Рим агьларихьна вуйи кагъаз 2 - Гирами Китаб

Аллагьдин суд

¹ Эгер уву гьамцдар касарик тахсир кипраш, увлан хил алдабгъуб адар; эгер уву сар шлик-вуш тахсир кипраш, уву яв увук тахсир киправа. Жарар тахсиркар апӀурайири, увура тахсиркри апӀруб апӀурава.

² Ухьуз аьгъяхьуз, аьхир, гьамцдар апӀрударик Аллагьди, Чан гьякьʼвализ дилигну, тахсир кипди.

³ Гьаци вуйиган, уву, гьамцдар тӀулар апӀрур тахсиркар апӀурайир, гьеле гьацдар увура апӀурайир, Аллагьдин суддиккан ккутӀурччвидиза кӀури, фикир апӀурана?

⁴ Ясана уву Дугъан зурба вуйи гьюрмат, сабур ва аьгь апӀувал гьаци улʼан идипнана, дарш, ва увуз вуйи Дугъан гьюрмат, уву яв тӀулариин швумал хьуз вуйибдин гъавриъ адарна?

⁵ Уву инкар ва утӀукьнайир вува, яв гунгьар кӀулʼин гъадагъурадарва ва, гьамдиинди, Аллагьди Чан хъял улупру йигъаз Аллагьдин хъял увʼина артухъ апӀурава; хъа халкьдиз Дугъан гьякь вуйи суд рябкъиди.

⁶ Аллагьди гьардиз чав гъапӀубдиз тувди.

⁷ Гьаммишан ужувлар апӀури, аднахъ, гьюрматнахъ ва аьжалсузвалихъ хъергнайидариз Дугъу гьаргандин уьмур пешкеш апӀиди.

⁸ Хъа учвтӀан аьгъдруриз, гьякь вуйи рякъюъди гъягъюз даккнириз ва диш дару рякъ кадабгънайириз Аллагьди Чан хъял ва гъизгъинвал улупиди.

⁹ Дугъу абдал тӀулар апӀбаъ тахсиркар вуйи гьарсар касдиз, сифте жугьдариз, хъа имбудариз дердер ва аьзиятар гьаъди.

¹⁰ Хъа ужʼвал апӀру гьарсар касдиз, сифте жугьдариз, хъа имбудариз Дугъу ад, гьюрмат ва мясляаьт гьапӀди.

¹¹ Аллагьди варидарин гьякьди суд апӀуру; майил апӀдар.

¹² Эгер Къанундикан деребхьдари гунагь апӀураш, дурар Къанун адарди йихиди. Хъа Къанун ади гунагь апӀрударин суд Къанундиинди апӀиди.

¹³ Агъайин улихь Къанундикан гъеебхьдар гьякьлу хьидар, хъа Къанундиз мютӀюгъ гъахьидар Агъайи гьякь апӀиди.

¹⁴ (Ва гьаддиз, Къанун адру миллетари чиб-чпиинди, гьеле дурарин Къанун адаршра, чпин кӀваан Къанундиъ айиси апӀураш, дурар чпи ву чпиз закон.

¹⁵ Къанундиъ айиси дюзвал фу вуш ва дюз дарувал фу вуш, дурарин кӀваъ дибикӀна. Дишди апӀруган, дурариз чпин кӀваан аьгъю шула, ва дишди дарапӀруганра, чпин кӀваз аьгъю шула. Дурариз дишди дарапӀувал чпин ягь-намусну улупура ва гьадди дурар тахсиркрар апӀура. Дишди апӀувалра дурариз чпин ягь-намусну улупура ва гьадди дурарин тахсир адрувал улупура).

¹⁶ Гьаму вари, Аллагьди Иса Месигьдилантина узу рабгъурайи Ужувлан хабарнаъ кӀурайиси, инсанарин вари жини ляхнарин суд апӀруган, хьибди.

Аллагьдиндар вуча кӀурайидар ва Къанун

¹⁷ Эгер уву жвув жугьуд вуди гьисаб апӀураш, Къанундихъ йирфар хъирчраш, Аллагьдиинди уву дамагълу вуш,

¹⁸ увуз Дугъан ниятар аьгъяш, Къанундиан дубгъури варитӀан ужуб ва чарасуз лазим вуйиб, аьгъю апӀураш,

¹⁹ ва уву, кур вуйидар диш рякъюъди хъади гъягъюраза, кӀураш, мучӀушнаъ айидариз акв вуза, кӀураш,

²⁰ Къанундиъ гьякь ва аьгъювалар увуз ади, фикир адрудариз ва фукӀа аьгъдрудариз мялим вуза, кӀураш,

²¹ гьаз уву дурар жарадариз улупурава, хъа уву увхъан дудрубгъди? Уву, мигьитӀибкӀанай кӀури, дарсар туврайир, уву гьаз гьитӀибкӀурава?

²² Уву, сарира кьяппавал дапӀну ккундар кӀурайири, гьаз кьяппа тӀулар апӀурава? Уву, идолар гьясбикк ккадариз кӀурайир, мистар тӀараш гьаз апӀурава?

²³ Уву, Къанун азуз кӀури фурсар апӀурайир, Къанун чӀюбгъюри, Аллагь гьаз ужуз апӀурава?

²⁴ Гьаддиз, увлантина Агъайин ччвур аллагьсузари нянайикк ккипна, кӀури, дибикӀна Гирами китабариъ.

²⁵ Эгер уву Къанун тамам апӀуруш, суннат апӀувал мянайи абцӀна, хъа эгер уву Къанун чӀюбгъюраш, суннат апӀувалин гьарсаб мяна дубгра.

²⁶ Эгер суннат дапӀну адрури Къанундиъ айиб вари тамам апӀураш, думу суннат гъапӀурси гьисаб апӀуз хай даршулин?

²⁷ Яв суннат дапӀнайивализ ва увуз дидикӀну тувнайи къайдйириз дилигди, суннат дапӀну адарди, Къанун тамам апӀрури диван апӀидияв, гьаз гъапиш, уву Къанун тамам апӀури гъахьундарва.

²⁸ Зиълан лишнариз дилигну, гьякь жугьуд шлуб дар. Му, бедендин аьдати суннат гъапӀну кӀури, гьякь вуйи суннат дару гьисаб ву.

²⁹ Гьякь вуйи жугьуд чан кӀваантӀан Аллагь ккун апӀурайир ву. Му, дерккнайи аьдатариинди ваъ, хъа кӀваантӀан, рюгьналан вуйи гьякь суннатдик гьисаб ву. Ва гьамцир касдин апӀурайи тяриф адмийирихьан дар, хъа Аллагьдихьан ву.