Марк 5 - Гирами Китаб

Жинар кайир сагъ апӀуб

¹ Дурари гьюлин тмуну гъирагъдихъна Герасин юрдназ сирнав апӀуру.

² Иса люткейиан удучӀвубси, Дугъан гъаншаризди накьваригъ яшамиш шулайи жинар кайи адми утӀурччвуру.

³ Думу сарихьанра дирккуз шуладайи – гьеле зунжрарииндикьан.

⁴ Дугъан хилар-ликар зунжрарихьди швнуб-сабан гъийитӀнийи, аммаки дугъу зунжрар ва гьялкьйир кьатӀар апӀуйи – гьич сарихьанра думу дерккуз шулдайи.

⁵ Зат сикин дарди йигъ-йишв накьварин хьарар-дюрхъяригъ ва гъярар-тепйиригъ дугъу чӀигъар апӀуйи ва учв гъванарикан йивуйи.

⁶ Ярхлаан Иса гъяркъюбси, думу Дугъахьна жаргъну дуфну, икрам апӀури, кьамкьариинди дахъру

⁷ ва аьхю дихниинди кӀуру: – Яв узухъди фу вуяв, ВаритӀанзаанур, Аллагьдин Бай Иса? Аллагьисан, Увуз миннат вуйиз: йиз зегьле мабхан!

⁸ Исайи: «УдубчӀв гьаму адмийиан, чиркин рюгь!» – гъапиган, диди гьаци гъапнийи.

⁹ Хъа Исайи дугъхьан гьерхру: – Ччвур фуж вуяв? – Йиз ччвур кьушум вуйиз, гьаз гъапиш учу гизаф жинар вуча, – жаваб туву дугъу.

¹⁰ Жинар, му юрдариан чпи муутӀурккан кӀури, Исайиз миннат апӀуз хъюгъру.

¹¹ Хъа душвахь таблик силарин аьхю лиж дарабгънайи.

¹² – Учхьан силариъ учӀвуз шлуси, учу гьадраризди гъягъюз гъит, – кӀури, жинари Исайикан тӀалаб апӀуру.

¹³ Дугъу ихтияр тувру. Ва адмийиан удучӀву чиркин рюгьяр силариъ учӀвру. Хъа силарин лиж гъарзарилансина гьюлизди убсру ва ккабхьру. Дурарин кьадар кьюд агъзурихьна вуйи.

¹⁴ Силарин габнари, жаргъну душну, шагьриъ ва гъирагъариъ айи гъулариъ, гъабхьибдикан ктибтуру. Агьлар, фу гъабхьнуш, лигуз гъюру.

¹⁵ Дурар Исайихьна гъюру ва, фу лигурва: кьушумкьан жинар кади гъашир, палтар алди, чан фикрихъ хъади деъна. Дурарик гучӀ кабхъру.

¹⁶ Му аьламат гъябкъдари дурариз, жинар кайирикан ва силарикан фу гъабхьнуш, ктибтнийи.

¹⁷ Гьадмуган Исайикан дурари, чпин юрдариан удучӀвну гъягъюб, ккун апӀуру.

¹⁸ Иса люткейиъ эърайиган, чакан жинар ктӀурккури учвра гъадагъуб ккун апӀуру.

¹⁹ Хъа Дугъу ихтияр тувундайи. – Хулаз гъарах явдарихьна. Аллагьди фици яв язухъ гъизигнуш ва Дугъу увуз гъапӀубдикан дурариз кидибт, – кӀуру Исайи.

²⁰ Думу гъягъюру ва ЙицӀубшагьрин юрднан агьлариз Исайи чакан гьапӀнуш, ктибтуру – вари аьламат гъахьнийи.

Ягьирин риш чӀиви ва иццрур сагъ апӀуб

²¹ Исайи хъана гьамуну гъирагъдихъна сирнав гъапӀиган, Дугълан аьхючӀвеъ адмийир илтӀишнийи. Иса гъирагъдихъ гъузнайи.

