Рутдикан китаб 4 - Гирами Китаб

Вуазди Рут чаз хпирди гъадагъуб

¹ Вуаз шагьрин халкь уч шлу урарихьна удучӀву ва деу. Магьа багхьантина чав кӀурайи гьадму гъайгъу зигру багахьлу гъярайи. Вуазди дугъаз гъапи: – Я мирас, мина гъач гьеле, деъ гьамушвахь. Думу гъафи ва деу.

² Вуазди, шагьрин агъсакълар йицӀур касдиз гъач дупну, кӀуру: – Гьамшвахь деай. Дурарра деъру.

³ Хъа Вуазди думу гъайгъу зигру багахьлуйиз кӀуру: – Муавдиан кьяляхъ дуфнайи Наумийи ихь мирас Элималикдин хутӀил масу тувра.

⁴ Узу увуз хабар дебккраза ва пуз ккундазуз: гьамшвахь деънайидарин ва агъсакъларин улихь, гьадму хутӀил гъадабгъ, кӀуразавуз. Эгер увуз гъадабгъуз ккундуш, гъадабгъ, хъа эгер ккундарш, узукна йип, узуз аьгъю ибшри. Думу гъадабгъуз увузтӀан ихтияр адар, увлан алдабхъуб – узуз. Дугъу: – Узу гъадабгъурза, – гъапи.

⁵ Хъа Вуазди кӀуру: – Уву Наумийихьан хутӀил гъадабгъиш, чан мулкнаъ дукӀнайирин ччвур давам апӀбан бадали, дугъан ачӀни гъахьи муав Рутра хпирди гъадагъуб алабхъуравуин.

⁶ Хъа думу гъайгъу зигрури кӀуру: – Йиз мулк кам дархьбан бадали, узхьан думу хпирди гъадагъуз шулдарзухьан. Уву кьабул апӀин думуна хутӀил, фицики узхьан кьабул апӀуз хьибдар.

⁷ Саб мутму гъадабгъруган ва гьюдюхруган, гьадму ляхин тамам хьуб улупбан бадали муганаз Израилиъ гьамциб аьдат айи: сари чан сабнуб ликриин алабхьруб илдибтну тмунуриз тувуйи. Му аьдатну Израилиъ, гьамцдар ляхнар тасдикь апӀувал улупуйи.

⁸ Хъа думу гъайгъу зигрури Вуаздиз гъапи: – Уву гъадабгъ. Хъа чан ликриин алиб илдибтну дугъахьна туву.

⁹ Хъасин Вуазди агъсакълариз ва вари адмийириз гъапи: – Учву гьамус узу Наумийихьан Элималикдинуб вари ва Килеундинубна Махлундинуб вари гъадабгъурайивалин шагьидар вучва.

¹⁰ ДукӀнайирин мулкнаъ чан ччвур гъубзбан бадали ва чан багъри юрднаан ва чан мирасарин арайиан чан ччвур дудрубгбан бадали, узу гьацира, узуз хпирди, Махлундин ачӀни гъахьи муав Рут гъадагъураза – гъи учву мидин шагьидар вучва.

¹¹ Урарихь хьайи адмийири ва агъсакълари гъапи: – Учу шагьидар гъахьунча. Гъит РАББИЙИ увуз яв хулаъ учӀвру хпирикан, Израилин хал ккебгъу кьюрид дишагьлийирсир, Рахилна Лиясир, хпир кадаъри! Ефрафайиъ девлет уч апӀин, ва гъит Вифлеемдиъ яв ччвур адлу ибшри!

¹² Ва яв хал, РАББИЙИ увуз туву гьадму жигьил дишагьлийилантина гъахьи насларилан, Ягьудайиз Тамар бабкан гъахи Перецдин халси ибшрияв!

¹³ Вуазди Рут гъадагъуру, дугъкан дугъаз хпир шулу. Думу дугъахъди шулу. РАББИЙИ дугъаз бицӀир тувру, ва Рутди бай апӀуру.

¹⁴ Хъа дишагьлийири Наумийиз кӀуру: – Уву гъайгъу зигрур хътарди гъидриту РАББИ аднаъ ишри! Ва гъит дугъан ччвур Израилиъ заан ибшри!

¹⁵ Думу яв юкӀв шад апӀрур, яв кьабивалиъ увуз уьл туврур хьиди. Думу уву ккуни яв швушву гъапӀур ву. Яв швушв увуз ургур байтӀан зина ву!

¹⁶ Думу бицӀир Наумийи чахьна гъадагъуру, чан хабахъ хъитру, ва гьамци уьрхюру.

¹⁷ Гъунши дишагьлийири кӀури гъахьну: «Наумийиз бай гъахьну». Дугъаз Обед кӀуру ччвурра тувнийи. Думу Давуддин адаш вуйи Ессейин адаш ву.

¹⁸ Ва магьа Перецарин тухум: Перецдин бай Гьецрон,

¹⁹ Гьецрондин бай Арам, Арамдин бай Амминадаб,

²⁰ Амминадабдин бай Нецрон, Нецрондин бай Салман,

²¹ Салмандин бай Вуаз, Вуаздин бай Обед,

²² Обеддин бай Ессе, Ессейин бай Давуд ву.