Югьан 17 - Гирами Китаб

Исайин Чан Адашдихъди улхуб

¹ Му гафар гъапиган, Исайи завузди кӀул за апӀру ва кӀуру: – Я Адаш! Йиз сяаьт улубкьну. Яв Бай адлу апӀин, Яв Бали Уву адлу апӀбан бадали.

² Вари яшамиш шлубдин зиин Уву Дугъаз гьюкум тувунва. Уву Дугъахьна гьаъдариз гьаци Гьадгъура гьаргандин уьмур тувди.

³ Хъа гьаргандин уьмур – му Уву, сар вуйи, гьякьлу вуйи Аллагь, ва Уву гьау Иса Месигь аьгъю апӀувал ву.

⁴ Узуз Уву табшурмиш гъапӀу ляхин тамам дапӀну, Узу Уву жилиин адлу гъапӀунзаву.

⁵ Ва гьамус, дюнʼя ккебгъайиз улихьна, Узу Увухъди хъайиган, Узуз фици ад айиш, гьациб адниинди Узу адлу апӀин, эй Адаш.

⁶ Уву, му дюнʼяйиан адагъну, Узухьна туву адмийириз Яв ччвур ачмиш гъапӀунза. Думу адмийир, Явдар вуйидар, Уву Узуз тувунва. Дурари Яв Гаф гъюбхну.

⁷ Гьамус дурар, Уву Узуз тувуб вари Явуб вуйивалин, аьхирки, гъавриъ ахъну.

⁸ Уву Узухьди гьау гафар, Узу дурарихьна тувунза ва дурар дурари кьабул гъапӀну. Узу Увхьан дуфнайивалин дурар якьинтӀан гъавриъ ахъну ва Уву Узу гьаувалихъ хъугъну.

⁹ Узу гьадрарин гьякьнаан ккарагураза: Узу вари дюнʼяйихъанди ккарагурадарза, хъа Уву Узухьна тувдарихъандитӀан, гьаз гъапиш дурар Явдар ву,

¹⁰ фицики вари Узуз айиб Явуб ву, ва вари Увуз айиб Йизуб ву. Гьадрариантина Узу Йиз ад улупунза.

¹¹ Узу сарун му дюнʼяйиъ гъузрадарза, Узу Увухьна хътакураза, хъа дурар му дюнʼяйиъ гъузра. Эй гирами Йиз Адаш! Яв ччвурнан кьувватниинди – Уву Узуз тувунва гьадму ччвур – дурар уьрх, Увуна Узу сар вуйиганси, дурарра сарси хьпан бадали.

¹² Яв ччвурнан кьувватниинди – Уву Узуз тувунва гьадму ччвур – чпихъди хъайи вахтна Узу уьрхюри гъахьунза дурар. Узу гъюрхюнза дурар: аьжалихьна улупнайи сартӀан гъайри фужкӀара гъакӀундар, гьамци Гирами бикӀбарин Гаф тамам дубхьну ккундийи.

¹³ Хъа Узу гьамус Увухьна гъюраза. Узу сабан жилиин илмиза, му вари Узу гьаддиз кӀураза, Йиз абцӀну вуйи шадвал Узухъди дурарира пай апӀбан бадали.

¹⁴ Узу Яв Гаф дурариз улупунза, гьаддиз му дюнʼяйи дурар даккун гъапӀну, гьаз гъапиш дурар му дюнʼяйиан даруган, Узу му дюнʼяйиан даруганси.

¹⁵ Узу Увкан дурар му дюнʼяйилан гъадагъуб ккун апӀурадарза, Узу ккун апӀураза, дурар писвалихьан уьрхюб.

¹⁶ Узу му дюнʼяйиан даруганси, дурар му дюнʼяйиан дар.

¹⁷ Гьякьвалин кьувватниинди дурар Яв гъуллугъниина жалб апӀин, Гьякьвал – му Яв Гаф ву.

¹⁸ Уву Узу дюнʼяйиз фици гьаънуш, Узура дурар му дюнʼяйиз гьаунза.

¹⁹ Гьадрар бадали, Узу Увуз дугъриданра дурар Явдар хьпахъди бахш гъахьунза.

²⁰ Анжагъ Узу гьадрарихъандитӀан ккарагурадарза, гьадрари гъапи Узкан вуйи гафналантина Узухъ хъугънайидарихъандира ккарагураза.

²¹ Гъит дурар вари саб хилди ишри, Уву Узуъ фици шулаш, хъа Узу Увуъ фици шулаш, гъит гьадрар Ухьуъ ишри. Ва гъит дюнʼяйиз Узу Уву гьаънайивал аьгъю ибшри.

²² Уву Узуз туву ад Узу дурариз тувунза, Увуна Узу сар вуйиси, дурарра саб хилди хьпан бадали.

²³ Узу дурариъ шулаза ва Уву Узуъ шулава. Гъит дурарра ижмиди сабхилди гъузри! Ва гъит дюнʼяйиз аьгъю ибшри Узу Уву гьаувал ва, Увуз Узу ккуниганси, Увуз дурарра ккунивал.

²⁴ Я Адаш! Узуз ккундузуз, Уву Узуз тувдар Узу шлушваъ Узухъди духьну. Гъит дурариз Уву Узуз туву Йиз ад рябкъри. Фицики дюнʼя арайиз хайиз Уву Узу ккун гъапӀунва.

²⁵ Эй гьякьлу вуйи Йиз Адаш! Дюнʼяйи Уву аьгъю гъапӀундар, Узуз Уву аьгъязуз, хъасин Узу Уву гьауб дурариз аьгъю гъабхьну.

²⁶ Увуз Узу ккуни масанвал гьадрариъра, Узу гьадрариъ фици аш, гьаци хьпан бадали, Узу дурариз Яв ччвур ачмиш гъапӀунза ва апӀидира вуза.