Титдиз 2 - Гирами Китаб

Гьякь аьгъюваларихъди хьуб

¹ Уву, гьякь аьгъювалари фу тӀалаб апӀураш, дупну ккунду.

² Яшлуйириз чпин кӀулʼинди фикир апӀуз улуп: ужубна-харжиб аьгъю апӀури ишри, гьюрматназ лайикьди ишри, фикирлуди ишри, ижми хъугърудар ишри, ккудудубкӀру масанвалиъ ишри, мюгькамди сабурлудар ишри.

³ Гьаци улуп яшлу дишагьлийиризра: намуслуди яшамиш шлуганси, футнийир дарагъди, убхърубдиъ улар адрахьруси; гъит, жигьил швушвариз ужувлар апӀуз улупри.

⁴ Дурарихьди чпин жилар ккун апӀуз гъитри; чпин веледарихъ юкӀв хъипри;

⁵ аькьюллуди фикир апӀрудар ишри, чӀат ул адрударди вердиш ишри, хулан гъайгъу кайидар ишри, ужʼвал кайидар ишри, Аллагьдин Хабар аскан даршлуси, чпин жиларихъ хъпехърудар ишри.

⁶ Гьаци жигьиларра ишри: дурариз чпи хилиъ дисуз шлуси улуп.

⁷ Уву дурариз вари яв алдабгъурайи ликдииндина ляхнариинди чешнеди гъуз. Гъит, уву улупурайи аьгъювалар лап кӀваантӀан ва гьюрматназ лайикь ишри,

⁸ ихь душмнарихьан ухьуз фукӀара чӀуруб пуз даршлуганси ва дурариз чпиз нач шлуганси, яв гаф-чӀал сагъиб ва гьич саб гъалатӀ ктруб ибшри.

⁹ ЛукӀариз улуп: вари чпин аьхюдарихъ хъпехърудар ишри; кӀуруб апӀрудар ишри; гафариз къаршу удудучӀври,

¹⁰ гьитӀибкӀрудар ваъ, хъа ухьу Уьрхрурикан – ихь Аллагьдикан вуйи аьгъювалар хъана артухъ уткан ва такабур апӀру гьубкӀу ихтибар алидар ишри.

¹¹ Фицики Аллагьдин зурба вуйи ужувлу вари инсаният уьрхюз шлу аквнахьди ккапӀнийи.

¹² Аллагьдин ужувлу ухьуз гьаму дюнʼяйиъ, аллагьсуз уьмрихьан ва му дюнʼяйин тямягьярихьан ярхла духьну, жвув хилиъ дидисну, марцциди ва намуслуди яшамиш йихь кӀурахьуз.

¹³ Диди ихь умудар тамам шлу хушбахтавар Йигъ гъяйиз ккилигури гъузуз улупурахьуз. Думу Йигъ Чан аднаъди зурба вуйи Аллагь ва ухьу Уьрхрур – Иса Месигь гъюру Йигъ хьибди.

¹⁴ Ухьу законсузваликкан азад апӀбан бадали, Чаз дурукьнайи халкь марцц апӀбан бадали ва думу халкь, вари юкӀв хъипну, ужʼвал апӀуз улихь гъягъбан бадали, Гьадгъу ухьхъанди Чан жан тувну.

¹⁵ Магьа гьамцдар аьгъювалар улуп. Яв вари гьюкум улихь гьапӀну, дурарик юкӀв капӀ ва тахсрар улупури гъуз! Ва гъит, гьич сарихьанра увухьинди хъюхъ за дапӀну лигуз дарибшри!