Рутдикан китаб 3 - Гирами Китаб

Рутна Вуаз раццаъ

¹ Наумийи Рутдиз кӀуру: – Йиз риш, увуз рягьят хьпан бадали, яв бин ккебгънийиш, ужу даршлийин?

² Магьа Вуаз, дугъан гъуллугънаъ айи дишагьлийирихъди уву гъахьунва, думу ихь гъайгъу зигрур даринхъа? Хябяхъди дугъу раццаъ чан мух микӀлахь гьипра.

³ ДижикӀну, ицци ниар кадатну, яв уччвудар палтар алахьну, раццʼина кудучӀв, аммаки ипӀуб-убхъуб апӀайиз дугъаз уву рякъруси мапӀан.

⁴ Думу дахърушв аьгъю апӀин ва, ахуз дахъиган, душну, дугъан ликариин илипнайиб алдабгъну, увура дахъ. Хъасин уву гьапӀну ккундуш, дугъу пидивуз.

⁵ Рутди дугъаз: – Уву гъапибси вари апӀидиза, – кӀуру.

⁶ Рут раццʼина гъушу ва вари чаз сижари гъапибси апӀуру.

⁷ Вуазди гъипӀу, гъубхъу, гьялар ачухъ гъахьи, хъа гъушу ва таяйихъ ахуз дахъу. Ихтиятди Рутра дина гъафи. Дугъу дугъан ликарилан алдабгъу, учвра дахъу.

⁸ ГьацӀишваринган думу хъиргру, илдицуру, фу лигурва, чан ликарихъ дишагьли дахъна.

⁹ Хъа Вуазди гьерхру: – Фуж вува? Дугъу гъапи: – Рут вуза, яв лукӀ, узу яв хлинцциккна гъадагъ, фицики уву йиз гъайгъу зигру багахьлу вува.

¹⁰ Вуазди кӀуру: – РАББИЙИХЬАН ужʼвал дурубкьнайир вува, йиз риш! Гьаму яв вафалувал, мугагьназтӀан хъа мюгькам шлуси гъапӀунва, фицики уву, касиб вушра, девлетлу вушра, жигьил агури гъахьундарва;

¹¹ гьаци вуйиган, йиз риш, гучӀ мапӀан, уву тӀалаб гъапӀуб вари апӀидиза. Йиз халкьдин варидарин мелзниин уву абурлу дишагьли вуди алва.

¹² Дюз ву, узу яв гъайгъу зигру багахьлу вуза. Амма узутӀан багахь вуйир а.

¹³ Ахъли гъуз, закур, эгер уву дугъу кьабул гъапӀиш, ужу ву, гъит кьабул апӀри, хъа эгер уву кьабул апӀуз ккун дархьиш, узу кьабул апӀарзаву. Гаф тувраза, РАББИ чӀивир вуйирси, йиз гафарра кӀулиз адагъидиза! ГвачӀиндизкьан ах.

¹⁴ Думу дугъан ликарихъ даахну гъузу, хъа чиб-чпи рякъюри-дярякъри акв хьайиз, гъудужвуру. Вуазди фикир гъапӀу: „Гъит раццʼина дишагьли гъюбкан саризра аьгъю дарибшри“.

¹⁵ Хъа кӀуру: – Яв зиълан илипнайи шал ча, ккибис. Дугъу ккибису ва Вуазди душвазди йицӀикьюб сеъ мух аьху ва дугъан кьялʼин иливу, шагьриз гъушу.

¹⁶ Хъа Рут чан сижарихьна гъюру. Сижари: «Фу гъабхьи, йиз риш?» – пну, гьерхру. Дугъу, Вуазди чаз фу гъапӀнуш, вари ктибтуру.

¹⁷ Хъа кӀуру: – Дугъу гьаму йицӀикьюб сеъ мух тувунзуз ва: «Яв сижарихьна ичӀи хилди мягъян», – гъапунзуз.

¹⁸ Сижари гъапи: – СацӀиб дийигъ, йиз риш, му ляхин фици ккудубкӀуруш, лигарва, фицики гъи му ляхин гьял дарапӀди думу сикин хьидар.