²² Дугъахьна жугьдарин мистан аьхюр, Ягьир кӀурур, гъюру. Иса гъяркъюбси, думу Дугъан ликарикк икрамназ дахъру

²³ ва, Дугъкан миннат апӀури, кӀуру: – Йиз риш йикӀура. Миннат вуйиз, дуфну дугъʼин хилар илив, думу сагъ хьиди, чӀивиди гъузди.

²⁴ Иса дугъахъди гъягъюру. Дугъахъди гизаф халкьра гъябгъюрайи ва юкьуб тереф Думу кьялаъ тӀаънайи.

²⁵ Дураригъди сар дишагьлира гъяйи. ЙицӀикьюд йисандин арайиъ дугъан ифи хътабтӀурадайи.

²⁶ Фукьан хъюгънийишра, гьич сар духтрихьанра думу сагъ апӀуз гъабхьундайи. Дугъу чаз айи-адруб вари харж гъапӀнушра, дугъаз кюмек гъабхьундайи, хъа гьял айибтӀан пис гъабхьнийи.

²⁷ Дугъаз Исайикан гъеебхьиган, думу гужназ адмийиригъ гъючӀву ва, Исайин кьялхъянди дуфну, Дугъан ккурттарик куркӀу,

²⁸ фицики дугъу фикир дапӀнайи: «Эгер узу Мугъан ккурттарик саб тикисикьан куркӀиш, сагъ хьидизу».

²⁹ Гьадму сяаьт дугъан ифи хътабтӀуру, ва дугъаз чан вари жан сагъ хьувал гьисс шулу.

³⁰ Исайиз дишла Чаан кьувват удубчӀвуб аьгъю шулу ва, халкьдихьинди илтӀикӀну, гьерхру: – Узук фуж куркӀну?

³¹ – Рябкъюрадарнуз, учӀукьну, халкьди Уву фици хъуржраш, хъа Увук фуж куркӀну кӀури, гьерхрира ава! – кӀуру Дугъаз ученикари.

³² Хъа Дугъу ул алдатбиинди Чак куркӀур агурайи.

³³ ГучӀ дубхьнайи ва гукӀнишин кабхънайи дишагьлийи, чав гъапӀубдин гъавриъ ахъну, халкьдигъян гъюдучӀвну, икрам апӀури, Исайин ликарикк ккархьну, вари вуйибси ктибтуру.

³⁴ Дугъу дишагьлийиз кӀуру: – Йиз риш, уву яв хъугъвали сагъ гъапӀунву. Архаин духьну гъарах, ва сагъвалиъ хьидива.

³⁵ Исайи му гафар кӀурамиди, мистан аьхюр вуйи Ягьирин хулʼан адмийир дуфну кӀуру: – Яв риш гъакӀну. Мялим инжик мапӀан!

³⁶ Хъа Исайи дурарин гафариз фикир тутрувди, мистан аьхюриз кӀуру: – ГучӀ мапӀан, анжагъ хъугъну гъуз!

³⁷ Дугъу Петризна, Якьубдизна, Якьубдин чве ЮгьандизтӀан ктарди, сарун саризра Чахъди гъюз ихтияр тувундайи.

³⁸ Дурар мистан аьхюрин хулаъ учӀвру. Исайиз, душваъ гъалабулугъ ади, яманди ишурайидар ва ишлар апӀурайидар рякъюру.

³⁹ – Учву гьаз дерд зигурачва, – кӀуру учӀву Исайи. – Риш дукӀнадар, хъа даахна.

⁴⁰ Дурар Дугъʼин аьлхъюз хъюгъру. Хъа Дугъу дурар вари адауру. Чахъди Чан ученикарна шуран адашна дада гъадагъну, риш дитнайи хулаъ учӀвру.

⁴¹ Шуран хил дибисну, Дугъу дугъаз кӀуру: – Талифа, куми! (яна «Риш, увуз кӀураза, гъудужв!»)

⁴² Риш дишла гъудужвуру ва гъягъюз хъюгъру. Дугъан йицӀикьюд йискьан вуйи. Вари гъах гъахьнийи.

⁴³ Исайи мидкан саризра дарпуб ижмишнаан ккун апӀуру ва, шураз ипӀруб тувай, кӀуру.