Тимофейиз-1 2 - Гирами Китаб

Сакьюдар ляхнарикан

¹ Сифтена-сифте увкан ккун апӀурайиб гьаму вуйиз: вари адмийирихъанди ккарагай, тӀалаб апӀинай, гаф хъипай, Аллагьдиз чухсагъул йипай.

² Ухьу мясляаьт ади ва ужувлаъ архаинди, лайикьлуди яшамиш шлуси, пачгьарихъанди ва гьюкмихь хьайи варидарихъанди ккарагай.

³ Мици апӀуб дюзди ва ухьу уьрхру Аллагьдиз кьабулди ву.

⁴ Фицики Дугъаз вари адмийир дюрхну ва гьякьвалихъна дуфну ккунду.

⁵ Аллагь сар ву, ва Аллагьдинна адмийин ара сатӀи АпӀурайирра сар ву. Думу Кас – Месигь Иса ву.

⁶ Дугъу вари адмийирихъанди кайи буржнан ерина Учв тувну. Думу Аллагьди, вахт гъафиган, дюнʼяйиз гьау шагьидвал ву.

⁷ Гьаддиз узу, Хабар рабгърурди, Месигьдин вакилди ва жугьуд дару халкьариз гьякь хъугъувалин мялимди дерккнайир вузун; кучӀлар апӀурадарза, гьякь кӀураза.

⁸ Гьаци вуйиган жилари, хъял ва гьюжатар гъитну, гьарсаб йишвахь ккарагури, марцци хилар заргури ккундузуз.

⁹ Гьаци дишагьлийирира палат абурлуди ва жвуваз балгруси, къайдайиинди алабхьри; гъит дурари, аьжайибди кушар дерккри, гъизилар, жавагьирар, багьа палат алабхьури ваъ,

¹⁰ хъа Аллагьдиз бахш духьнайи дишагьлийириз лайикь вуйиси гъяни ляхнариинди чпи кабалгри.

¹¹ Гъит дишагьлийири, артухъ гаф дарди, саб наразивал улулупди, аьгъювалар аьгъю апӀри.

¹² Дишагьлийиз жили-жвуван зиин аьхювал апӀуз ва аьгъювалар улупуз гъидритарза; думу ккебехъну гъузри.

¹³ Фицики сифте – Адам, хъа Ева халкь гъапӀнийи.

¹⁴ Алдатмиш гъапӀурра Адам дайи, хъа, кӀучӀлихъ хъебехъну, гунагь гъапӀур учв вуйи.

¹⁵ Аммаки дишагьлира уьрхиди, бицӀидар апӀури, эгер хъугъувал, масанвал, гирамивал ва намуслувал ади яшамиш шулуш.