Югьан 11 - Гирами Китаб

Лазарин аьжал

¹ Сар адми иццру шулу. Дугъаз Лазар кӀуйи. Думу Марʼямна чан чи Марфа яшамиш шулайи Вифания гъулʼан вуйи.

² Марʼям, Агъайин ликарикан ягъ ктатури, дурар чан кушарихьди кжикури гъаши дишагьли вуйи. Ари Марʼямдин чве Лазар иццру гъахьнийи.

³ Чйири Исайихьна гьамци кӀури хабар дебккуз гьаънийи: «Агъа, гьадмунур, Увуз ккунирнур, кетӀерццна».

⁴ Гьаддикан аьгъю дубхьну, Исайи кӀуру: – Му иццрушин аьжалихьна дар, думу Аллагьдин ад бадали ва гьаддилантина Аллагьдин Бали Чан адлувал улупбан бадали, вуйиб ву.

⁵ Исайиз Марфа, дугъан чи Марʼям ва Лазар ккунидар вуйи.

⁶ Гьаци, Лазар иццурайибдикан гъеебхьнушра, Иса кьюд йигъансана Учв айишваъ гъузру.

⁷ Хъасин Дугъу Чан ученикариз кӀуру: – Гъачай, Ягьудия уьлкейиз кьяляхъ гъягъюрхьа.

⁸ – Я Мялим! – кӀуру Дугъаз ученикари, – жугьдариз Увʼин гъван уьлюбхну, улихьнаси йикӀуз ккунди айи, хъа Уву хъана дина гъягъюрана?

⁹ Исайи дурариз гъапи: – Йигъаъ йицӀикьюб сяаьт адаринхъа? Фуж йигъну гъяруш, дицир хъарсну алдакидар, фицики гьадгъаз му дюнʼяйин акв рябкъюра.

¹⁰ Хъа эгер дицир йишвну гъяруш, хъарсну алдакиди, гьаз гъапиш акв ади шулдар.

¹¹ Гьамци дупну, Исайи давам апӀуру: – Ихь дуст Лазар гъаахну. Узу думу хъиргуз гъяраза.

¹² – Агъа, сарун думу нивкӀуз душнаш, сагъ хьиди, – кӀуру Дугъаз ученикари.

¹³ Исайиз гьамдиинди Лазар дукӀнайиваликан пуз ккунди айи, хъа дурари, думу аьдати нивкӀуз душна кӀури, фикир дапӀнайи.

¹⁴ Гьадмуган Исайи дурариз ачухъди кӀуру: – Лазар гъакӀну.

¹⁵ Хъа учву бадали Узу гьадушваъ адарди хьубʼин шад вуза. Гьаци дубхьнайиган, учву хъугъдичва. Сарун гъачай гьадгъахьна гъягъюрхьа!

¹⁶ «КӀвятӀях» кӀуру лакӀам хъайи Фомайи чан юлдшариз кӀуру: – Гъачай, Мялимдихъди сатӀиди ухьура йихурухьа!

¹⁷ Дина гъафи Исайиз, Лазар дукӀну накьвдиъ ади юкьуд йигъ вуйиб аьгъю шулу.

¹⁸ Вифания Ерусалимдихьан шубуб километртӀан манзилнаъ адайи,

¹⁹ ва дина гьадрарихъди Марфайихьнана Марʼямдихьна чвуччвун дердер зигуз гизаф жугьдар дуфнайи.

²⁰ Иса гъюрайибдикан гъеебхьубси, Марфа дишлади Дугъан улихьна гъягъюру, хъа Марʼям хулаъ имийи.

²¹ – Агъа, эгер Уву мушваъ айиш, йиз чве йикӀидайи! – гъапи Марфайи Исайиз. –

²² Саки узуз аьгъязуз, хъа гьамус вушра, Уву Аллагьдикан фу ккун гъапӀишра, Дугъу Увуз тувди.

²³ – Яв чве хъана гъудужвиди, – гъапи дугъаз Исайи.

²⁴ – Гъиямат йигъан вари чӀиви шлуган, думура гъудужвруб аьгъязуз, – жаваб туву Марфайи.

²⁵ Исайи гъапи: – Узу вуза чӀиви хьувал ва уьмур. Фуж Узухъ хъугъраш, гьеле гъачӀишра, яшамиш хьиди.

²⁶ Хъа гьарсар, яшамиш шулади Узухъ хъугънайир аьсрариъра йикӀидар. Уву гьамдихъ хъугъурна?

²⁷ – Ав, Агъа, – жаваб туврайи дугъу, – узу хъугъурза: гьаму дюнʼяйиз гъюз ккади айи ва, магьа дуфнайи Месигь, Аллагьдин Бай, Уву вува.

Исайилан нивгъар алдахьуб

²⁸ Гьамци дупну, Марфайи, Марʼямдиз жиниди дих дапӀну, кӀуру: – Мялим гьамшваъ а, Дугъу увуз дих апӀура.

²⁹ Му гафар гъеерхьубси, Марʼям гъудужвну, Дугъахьна гъягъюру.

³⁰ Иса мегьел гъулаъ учӀвнадайи ва Учв Марфайи къаршуламиш гъапӀушвʼин илмийи.

