Паччагьлугъар-4 4 - Гирами Китаб

Элиш пайгъамбар ва касиб ачӀни хпир

¹ Пайгъамбрарихь урхури гъахьидарикан сарин хпири Элиш пайгъамбриз гьарйир гъапӀнийи: – Яв гъараваш, йиз жилир, кечмиш гъахьну, ва дугъу РАББИЙИЗ гьюрмат апӀури хьувал увуз аьгъявуз. Хъа гьамус дугъак бурж кайир, йиз кьюрид баярра лукӀʼвализ гъахбан бадали, дуфна.

² Элиш пайгъамбри дугъаз жаваб тувнийи: – Увуз фици кюмек апӀуза? Йип узуз, яв хулаъ фу аяв? – Яв гъараваш-дишагьлийин фукӀа адар, – гъапнийи дугъу, – анжагъ саб бети зейтундин ччим.

³ Элиш пайгъамбри дугъаз гъапнийи: – Гъарах ва яв гъуншйирихьан ичӀи бетйир ккун апӀин, дурар шлубкьан гизаф уч апӀин.

⁴ Хъасин яв ва яв баярин кьяляхъди раккин хъябкь. Бетйириъ ччим убз ва ацӀу бетйир гъирагъдизди гьадагъ.

⁵ Дишагьли гъушнийи, ва чан ва чан баярин кьяляхъди раккин хъябкьнийи. Баяри бетйир хуйи, хъа дугъу чан хулаъ айи бетдиан ччим убзуйи.

⁶ Вари бетйир аццну ккудуркӀиган, дугъу бализ гъапнийи: – Ча узухьна сабсан бети. Хъа бали жаваб тувнийи: – Сарун саб бетира имдар. Ва ччим рубзувал дийибгънийи.

⁷ АчӀни хпири, душну, Заанурин инсандиз дидкан ктибтнийи, хъа дугъу гъапнийи: – Гъарах, ччим масу тув ва буржар кидирч, хъа гъубзубдихъ увхьанна яв баярихьан яшамиш хьуз хьидичвухьан.

Элиш пайгъамбар ва девлетлу дишагьли

⁸ Саб ражари Элиш пайгъамбар Шунем гъулаз гъушнийи. Душваъ сар девлетлу дишагьли яшамиш шулайи, дугъу Элиш пайгъамбриз чпихьна уьл ипӀуз теклиф апӀуйи. Ва гьар ражну душвхьантина гъягъруган, думу душваъ уьл ипӀуз дергуйи.

⁹ Дишагьлийи жилириз гъапнийи: – Узуз аьгъязуз, ухьухьна кми-кмиди гъюру кас Заанурин гирами инсан ву.

¹⁰ Гъач гъваин бицӀи хал тикмиш апӀухьа ва душваъ дугъаз ахин-леэф, тахта, кусри ва чирагъ дивхьа. Дици гъабхьиш, ухьухьна гъафиган, дугъхьан гьар ражну душваъ гъузуз хьибди.

¹¹ Саб ражари Элиш пайгъамбар, думу гъулаз гъафиган, думу хулаз за гъахьнийи ва дахънийи.

¹² Хъасин чан гъараваш Гиезийиз гъапнийи: – Дих апӀин гьадму дишагьлийиз. Гиезийи дишагьлийиз дих гъапӀнийи, ва думу дугъахьна гъафнийи.

¹³ Элиш пайгъамбри чан гъаравашдиз гъапнийи: – Дугъаз йип: «Учу бадали гизаф чалишмиш гъахьунва. Фу ужʼвал апӀуча увуз? Белки, уву бадали паччагьдин ясана кьушмин аьхюрин улихь гаф пуча?» Дишагьлийи жаваб тувнийи: – Лазим дар, узу йиз халкьдин арайиъ яшамиш шулаза.

¹⁴ – Дугъаз фу ужʼвал апӀидийкӀан? – гьерхнийи Элиш пайгъамбри. Гиезийи гъапнийи: – Хъа магьа, дугъахъ бай хътар, хъа жилир сарун кьабир ву.

