Рутдикан китаб 2 - Гирами Китаб

Рутна Вуаз чиб-чпиз алахьуб

¹ Наумийихъ чан жилир Элималикдин тухмиан бегьем гьюрмат айи девлетлу кас хъайи. Дугъан ччвур Вуаз вуйи.

² Муав миллетдикан вуйи Рутди Наумийиз кӀуру: – Узу, хутӀлариина душну, узуз чӀалра даркӀрурин кьяляхъди мухан кӀулар уч апӀидикӀана? Дугъу: – Гъарах, йиз риш, – гъапи.

³ Думу гъушу ва иган убгрударин кьяляхъди кӀулар дюхюз хъюгъю. Гьаци гъабхьнуки, му хутӀил Элималикдин багахьлу Вуаздинуб вуйи.

⁴ Магьа, Вифлеемдиан Вуаз гъюру ва иган убгрудариз: – РАББИ учвухъди ишри! – пну салам тувру. Дурари дугъаз: – РАББИЙИ увуз ужʼвал апӀри! – пну жаваб тувру.

⁵ Дугъу иган убгрударин аьхюрихьан гьерхру: – Гьатму жигьил дишагьли шлинур ву?

⁶ Иган убгрударин аьхюри жаваб туву: – Му жигьил муав дишагьли Наумийихъди Муав уьлкейиан дуфнайир ву.

⁷ Дугъу: „Иган убгрударин кьяляхъди мухан кӀулар уч апӀуз хай шулин?“, пну, гьерхнийи. Ва, гвачӀнианмина хъюгъну гьамусдиз гьамшваъ а; сирниккнакьан гъяри шулдар.

⁸ Хъа Вуазди Рутдиз гъапи: – Хъебехъ узухъ, йиз риш, кӀулар дюхюз жара хутӀлиина мягъян, мушвлан муулдучӀван, йиз гъуллугънаъ айи дишагьлийирихъди гьамшваъ гъуз;

⁹ дурар фуну хутӀлизди гъягъюруш лиг ва гьадрарихъди гъарах. Магьа, увук мукучанай кӀури, узу йиз иган убгрудариризра дупназа. Увуз шид ккун гъабхьиган, йиз иган убгрудари ацӀу гварарихьна гъарах ва увура убхъ.

¹⁰ Дугъу ис духьну, жилиинакьан икрам апӀури гъапи: – Узу жара миллетдинур вушра, узу кьабул апӀузкьан яв улихь фтиинди ужувлаз лайикь гъахьну?

¹¹ Вуазди жаваб туву: – Узуз, яв жилир йикӀбан кьяляхъ уву яв сижариз гъапӀу варибдикан, уву яв адаш, яв дада, яв ватан дипну, увуз гьамусдиз аьгъдру халкьдихьна гъюбкан, деебхьназуз.

¹² Гъит РАББИЙИ увуз, яв гьадму ляхниз дилигну, туври! Уву Израилин Аллагь РАББИЙИХЬНА, Дугъан хлинццарикк архаин хьпан бадали, дуфнайир вува. Гъит увуз Дугъхьан гьубкӀну вуйи кьимат ибшри!

¹³ Дугъу гъапи: – Йиз аьхюр, узуз гьамциб ужʼвал улупваки! Уву узу ккаарцунва. Яв гъуллугънаъ айи дишагьлийирин гьич саринра ккайир даршра, йиз, яв лукӀран, кӀваъ айиси гъапунва.

¹⁴ Лисундин вахтна Вуазди дугъаз гъапи: – Уьл ипӀуз мина гъач. Кубсри ипӀин. Думу иган убгрударин багахь деъру. Вуазди дугъаз кӀурицӀ тувру, дугъу ипӀуру, ацӀру, ва хъирибгънура гъубзру.

¹⁵ Хъа мухан кӀулар уч апӀуз хъюгъру. Вуазди чан иган убгрудариз гьамциб буйругъ тувру: «Шиларин арйиригъра уч апӀуз гъитай. Дугъаз гиран макадапӀанай.

¹⁶ Шиларигъянра гъядахьруси апӀинай, гьадгъаз гъитай, гъит уч апӀри, люкьнар мапӀанай».

¹⁷ Гьамци дугъу хябяхъдиз уч апӀури гъахьну, хъа уч гъапӀдар гьадушвʼин ктӀишуру, ва йирхьуб сеъкьан мух шулу.

¹⁸ Думу мух хулаз хуру, ва гъабхиб сижариз рябкъюру. Ва Рутди, лисундин вахтна чав гъипӀубдикан дубхну, дугъазра тувру.

¹⁹ Сижари дугъхьан гьерхру: – Гъи уву наан кӀулар уч гъапӀунва, наан гъилихунва? Уву кьабул гъапӀур ужувлакк ккахъривучв! Рутди чан сижариз, чав наан ляхин гъапӀнуш, ктибтуру: – Узу гъи гъилиху адмийин ччвур Вуаз вуйи.

²⁰ Хъа Наумийи чан швушваз гъапи: – Ужʼвал ибшри дугъаз РАББИЙИХЬАН! Думу чӀивидаризра, гъийихдаризра вафалу ву. Хъасин Наумийи дугъаз кӀуру: – Думу адми ихь багахьлу, ихь гъайгъу зигрударикан сар ву.

²¹ Муав Рутди чан сижариз кӀуру: – Гьеле дугъу узуз гъапнура ву: „Игнар ккудукӀайизкьан, йиз гъуллугънаъ айидарихъди гъуз“.

²² Хъа Наумийи чан швушваз гъапи: – Дугъан гъуллугънаъ айидарихъди гъягъюб ужуб апӀурава, йиз риш, жарадарин хутӀлариин увуз гиран ктапӀуб мумкин ву.

²³ Дугъу Вуаздин гъуллугънаъ айи дишагьлийирихъди, муханна дяхнин игнар ккудукӀайизкьан, кӀулар уч апӀуру. Дидхъан думу сижарихъди хулаъ гъузру.