Якьубдин 3 - Гирами Китаб

Мелз ва гафар

¹ Йиз гъардшар, вари мялимар хьуз мюхъюгъянай. Ихь, мялимарин, суд ижмиди апӀруб аьгъячвузки,

² фицики ухьу варидари гагь-гагь лайикьсуз тӀулар апӀурахьа. Чан мелзниинди чӀуруб даркӀрур гьуркӀу кас ву ва дугъаз чан бедендин эйсивал апӀузра кьувват а.

³ Эгер гьяйвнин сппаригъ ухьу фури гъипиш, думу ухьуз мютӀюгъ шулу, дидин вари жандин эйвал апӀурхьа.

⁴ Гьадмукьан аьхю гимйирра магьа гьаци, пис микӀари гьирчнайидар, саб бицӀи рулиинди хъапӀрури чаз ккунишвахъинди хъапӀра.

⁵ Гьамци ихь мелзра, учв ихь бедендин бицӀи пайтӀан даршра, дидхьан зурба ляхнар апӀуз шулу. ЦӀюмгъял кабхъиш, гьадму бицӀи цӀи зурба яркур убгуру!

⁶ Мелз – цӀа ву. Ихь жандин имбу паярик гъилигган, дидиъ варитӀан гизаф писвал а. Диди вари жан чиркин апӀура; дидик жегьеннемдин цӀикан цӀа кабхъра ва ихь уьмур убгура.

⁷ Адмийи гьубкьу жюрейин гьяйванатар, жакьвар, улчвурхури гъягърудар ва гьюлерин гьяйванатар вердиш дапӀна ва апӀурира а.

⁸ Хъа гьич сарихьанра мелз вердиш апӀуз шулдар. Му дебккуз даршлу, агъуйи абцӀнайи завал ву.

⁹ Гьамдиинди ухьу ихь Адаш Агъайин тярифар апӀури шулхьа ва гьамдиинди Аллагьдиз ухшар ади халкь дапӀнайи адмийириз агьрарра апӀури шулхьа.

¹⁰ Саб ушвниан удучӀвуру ужувлан гафарра, агьрарра. Йиз гъардшар, дици дубхьну ккундар.

¹¹ Саб булагъдиан марцци штарра, кьилзи штарра удучӀвури хьуз мумкин вуйинхъа?

¹² Йиз гъардшар, шулин ари, инжирин гьаригъ хифар гъиршри, ясана тӀумтӀарин ширариин инжирар илиршури? Гьаци кьилзи булагъдиан марцци шид удубчӀвуб мумкин дар!

Гьякь вуйи аькьюл ва кучӀал

¹³ Ичв арайиъ фужкӀа дугъридан фагьумлу ва варибдин гъавриъ айи кас адарин? Эгер дицир аш, дугъу чан фагьумлувал гьякь уьмриинди улупну ккунду, фагьумлуйириси кӀул ис дапӀну ккунду.

¹⁴ Хъа эгер ичв юкӀвариъ пис бахилвал аш, ва иблисвалиинди жвуваз хайир абгураш, фурслу махьанай ва гьякьнакан кучӀал макадапӀанай.

¹⁵ Мициб фагьум заълан гъюруб дар, думу му дюнʼяйинуб ву; рюгьниинди вуйиб дар, иблисдихьан гъюрайиб ву.

¹⁶ Наан бахилвал ва жвувтӀан даккнивал аш, гьадушваъ къайдасузвал ва гьарсаб пис ляхин а.

¹⁷ Заълан гъюрайи фагьумлувал, сифте нубатнаъ, марцциб ву, гьацира мясляаьт хурайиб ву, аькьюллуб ву, аьлакьайихъна хруб ву, рягьимлувалихьди ва ужувлан ляхнарихьди абцӀна, диди адмийир ккунидаризна даккнидариз жара апӀдар ва машназ лигдар.

¹⁸ Ислягьвал бадали мясляаьтниинди лихрудари гьякьвалин бегьер ккадабцӀиди.