¹⁵ Думуган Элиш пайгъамбри гъапнийи: – Дих апӀин дугъаз. Гъаравашди дугъаз дих гъапӀнийи, ва думу раккнаригъ дийигънийи.

¹⁶ – Гъюру йисан гьаму вахтна, – гъапнийи Элиш пайгъамбри, – уву хилариин яв бай дисидива. – Ваъ, йиз агъа, – жаваб тувнийи дугъу, – яв гъараваш дишагьлийиз кучӀлар мапӀан, Заанурин инсан!

¹⁷ Хъа магьа, думу дишагьлийик бицӀир киршнийи, ва дугъаз хъайисан, гьадму вахтна, бай гъахьнийи. Элиш пайгъамбри гъапиганси.

Шунем гъулʼан вуйи дишагьлийин бай чӀиви хьувал

¹⁸ Шунем гъулʼан вуйи дишагьлийин бай аьхю гъахьнийи. Саб ражну думу иган убгурайидарихъди хъайи адашдихьна гъафнийи.

¹⁹ – Ая кӀул! Ая кӀул! – гъапнийи дугъу адашдиз. Адашди гъаравашдиз амур гъапӀнийи: – Думу дадайихьна гъайих.

²⁰ Гъаравашди бай хилариина за гъапӀнийи ва дадайихьна гъурхнийи. БицӀир дадайин кьамкьариин лисузкьан деънийи, хъасин кечмиш гъахьнийи.

²¹ Дадайи думу за гъапӀнийи ва Заанурин инсандин ахниин дитнийи, раккин хъябкьнийи ва удучӀвнийи.

²² Хъасин дугъу чан жилириз дих гъапӀнийи ва гъапнийи: – Ккун апӀурза, узу Заанурин инсандихьна чкиди гъягъбан ва кьяляхъ гъюбан бадали, узухьна гъаравашарикан сар ва дажи гьаъ.

²³ – Дугъахьна гъи гъягъюб гьаз ву? – гьерхнийи дугъан жилири. – Гъи я Цийивазлин машквар, я султ йигъ дар. – Вари ужуйи хьибди, – жаваб тувнийи хпири.

²⁴ Дишагьлийи даждиин хъюрар иливнийи ва гъаравашдиз гъапнийи: – Хъади гъарах. Узу пайизкьан мидийигъан.

²⁵ Дурар рякъюъ учӀвнийи ва Заанурин инсандихьна Кармил дагъдиина гъафнийи. Дишагьли ярхла имидитӀан дяркъну, Заанурин инсанди чан гъараваш Гиезийиз гъапнийи: – Лиг! Гьатму Шунем гъулʼан вуйи дишагьли ву!

²⁶ Дугъаз гъаншарди жаргъ ва дугъхьан гьерх: «Уву сагъ вува? Яв жилир сагъ вуйин? Яв бицӀир сагъ вуйин?» – Сагъ ву, – жаваб тувнийи дишагьлийи.

²⁷ Хъа дишагьли Заанурин инсандихьна дагъдиина гъафиган, дугъу Элиш пайгъамбрин ликар хабаъ аънийи. Гиезий, думу гьутӀуркӀбан бадали багахьна гъафнийи, амма Заанурин инсанди гъапнийи: – Гъит думу! Дугъак аьхю дерд ка, амма РАББИЙИ думу ляхин узхьан жин гъапӀну ва узукна гъапундар.

²⁸ – Узу увкан бай ккун гъапӀнийинхъа, йиз агъа? – гъапнийи дишагьлийи. – Узу увуз «Узу умуд кивуз мигъитан» гъапундайинхъа?

²⁹ Элиш пайгъамбри Гиезийиз гъапнийи: – Чухайин канчӀар чӀуликк ккитӀишв ва хлиз йиз гьяса гъадабгъ ва жаргъ. ФужкӀа алахъиш, салам мутуван, ва, шликӀа увуз салам тувиш, магъадабгъан. БицӀир айи хулаз хъуркьиган, йиз гьяса балин машниин див.

