Якьубдин 5 - Гирами Китаб

Жвуваз жвувтӀан даккни девлетлуйириз жаза хьибди

¹ Хъа гьамус хъебехъай, учву, девлетлуйир! Ишай ва гьарай ипай учвʼин улукьуз ккайи бедбахтвалариин.

² Ичв девлет гъутӀну, ичв палат сурари гъипӀну.

³ Ичв гъизилизна арсраз гандриж гъивну! Гьадму гандрижи учвуз къаршуди шагьидвал апӀиди ва ичв беден, цӀиси, ипӀиди. Учву ичв аьхиримжи йигъариз учвуз девлет уч дапӀначва!

⁴ Ичв хутӀлариъ бегьер уч апӀрудариз кьимат тутрувди, учвуз гъибтунчва, дурари Аллагьдиз гьарйир апӀура, ва хутӀлиъ айидарин агьрар Саваоф Агъайин ибарихьна дурукьна. (Саваоф – Аллагьдин ччвурарикан саб, аьршарин кьушмарин аьхюр кӀуру гаф ву).

⁵ Учву жилиин девлетниин уьлюрхну яшамиш гъахьунчва, кефер апӀури гъахьунчва, урккру йигъаз ичв жанар гваназ гъюрхюнчва.

⁶ Учву тахсир ктрудар тахсиркрар апӀуйчва ва йивну йихуйчва, хъа дурар учвуз гъаршу гъудужвдайи.

Сабур апӀинай ва ккарагай

⁷ Гьаци вуйиган, сабур апӀинай, гъардшар, Агъа кьяляхъ гъюру йигъ хьайизкьан! Лигай, нежбер фукьан сабурлуди ккилигури шулуш, дубзнайи жили багьа бегьер хайиз фици думу чвлин ва хьадукран мархьариз ккилигури шулуш.

⁸ Учвура сабурлувалиинди ккилигури гъузай, юкӀвар мюгькам апӀинай, гьаз гъапиш, Агъа гъюру йигъар сарун багахь хьа.

⁹ Гъардшар, Аллагьди учвуз жаза гьададабтӀуз, чиб-чпилан мулханай. Лигай, Судья гьамустӀанра урчӀарихъ дийигъна!

¹⁰ Гъардшар, сабур апӀбаъ ва мюгькамвалиъ Аллагьдин ччвурнахъан гъапи пайгъамбрарихъан мисал гъадабгъай.

¹¹ Учвуз аьгъячвуз, аьхиризкьан мюгькамди гъуздариз учу бахтаврар кӀурача. Учвуз Аюбдин ижмиваликан гъеебхьунчвуз ва, Агъайи дугъаз чан уьмриъ фициб аьхир тувнуш, аьгъячвуз, гьаз гъапиш Агъа рягьимлур ву ва язухъ Зигрур ву.

¹² Сифтена-сифте, йиз гъардшар, я завариинди, я жилариинди ху мапӀанай, я жараси гьич саб жюрейиинди ху мапӀанай. Гъит ичв анжагъ «ав» кӀурушваъ «ав» ибшри, «ваъ» кӀурушваъ «ваъ» ибшри, учвуз жаза дархьбан бадали.

¹³ Учвкан фуж балайикк ккахъиш, гъит ккарагри, фуж шадвали ацӀнаш, гъит Аллагьдиз мяълийир апӀри.

¹⁴ Учвкан фуж иццураш, хъугърударин жямяаьтдин аьхюриз дих апӀри ва, Агъайин ччвурнахъ ччим кадатну, гъит, гьадгъан зиин ккарагри.

¹⁵ ГьубкӀну хъугъвал айи ккарагували иццурайир сагъ апӀиди ва Агъайи думу ликриин апӀиди. Хъа эгер дугъу гунагь дапӀнаш, хил алдабгъиди.

¹⁶ Гьаддиз чиб-чпин улихь жвувкан ктахьу гунгьар кӀулʼин дисай ва, Агъайи учву сагъ апӀбан бадали, чиб-чпихъанди ккарагай. Гьякь уьмур хъапӀрайирин ккарагбаъ гизаф кьувват а!

¹⁷ Илʼяс ухьусир адми вуйи. Думу лап ижмишнаан мархь дурубгъбан бадали ккарагнийи, ва шубуд йисанна гьацӀаъ гъубгъундайи.

¹⁸ Думу хъана ккарагнийи, ва аьршариан мархь гъубгънийи, жили бегьер гъабхнийи.

¹⁹ Йиз гъардшар, эгер учвкан фуж, гьякь рякълан улдугну, шли-вуш хъана алаънуш,

²⁰ аьгъю йибхьай, гунагькар кучӀлин рякъхъан хътаури думу аьжалихьан уьрхюра ва гизаф гунгьар апӀуваликкан азад апӀура.