь дидиржну дирчнайи.

⁸ Сифте накьвдихьна хъуркьу тму ученикра айитӀна учӀвру. Мурар гъяркъиган, думура хъугъру.

⁹ Аммаки дурар сабан Гирами китабариъ дибикӀнайибдин гъавриъ адайи. Хъа дурариъ, Иса чӀиви хьиди, кӀури дибикӀна.

Иса чӀиви хьуб

¹⁰ Ученикар хулаз хътакуру.

¹¹ Хъа Марʼям чӀатинди дугъужвнайи ва ишурайи. Ва, ишурамиди, ис алахъну, накьвдизди лигуру,

¹² дугъаз, Исайин беден алди гъабши йишвʼин лизи ккурттар али кьюр малайик рякъюру: сар кӀулихъ жвурнахъинди, тмунур ликар гъашишвахъинди деънайи.

¹³ – Эй дишагьли, гьаз ишурава? – гьерху малайикари. – Йиз Агъа гъурхну, хъа наана вуш, аьгъдарзуз, – жаваб туву дугъу.

¹⁴ Гьаму гафар кӀурамиди Марʼям кьяляхъинди илтӀикӀуру, фу лигурва: чан улихь Иса дийигъна. Аммаки думу му Иса вуйибдин гъавриъ ахъундайи.

¹⁵ – Эй дишагьли, гьаз ишурава? – кӀуру дугъаз Исайи. – Фуж агурава? Марʼямди, му багъбанчи вушул пну хиял дапӀну, Дугъаз кӀуру: – Йиз аьхюр, эгер уву Думу гьашвʼан адагъну гъурхнуш, йип узукна, наан дитнуш, узу Думу гъадагъурза.

¹⁶ – Марʼям! – кӀуру Исайи. Марʼям илдицуру. – Раввуни! (Жугьуд чӀалниинди: «Мялим»), – пну, чӀигъ апӀуру Марʼямди.

¹⁷ – Узук мукучан! – кӀуру дугъаз Исайи. – Узу сабан Йиз Адашдихьна хъадакнадарза. Уву, душну, Йиз чвйириз: «Узу Йиз Адашдихьна ва ичв Адашдихьна, Йиз ва ичв Аллагьдихьна хътакураза», кӀура, йип.

¹⁸ Магдалайиан вуйи Марʼям ученикарихьна гъюру ва дурариз кӀуру: – Узуз Агъа гъяркъюнзуз! Ва дугъу чаз Исайи гъапиб кӀуру.

Иса ученикариз ачмиш хьуб

¹⁹ Гьяфтайин гьадму садпи йигъан хябяхъган Исайин ученикар, жугьдарин гьякимдрарихьан гучӀбу раккнарра хъяркьну, саб хулаъ уч духьнайи. Мушваъ Иса учӀвру ва дурарин арайиъ дугъужвуру: – Мясляаьт учвуз! – гъапи Дугъу.

²⁰ Дугъу Чан хиларна гъвал улупуру. Агъа гъяркъю ученикар шад шулу.

²¹ – Мясляаьт учвуз! – текрар апӀуру Дугъу. – Адашди Узу фици гьаънуш, гьаци Узу учвура гьаъраза.

²² Гьамци дупну, Дугъу дурариин уф илитуру ва кӀуру: – Гирами Рюгь кьабул апӀинай!

²³ Учву шлин гунгьарилан хил алдабгъиш, гьадгъан алдабгъну хьибди, хъа шлиин гъитиш, гьадрариин гунагь гъубзди.

Фомайин хътругърувал

²⁴ „КӀвятӀях“ кӀуру лакӀам хъайи йицӀикьюрикан Фома кӀуру сар, Иса ачмиш шлуган, дурарихъди хътайи.

²⁵ – Учуз Агъа гъяркъюнчуз! – кӀуру дугъаз тмуну ученикари. – Дугъан хилариин кьумари гъиту урхъар дярякъди, дурариъ узу йиз тӀуб удрубччвди ва йиз хил Дугъан гъвалʼан жидайи идипу зийниъ идривди, мидихъ хътругъарза! – жаваб туву дугъу.

²⁶ Саб гьяфтайилан Исайин ученикар хъанара уч шулу. Му ражари дурарихъди Фомара хъайи. Раккнар хъяркьнашра, хулаъ Иса учӀвру ва, дурарин кьялаъ дийигъну, кӀуру: – Мясляаьт учвуз!

²⁷ Хъасин Фомайиз кӀуру: – ТӀуб гьачӀабкк! Магьа Йиз хилар. Хил гьачӀабкк ва гъвалак зийниъ убччв! КӀвахъни махьан, аммаки хъугъ!

²⁸ – Йиз Агъа ва йиз Аллагь! – гьарайниинди гъапи Фомайи.

²⁹ – Уву хъугъунва, гьаз гъапиш Узу гъяркъюнвуз? Аммаки хушбахтаврар ву гьадрар, Узу дярякъди, хъугъдар! – кӀуру дугъаз Исайи.

Югьанди гьаз му китаб гъибикӀну

³⁰ Исайи дурарин улихь гьаму китабдиъ дидикӀну адру хъана гизаф аьламатарра улупну.

³¹ Аммаки гьаму вари дибикӀнайиб, учву Иса Месигь вуйибдихъ, Думу Аллагьдин Бай вуйибдихъ хъугъри пну ва Дугъахъ хъугъбиинди учвуз зат ккудудубкӀру уьмур хьпан бадали дибикӀнайиб ву.