³¹ Марʼямдихъди хулаъ ади ва думу ккарцури гъаши жугьдар, Марʼям тяди кади гъудужвну чӀатна удучӀвуб дябкъну, думу накьвдихъна ишуз гъягъюра, кӀури, хиял дапӀну, дурарра дугъан кьяляхъди гъягъюру.

³² Хъа Марʼям, Иса хьайишвахьна дуфну, Думу гъяркъюбси Дугъан ликарикк ккархьру ва кӀуру: – Я Агъа, эгер Уву мушваъ айиш, йиз чве йикӀидайи.

³³ Марʼям ва дугъахъди гъафи жугьдар дердлуди ишури дябкъну, кӀван деринаризкьан Чазра язухъ дубхьнайи Исайи гьерху:

³⁴ – Думу наан кивначва? – Гъач учу улупидича, – гъапи дурари.

³⁵ Иса ишуру.

³⁶ – Лигайчва, фици Мугъаз думу ккундуш! – гъапи жугьдари чпин арайиъ.

³⁷ – Мугъу кур вуйириз рябкъювал тувну, – гъапи шли-вуш дураригъян сари, – Белки Дугъхьан Лазарра чӀиви шлуси апӀуз шул?

³⁸ Иса хъана артухъ пашманвалиинди накьвдихьна гъюру. Накьв дюрхъсиб вуйи. Душвазди учӀврушвахь гъван гьипнайи.

³⁹ – Гъван гьадабгъай! – кӀуру Исайи. – Агъа, душваъ майтин ниъ абхънашул, фицики думу кивхъан юкьуд йигъ улдубчӀвна, – кӀуру Дугъаз дукӀнайирин чи Марфайи.

⁴⁰ Исайи дугъаз кӀуру: – Узу увуз гъапундайин: «Эгер уву хъугъри гъузиш, Аллагьдин гьунар рябкъидивуз», – кӀури?

⁴¹ Гъван гьадабгъуру. Исайи улар зина заъру ва кӀуру: – Адаш, Увуз баркаллагь кӀураза, Увуз Узу ерхьбаз.

⁴² Увуз Узу гьарган ерхьурайиб аьгъязуз. Гьамушвʼин али халкь Узу Уву гьаънайибдихъ хъугъри пну, ачухъди кӀурайиб вуйиз!

⁴³ Ва гьамци дупну, Исайи зарбди дих гъапӀу: – Лазар, удучӀв!

⁴⁴ Хилар-ликар кафнаригъян гъидиржнайи, машниинра ирин чарч илипнайи Лазар накьвдиан удучӀвуру. – Думу гъюдурчай, гъит гъарахри! – гъапи дурариз Исайи.

Жугьдар Иса йикӀуз чалишмиш хьуб

⁴⁵ Марʼямдихьна гъафи ва Исайи гъапӀуб гъябкъю жугьдарикан гизафдар Дугъахъ хъугънийи.

⁴⁶ Хъа дурарикан, фарисйирихьна душну, Исайи гъапӀубдикан ктибтрударра гъидихънийи.

⁴⁷ Жугьдарин аьхюну маллйирна фарисйир чпин собрандиз уч гъаши: – Ухьу гьапӀну ккунду? – кӀуйи дурари. – Му касди гизаф аьламатар улупура.

⁴⁸ Эгер Думу мици гъитиш, вари Гьадгъахъ хъугъди ва римлуйир гъафиган, дурари ихь гьюкуматра ва ихь халкьра терг апӀиди.

⁴⁹ Каяфа кӀуру ва гьадму йисан жугьдарин маллйирин аьхюр вуди кадагънайи дурарикан сари кӀуру:

⁵⁰ – Учву сабдинра гъавриъ ахърадарчва! Я кас, учвуз гьаз аьгъдарчвуз: учвуз ужу хьибди, эгер вари халкьдихъанди сар адми гъачӀиш, вари жугьдар йихайиз?

⁵¹ Мурар Каяфайин хусуси гафар дайи: гьадму йисан думу жугьдарин маллйирин аьхюрра вуди, дугъу пайгъамбриси гъапнийи, Иса халкьдихъанди йикӀиди кӀури,

⁵² ва неинки гьаму халкьдихъанди, хъа гьацира вари дюнʼя вуйибси дарагънайи Аллагьдин веледар сабвалихъна хпан бадалира.

⁵³ Гьадму йигъхъан дурари Иса фици пуч апӀуруш, фикир апӀуз хъюгъру.

⁵⁴ Гьаддиз Иса жугьдарин арайиъ ашкарди лицури гъахьундар, ва гьадлин Думу, ичӀи чюлин гъирагъдихъ хъайи Ефраим кӀуру шагьриз душну, гьадушваъ Чан ученикарихъди гъузру.

⁵⁵ Жугьдарин Пасхайин машквар багахь шулайи. Уьлкейин варишвариан, чпи машквар хьайиз улихьна гунгьарихьан марцц апӀбан бадали, гьациб аьдат тамам апӀуз гизафдар Ерусалимдиз дуфнайи.

⁵⁶ Дурари, Иса агури, Аллагьдин хулаз уч духьну, чиб-чпигъ кӀуйи: «Фици хиял апӀурачва? Думу Пасхайин машквраз гъюрдайкӀана?»

⁵⁷ Аьхюну маллйирина фарисйири Иса дисбан бадали, гьар шлиз Думу айишв аьгъю гъабхьири гьаддикан чпиз хабар дебккуб буйругъ тувру.