Рим агьларихьна вуйи кагъаз 4 - Гирами Китаб

Ибрагьимдикан

¹ Ихь абйирин аба Ибрагьимдикан фу пухьа?

² Эгер Аллагьди Ибрагьим чав апӀурайи ужудар ляхнариз дилигну гьякь гъапӀнуш, дугъхьан инсанарин улихь фурс апӀуз шуйи, хъа Аллагьдин улихь – ваъ.

³ Гирами китабариъ дупнаки: «Ибрагьим Аллагьдихъ хъугънийи, ва, чан хъугъувализ дилигну, Аллагьди думу гьякь гъапӀну».

⁴ Лихурайидариз пул пешкеш вуди туврадар, думу ляхниъ гъазанмиш гъапӀуб ву.

⁵ Хъа эгер адми чан ляхнарихъ хътругъди, гьеле чӀуру касра гьякь апӀру Аллагьдихъ хъугъруш, чан хъугъувализ дилигну, Аллагьди думу гьякь апӀиди.

⁶ Гьаци Давудрира гъапну: адмийин ляхнариз дилигди, хъа хъугъувализ дилигну, Аллагьди гьякь апӀурайи кас бахтавар ву.

⁷ «Бахтаврар ву законсуз ляхнарилан хил алдабгъну, гунгьар ккерку касар.

⁸ Бахтавар ву Агъайи гунгьар гьисабназ гъададагъу кас».

⁹ Му бахтаварвал суннат дапӀнайидаризтӀан дарин, дарш? Хъа дапӀнадрудариз? Ухьу гъурхунхьаки: «Ибрагьимдин хъугъувализ дилигну, Аллагьди думу гьякь гъапӀну».

¹⁰ Фила думу гьякь гъапӀну? Дугъан суннат апӀайиз, даршиш апӀбалан кьяляхъ? ИкибаштӀан, апӀайиз!

¹¹ Ибрагьимдин суннат, суннат апӀайиз улихьна айи чан хъугъувализ дилигну, Аллагьдин улихь гьякь хьувалин лишан вуди хъасин гъапӀну. Ва гьаддиз Ибрагьим, гьеле суннат дапӀну адарди, хъугънайидаринра кмиди аба гъахьну. Дурарра, чпин хъугъувализ дилигну, Аллагьди гьякь гъапӀну.

¹² Ибрагьим гьацира суннат дапӀнайидаринра аба ву. Дурари неинки суннат, хъа гьацира, ихь аба Ибрагьимдиси, чан суннат апӀайиз улихьна айи хъугъувалра кьабул дапӀна.

Хъугъувализ дилигну, Аллагьди туврайи гаф

¹³ Ибрагьимдиз ва дугъан наслариз вари дюнʼя ирсди тувди, кӀури, Аллагьди туву гаф дугъаз Къанундиланмина тувуб дайи, хъа чан хъугъувализ дилигну, гьякь хьувалиинди гъурубкьу гаф вуйи.

¹⁴ Адмийириз, Къанундиз мютӀюгъ хьузди, Аллагьдин гаф рубкьуйиш, хъугъувализна Ибрагьимдиз туву гафназ айиб гьич саб кьиматра хьибдайи.

¹⁵ Фицики тамам дарапӀру Къанунди Аллагьдик хъял капӀру, хъа Къанун адрушваъ думу чӀюбгъюзра шулдар.

¹⁶ Гьаци вуйиган, адмийириз Аллагьдин гаф чпин хъугъувализ дилигну рубкьура. Му Дугъан рягьимлувалин багъиш ву. Гьаддиз думу неинки Къанундиинди яшамиш шулайидариз, хъа гьацира хъугъувалиинди яшамиш шулайи Ибрагьимдин вари наслариз кайиб ву. Хъа Ибрагьим ихь варидарин аба ву.

¹⁷ Гирами китабариъ аки: «Узу увкан гизаф миллетарин аба гъапӀунза». Му Аллагьдин улихь гьякь ву. Ибрагьим гъийихдариз уьмур тувру, хьуз ккайиб вари хьуз гъитру Аллагьдихъ хъугънийи.

¹⁸ Ибрагьимдиз гьич саб чара имдайи, хъа думу, Аллагьдихъ хъугъну, миж кади гъузнийи. Гьаддиз Аллагьдин гьаму гафариинди: «Яв наслар лап гизаф хьиди», – дугъкан вари халкьарин аба гъахьнийи.

¹⁹ Варж йис яшнан чан бедендик хай кимдруб аьгъяшра, хъа Сара бицӀидар шлур дайишра, Ибрагьимдин хъугъувал зяиф гъабхьундар.

²⁰ Думу Аллагьдин гафниин шаклу гъахьундайи, хътругъри гъузундайи. Хъа думу, Аллагьдин тяриф апӀури, ижмиди хъугъну гъузнийи.

²¹ Думу Аллагь Чав туву гаф тамам апӀуз Удукьрур вуйибдихъ хъугънайи.

²² Гьаддиз Аллагьди Ибрагьим гьякь гъапӀнийи.

²³ Гирами китабариъ сар дугъкан: «Гьаддиз Ибрагьим гьякь гъапӀнийи», – кӀури дупнадар,

²⁴ хъа ухьу бадали дупна. Ихь Агъа Иса Месигь чӀиви ГъапӀурихъ хъугъруш, ухьура гьякь апӀиди.

²⁵ Думу ихь гунгьарихъанди гъакӀну ва, Аллагьдин улихь ухьу гьякь апӀбан бадали, Думу чӀиви гъахьну.