Рим агьларихьна вуйи кагъаз 7 - Гирами Китаб

Къанундин лукӀʼваликкан ккудучӀвуб

¹ Учвуз аьгъдарди айинчвуз, гъардшар (учвуз, Къанундин гъаври ахънайидариз кӀураза), Къанунди инсан чӀивиди имиди дугъʼин агъавал апӀурайиб?

² Мисалназ, жилирихь хьайи шив, сабан думу чӀивидимидикьан гагьди, Къанундиинди чан жилирик китӀна, хъа эгер дугъан жилир гъачӀиш, Къанунди думу нюкгьин гьюкмиккан азад апӀура.

³ Гьаддиз, чан жилир чӀивидимиди думу жарариз швуваз гъушиш, дугъу кьяппавал апӀура. Хъа эгер дугъан жилир гъачӀиш, думу нюкгьин гьюкмиккан азад шула, ва гьаддиз дугъу, жарариз шивди гъушну кӀури, кьяппавал апӀурадар.

⁴ Гьаму жюрейиинди, йиз гъардшар, Месигьдин Бедендилантина учвура гъачӀидаригъян чӀиви гъахьирин ихтиярнаъ ахъбан бадали ва, Аллагьдиз бегьер хпан бадали, Къанунди кӀуруб апӀбаккан азад вучва.

⁵ Фицики ухьу бедендиз ккуниб апӀури яшамиш шулайхьа. Къанундиланмина шулайи ихь гунагькарвалин тямягьяри ихь жанариин агъавал апӀуйи. Диди ухьу аьжализ хурайхьу.

⁶ Гьадму Къанундин бацариъ айхьа. Ухьу, Къанундиз дукӀну, дидккан азад гъапӀунхьу. Сарун дидикӀнайи йирси аьдатарин хиликкди ваъ, хъа Рюгьнан хиликкди цӀийи духьну, Аллагьдиз гъуллугъ апӀуз шулу.

Гунагькарвалихъди дяви

⁷ Мушваъ фу шула? Къанун – му гунагь вуйинхъа? Ваъ, дици дар. Мидихъди сабси, Къанун адайиш, узуз, гунагь фу вуш, аьгъю хьибдайзуз. Эгер Къанунди, «жараринуб ккун мапӀан», кӀурадайиш, узуз, лайикь даруб ккун мабхьан, фу кӀуру гаф вуйишра, аьгъю хьибдайзуз.

⁸ Гунгьи, гьаму табшуругъ багьна вуди, узук лайикь дару тямягьар каунзук. Къанун адайиш, гунагьра шулдайи.

⁹ Узу Къанун аьгъдарди яшамиш шулайза, хъа Къанундин табшуругъар узуз аьгъю гъахьиган, гунагьра арайиз удубчӀвну,

¹⁰ ва узура гъакӀну. Гьаци узуз уьмур дубхну ккуни табшуругъну, узуз аьжал гъабхну.

¹¹ Фицики гунгьи, гьаму табшуругъ багьна вуди, узу алдатмиш дапӀну, гъакӀунзу.

¹² Гьаци вуйиган, Къанун гирами ву, дидин табшуругъарра гирамидар, гьякь вуйидар ва ужудар ву.

¹³ Му ужубди узуз аьжал гъабхну. Гьаци вуйин? ИкибаштӀан, ваъ! Гунгьи, узуз аьжал хьпан бадали, ужуб мутму ишлетмиш гъапӀну. Гьамци апӀури, гунгьи чан ляхин гъапӀну. Табшуругъну гунагь гизаф пис шейъ вуйиб улупура.

АйитӀ айи дявдикан

¹⁴ Ухьуз Къанун рюгьнануб вуйиб аьгъяхьуз, хъа узу, беден ади, гунгьиз лукӀди тувнади гъахьунзу.

¹⁵ Узу гьапӀраш, узуз аьгъдарзуз, яна узуз ккуниб апӀурадарза, хъа узуз даккниб апӀураза.

¹⁶ Эгер узу узуз даккниб апӀураш, Къанун ужуб вуйивал кьабул апӀураза.

¹⁷ Дугъриди гъапиш, мици апӀурайир узу дарза, хъа узуъ яшамиш шулайи гунагь ву.

¹⁸ Узуъ, йиз гунагькар бедендиъ, ужʼвал яшамиш шули адрувал аьгъязуз. Ужудар ляхнар апӀуз ккунди шулзуз, хъа дицдар ляхнар апӀурадарза.

¹⁹ Фицики узу узуз ккуни ужʼвал апӀурадарза, дидин ерина узуз даккни чӀуру ляхнар апӀураза.

²⁰ Узуз даккни ляхнар узу апӀруган, дугъридан гъилигиш, дурар апӀурайир узу дарза, хъа узуъ яшамиш шулайи гунагь ву.

²¹ Гьаци вуйиган, гьамциб ляхин ачухъ гъабхьунзуз: гьарган, узуз ужʼвал апӀуз ккун гъабхьиган, хилʼан удубчӀвруб писвал вуйиз.

²² Йиз айтӀан пай Аллагьдин Къанундиин шад ву

²³ Йиз жандиъ жара къайда рябкъюразуз. Му къайдайи йиз фагьмин къайдайихъди дяви гъабхура. Йиз жандиъ айи гунагь къайдайи узу чан йисирвализ дисура.

²⁴ Гьей касиб узу! Шли узу, узуз аьжал хру, гьамциб бедендихьан уьрхиди?

²⁵ Ихь Агъа Иса Месигьдилантина ухьу уьрхру Аллагьдиз баркаллагь! Гьаддиз, узу сар вуди, йиз фагьум Аллагьдин Къанундин гъуллугънаъ а, хъа йиз беден гунагьнан гъуллугънаъ а.