Югьан 2 - Гирами Китаб

Кана шагьриъ сумчир

¹ Кьюд йигълан Галилей уьлкейин Кана шагьриъ сумчир шулу. Душваъ Исайин дадара айи.

² Сумчриз Исайиз ва Дугъан ученикаризра теклиф вуйи.

³ Хялари вари чяхир гъубхъиган, Исайин дадайи Дугъаз кӀуру: – Мурарин чяхир имдар.

⁴ – Уву гьаз кӀурава Узуз дици? – жаваб тувру дугъаз Исайи. – Йиз вахт мегьел улубкьнадар.

⁵ – Дугъу фици гъапиш, гьаци апӀинай, – гъапи Исайин дадайи кюмекчйириз.

⁶ Гьадушвахь жугьдари чпин диндихъди жикӀувалариз ишлетмиш апӀури шлу йирхьуб гъвандин латар хьайи, дурарикан гьарубдиъ кьюб-шубуб гаргун шид гъябгъюйи.

⁷ – Латар штухьди ацӀай, – кӀуру Исайи кюмекчйириз. Дурарира латар даргариккнакьан штухьди ацӀру.

⁸ – Гьамус сацӀиб шид удубзну, мярака кӀули гъабхрурихьна гъайибхай, – гъапи Исайи.

⁹ Мярака кӀули гъабхрури чяхриз илтӀибкӀнайи штук ниъ капӀру. Дугъаз чяхир гьапӀруб-вуш аьгъдайи, хъа кюмекчйириз аьгъяйи.

¹⁰ Мярака гъабхрури, жамраз дих дапӀну, кӀуру: – Адмийири хялариз сифте ужуб чяхир гьивру, хъасин вари пиян гъашиган, чӀуруб хуру. Хъа уву ужубсиб чяхир гьамусдиз гьаз гъибтнава?

¹¹ Му Исайи Галилей уьлкейиъ айи Канайиъ улупу аьламатарикан сабпи аьламат вуйи. Гьамдиинди Дугъу Чан зурбавал улупнийи ва Дугъан ученикар Дугъахъ хъугънийи.

¹² Гьамдихъан Иса Кафернагьум шагьриз гъягъюру. Дугъахъди Чан дада, чвйир ва ученикарра хъайи. Дурарин душваъ сякьюдар йигъар шулу.

¹³ Жугьдарин Пасхайин машквар багахь шулайиган, Иса Ерусалим шагьриз гъягъюру.

¹⁴ Душваъ Аллагьдин хулан гьяятдиъ учӀвиган, Дугъаз малар, марччар ва луфар масу туврайидар ва пулар гьюдюхрударра рякъюру.

¹⁵ Исайи, тӀурнарикан гъирмаж дапӀну, дурар вари гьадушвʼан чпин малар-марччарра хьади утӀурккуру, пул гьюдюхрударин пулар даргъуру ва устлар ккитӀикӀуру.

¹⁶ Дугъу луфар масу туврайидариз гъапи: – Мурар милин дургин апӀинай! Йиз Адашдин хал базариз миилтӀибкӀанай!

¹⁷ Гьаму вари гъабхьиган, Исайин ученикарин Гирами китабарик дидикӀнайи гьамцдар гафар кӀваина гъюру: «Яв Хулахьна вуйи ккунивали Узу цӀаси ургиди».

¹⁸ Мушвʼин жугьдарин гьюкумдрар гъедергуру. – Увуз гьамцдар апӀуз ихтияр айивал фициб аьламатниинди улупидива? – гьерхру дурари.

¹⁹ – Му Аллагьдиз ккарагру хал учву дабгъай, хъа Узу думу шубуд йигъан айитӀ дивурза, – дурариз жаваб вуди гъапи Исайи.

²⁰ – Му Аллагьдин хал диври инсанар ягъчӀвурна йирхьуд йисан гъилихну, хъа Уву шубуд йигъан дивдина?! – гъапи жугьдари.

²¹ Исайи Аллагьдин хулкан улхурайиб Чан бедендикан кӀурайивал вуйи.

²² Иса, дукӀну, шубудпи йигъан чӀиви гъашиган, Дугъу гьамдикан дупнайи гафар Дугъан ученикарин кӀваина гъафнийи, ва дурар Гирами китабарихъ ва Исайихъ хъугънийи.

²³ Иса Ерусалимдиъ Пасхайин машквраъ айи вахтна, Дугъу улупу аьламатар дяркъну, гизафдар Дугъахъ хъугънийи.

²⁴ Хъа Учв, Иса, саринна ихтибарнаъ учӀвдайи, гьаз гъапиш Дугъаз инсанар ужуди аьгъяйи.

²⁵ Исайиз адмийирин хасиятарикан шли-вуш ктитувал лазим дайи, фицики Дугъаз гьарсар касдин кӀваъ айиб аьгъяйи.