³⁰ Хъа бицӀирин дадайи гъапнийи: – РАББИЙИИНДИ ва увʼинди ху апӀурза, узу увхъан хътаркидарза. Думуган Элиш пайгъамбар гъудужвнийи ва дугъахъди гъушнийи.

³¹ Гиезий улихьди гъушнийи, ва дугъу балин машниин гьяса дивнийи, амма гьич сескьан гъабхьундайи. Гиезий Элиш пайгъамбрин улихьна гъафнийи ва дугъаз гъапнийи: – Бай уягъ гъахьундар.

³² Думуган Элиш пайгъамбар хулаз гъафнийи, бай дугъан ахниин дукӀну дахънайи.

³³ Думу хулазди учӀвнийи, чан кьяляхъди раккин хъябкьнийи ва РАББИЙИЗ ккарагнийи.

³⁴ Хъасин думу ахниина за гъахьнийи ва балʼин дахънийи – ушвник ушв, уларик улар, хиларик хилар куркӀри. Думу балʼин гьачӀарккиган, балин жандак мани гъабхьнийи.

³⁵ Элиш пайгъамбар улдучӀвнийи, хулаъ улихь-кьяляхъ гъилицнийи ва, ахниина за духьну, балʼин сабсан ражну гьачӀарккнийи. Бали ургубан инчи гъапӀнийи ва улар арццнийи.

³⁶ Элиш пайгъамбри Гиезийиз дих гъапӀнийи ва гъапнийи: – Дишагьлийиз дих апӀин. Гъаравашди гьаци гъапӀнийи. Дишагьли гъафиган, Элиш пайгъамбри гъапнийи: – Гъадагъ яв бай.

³⁷ Думу хулазди учӀвнийи, Элиш пайгъамбрин ликарикк дахънийи ва жилиинакьан икрам гъапӀнийи. Хъасин думу, чан бай гъадагъну, гъушнийи.

Агъу кайи жук

³⁸ Хъа Элиш пайгъамбар Гилгализ кьяляхъ гъафнийи. Думу вилаятдиъ думуган гаш абхънайи. Пайгъамбрарихь урхурайидари думу къаршуламиш гъапӀиган, дугъу гъаравашдиз гъапнийи: – Зурба йигьаг илив ва гьаму инсанариз жук убхь.

³⁹ Дурарикан сар итӀру укӀар уч апӀуз хутӀлиз гъушнийи, ва дугъаз чӀуру гъабгъар гъидихънийи. Дугъу ун абцӀну чӀуру гъабгъар уч гъапӀнийи ва, кьяляхъ гъафиган, саризра дурар фйир вуш аьгъдаршра, жвилли дапӀну, жукук куркнийи.

⁴⁰ Инсанариз жук адабцӀнийи, амма, думу ипӀуз хъюгъюбси, дурари чӀигъар гъапӀнийи: – Заанурин инсан, йигьгиъ аьжал а! – ва дурари жук ипӀувал дебккнийи.

⁴¹ Элиш пайгъамбри гъапнийи: – Хю аьбкъинай. Дугъу хю йигьгиъ абхьнийи ва гъапнийи: – Убз жук инсанариз. Ва йигьгиъ зарар кайиб фукӀа гъубзундайи.

Варж инсан тухъ апӀуб

⁴² Баал-Шалиша шагьриан фуж-вуш сар инсан гъафнийи, ва дугъу Заанурин инсандиз сабпи бегьерин мухан хюйин къаб уьл ва мухан кӀуларин гъварчар гъахнийи. – Тув инсанариз, гъит ипӀри, – гъапнийи Элиш пайгъамбри гъаравашдиз.

⁴³ – Мурарихъди варж инсан фици тухъ апӀузахъа? – гьерхнийи гъаравашди. Хъа Элиш пайгъамбри жаваб тувнийи: – Тув инсанариз, гъит ипӀри. РАББИЙИ гьамци кӀура аьхир: «Дурар тухъ хьиди, ва хъана гъубзидира ву».

⁴⁴ Думуган гъаравашди инсанариз уьлер пай гъапӀнийи. Ва, РАББИЙИН гафнакси, дурари гъипӀнийи, ва хъана гъубзнура вуйи.