Марк 7 - Гирами Китаб

Инсанари деркку аьдатартӀан Аллагьдин законар заан ву

¹ Ерусалимдиан Исайихьна саб кьадар фарисйирна къанунчйир гъюру.

² Дурариз ученикарикан сари дижрикӀу хиларихьди ипӀури гъябкънийи.

³ Хъа фарисйиринра, вари жугьдаринси, чпин абйириланмина гъубзнайи хъуршлихънакьан хилар дижрикӀди уьлихъ дедреъру аьдат айи.

⁴ Базариан гъафидари сабан хилар дижрикӀкьан гагьди уьл ипӀдар. Гьамцдар хъана гизаф аьдатар дурари уьрхюйи, мисалназ, захар, гажнар ва йифрин гъаб-гъажагъ жикӀбан аьдатар.

⁵ Фарисйирина къанунчйири Исайихьан гьерхру: – Яв ученикари абйирин аьдатар гьаз хъаърадар? Хилар дижрикӀди уьл ипӀура.

⁶ Хъа Дугъу дурариз жаваб тувру: – Гирами китабариъ Ишая пайгъамбри учвкан, кьюб маш гъяйидарикан, ужуди гъапну: «Гьаму адмийири Узуз гьюрмат ушвниинди апӀура, хъа дурарин юкӀвар Узхьан ярхла ву.

⁷ Давди дурари Узуз икрам апӀура, фицики дурари инсанарин аьдатар уьрхюз улупура».

⁸ Учву адмийири ктагъу къайдйирихъан хъичӀихначва, хъа Аллагьдин табшуругъар тина апӀурачва.

⁹ Учву гьисаб апӀурашалчва: ичв къайдйир тамам апӀбан бадали Аллагьдин табшуругъар батӀул апӀуб фагьумлу ляхин вуйич, кӀури! – давам апӀуру Исайи.

¹⁰ – Магьа мисал. Мусайи гъапну: «Адашдизна дадайиз гьюрмат апӀинай» ва «адашдизна дадайиз люкьнар апӀрур аьжализ лайикь ву».

¹¹ Хъа учву фу кӀури шулчва? Эгер сари чан дадайиз вая адашдиз «Узу увуз буржлу вуйиб Аллагьдиз гъурбан гъапӀунза», гъапиш,

¹² дугъхьан сарун чан адашдизна дадайиз кюмек дарапӀрира гъузуз шулу, кӀурачва.

¹³ Гьамци учву Аллагьдин гаф ичв аьдатназ илтӀибкӀунчва ва наслариз гьаци ктибтурачва. Гьаму мисалназ ухшар гизаф чӀуру ляхнар апӀури шулучва.

¹⁴ Исайи, хъана Чахьна халкьдиз дих дапӀну, кӀуру: – Вари узухъ хъебехъай ва гъаври йихьай.

¹⁵ Инсандиъ чӀатан убчӀвру гьич сабдихьанра думу чиркин апӀуз даршул. Инсандиан удубчӀвруб – магьа думу чиркин апӀруб. [

¹⁶ ]

¹⁷ Думу, халкь гъитну, хулаз гъафиган, ученикари Дугъхьан гьадму гафарин мяна ачухъ апӀуб ккун апӀуру.

¹⁸ Дугъу дурариз ктибтуру: – Учву гьамдин гъавриъ ахъраданчва? Инсандиъ чӀатан убчӀвру гьич сабдира думу чиркин дарапӀрайивал рябкъюраданчвуз?

¹⁹ Фицики думу адмийин кӀваз гъябгъюрадар, хъа – фуниз, ва хъасин удубчӀвуру (Гьамдиинди Дугъу ипӀруб вари марцциб вуйивал улупура).

²⁰ Инсандиан удучӀврудари, – кӀуру Исайи, – думу чиркин апӀуру.

^21-22 «Самбал алдапӀувалар», яна хилʼан адахъувалар, тӀафалвалар, йивну йикӀувалар, кьяппавалар, тямягькарвалар, угърашʼвалар, инсафсузвалар, машнаъ ягь адрувалар, гъанихвал ва хъял, футна, фурс, ахмакьвалар – гьамрарихъна хру пис фикрар инсандин кӀваан удучӀвуру.

²³ Гьаму вари писвалар инсандин айтӀан удучӀвуру ва дурари инсан чиркин апӀуру.

Исайи жугьуд даруриз кюмек апӀура

²⁴ Гьадму йишвар дирчну, Иса Тир юрднан жилариина гъягъюру. Душваъ Думу садар хулариъ дергру. Дугъаз мидкан гьич саризра аьгъю дубхьну ккундайи, аммаки гьитӀибкӀну гъибтуз гъабхьундайи.

²⁵ Исайикан чиркин рюгь убчӀвнайи сар шуран дадайиз аьгъю шулу. Думу дишла Дугъахьна гъюру ва ликарикк, икрам апӀури, ккархьру.

²⁶ Хъа думу дишагьли жугьуд дайи, думу Сирофиникияйин миллетдикан вуйи. Дугъу Исайикан чан шурʼан жин утӀубккуб тӀалаб апӀурайи.

²⁷ Исайи гъапи: – Сифте баяр-шубар ацӀри. Дурарихьан тадабгъну, уьл хуйириз ккипуз хай даршул.

²⁸ Хъа дишагьлийи кӀуру: – Йиз Агъа, хуйирира баяр-шубари тадахьу уьлин урклар итӀуру, аьхир.

²⁹ – Яв гьамциб жавабназ лигну увхьан мясляаьтниинди хулаз гъягъюз шулвухьан. Яв шурʼан жин удубчӀвну, – кӀуру Исайи.

³⁰ Фу лигурва, хулаз хътаку дишагьлийиз чан риш, сагъ духьну, ахниъ дахънади рякъюру ва жинра дугъʼан удубчӀвна.

Исайи кар сагъ апӀуб

³¹ Тир юрднан жиларилан кьяляхъ хътаку Иса Сидон ва ЙицӀубшагьрин жилариланмина Галилей гьюлихъинди гъюру.

³² Дугъахьна кар ва цӀибтӀан улхуз даршлу сар кас хъади гъюру, дугъʼин хилар иливуб ккун апӀуру.

³³ Исайи думу халкьдихьан гьадауру, дугъан ибариъ Чан тӀубар урччвру, хъасин Чан тӀубарик шуруш кабтӀну, дугъан мелзнак кучру.

³⁴ Хъа завузди дилигну, дериндиз ил хъадабгъну, кӀуру: – Эффата! (яна «Арцц!»)

³⁵ Гьадму сяаьт дугъаз ебхьуз хъюгъру ва дибиснайи мелз либхуз хъюбгъну, дугъан чӀал ачухъ шулу.

³⁶ Исайи дурариз мидкан гьич саризра дарпуб ккун апӀуру. Хъа Дугъу дарпуз гъадагъа апӀбахъ, дурари артухъ рабгъуйи.

³⁷ Адмийири, гизаф аьламат духьну, кӀуйи: – Мугъу вари ужу апӀуру. Мугъу гьеле кардариз ебхьузра гъитру, улхуз даршлудариз чӀалра улупуру!