Марк 2 - Гирами Китаб

Паралич кайир сагъ апӀуб

¹ Сакьюдар йигъарилан Иса Кафернагьумдиз кьяляхъ гъюру. Думу хулаъ а, кӀури, хабар абхъру.

² Дина гьадмукьан халкь уч шулуки, гьеле урчӀарихъкьан йишв бихъури гъабхьундар. Дугъу дурариз аьгъювалар улупуйи.

³ Саб кьадар адмийир Дугъахьна гъюру, дурарикан юкьури паралич кайир хурайи.

⁴ Аммаки дурарихьан халкьдигъянмина Исайихьна рукьуз шуладайи. Гьадмуган дурари хулан гъваъ алдабгъну, паралич кайир дахънайи ахин Думу хьайи йишвахьинди ибхру.

⁵ Дурарин хъугъвал гъябкъю Исайи иццурайириз кӀуру: – Йиз бай, яв гунгьарилан хил алдабгъураза!

⁶ Мушваъ сакьюдар къанунчйир деънайи. Дурари чиб-чпикди фикир гъапӀу:

⁷ – Му Касди гьаз мици кӀура? Думу Аллагьдиз къаршуди улхура! Сар Аллагьдилан гъайри сарун шлихьан гунгьарилан хил алдабгъуз шул?

⁸ Хъа Исайи, Чан Рюгьнахьди дишла дурарин кӀван фикрар аьгъю дапӀну, кӀуру: – Гьаз дицдар фикрар ичв юкӀвариъ тӀаърачва?

⁹ Паралич кайириз фу пуб рягьятди ву: «Яв гунгьарилан хил алдабгъураза», даршиш: «Гъудужв, яв ахин гъадабгъ ва гъарах?»

¹⁰ Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай – пну, Дугъу паралич кайириз:

¹¹ – Гъудужв кӀуразавуз, гъадабгъну яв ахин, яв хулаз гъарах, – кӀуру.

¹² Думу дишла гъудужвуру ва, гъадабгъну чан ахин, варидарин улхьантина гьудучӀвну гъягъюру. Халкьди, гучӀбаан зегьле дубшну, Аллагьдин тярифар апӀури, гьамци кӀуру: – Учуз гьич зат мидиз ухшар аьламат гъябкъюб дарчуз!

¹³ Иса хъана гьюлихъна удучӀвуру, вари халкь Дугъахьна гъюру, ва Дугъу дурариз аьгъювалар улупуру.

¹⁴ Саб йишвхьантина гъягъюрайиган, Дугъаз налукар уч апӀрушвʼин деънайи Алфейин бай Левий кӀуру кас рякъюру ва дугъаз кӀуру: – Узухъди гъач! Думу, гъудужвну, Исайихъди гъягъюру.

¹⁵ Саб ражари Исайи Левийин хулаъ лисун апӀурайи. Исайихъдина Чан ученикарихъди налукар уч апӀрудари ва хъана гизаф гунагькрари уьл ипӀурайи, дурар гьаци Исайихъди хъахънайидар гизаф вуйи.

¹⁶ Фарисйирикан вуйи къанунчйири, Думу гунагькрарихъди ва налукар уч апӀрударихъди уьл ипӀури дяркъну, Дугъан ученикариз кӀуру: – Мугъу налукар уч апӀрударихъдина гунагькрарихъди гьаз уьл ипӀура?

¹⁷ Му гъеебхьган, Исайи кӀуру: – Духтир сагъидариз ваъ, хъа аьзарлуйириз лазим ву. Узу марцци касар дюз рякъюз хуз дуфнайир дарза, хъа гунагькрар.

Ушвар дисбакан гьюжат

¹⁸ Гьадму вахтна Ягьʼяйинна фарисйирин ученикари ушвар дисурайи. Сакьюдар адмийири Исайихьна дуфну, гьерхру: – Ягьʼяйин ученикарина фарисйири ушвар дисури шулу, хъа Яв ученикари гьаз ушвар дисурадар?

¹⁹ Исайи дурариз кӀуру: – Сумчрин хялари, швушв хурайир чпихъди хъимбукьан гагьди, ушвар дисдар!

²⁰ Хъа дурарихьан швушв хурайир гужназ гъадагъру вахт гъибди, хъа гьадму йигъан дурари ушвар дисиди.

²¹ Гьич сарира йирси палатдик цӀийи парчайикан кадабтӀну цӀил ктривур, даршиш цӀилну, палатдиз зигури, урхъ хъана аьхю апӀиди.

²² Гьич сарира таза чяхир йирси иржариъ удрубзур, даршиш таза чяхри иржар гьутӀурччвиди, чяхирра удубзиди, иржарра пуч хьиди. Таза чяхир цӀийи иржариъ убзру.

Султ йигъкан

²³ Султ йигъан Исайиз дяхин дубзнайи хутӀлариантина гъягъюб алабхъуру. Гьадмуган Дугъан ученикари дяхнин кӀулар улдутӀуз хъюгъру.

²⁴ Гьаци гъябкъю фарисйири Исайиз кӀуру: – Лиг, гьаз мурари султ йигъан Къанунди гъадагъа дапӀнайи ляхин апӀура?

²⁵ Дугъу дурариз жаваб туву: – Мегер учву, Давудри, чаз ва чахъди хъайидариз гаш гъабшиган, гьапӀнуш Гирами китабариан гъурхундаринчва?

²⁶ Авиафар кӀуру аьхю маллайин девриъ думу Аллагьдин хулаъ учӀвну, маллйирилан гъайри шликӀа итӀуз ихтияр адру, Аллагьдиз бахш дапӀнайи уьлер гъадагъну итӀбакан ва чахъ хъайидаризра тувбакан аьгъдаринчвуз?

²⁷ Исайи давам апӀуру: – Султ йигъ адмийиз дапӀнайиб ву, хъа султ йигъаз адми – ваъ.

²⁸ Гьаци вуйиган, Инсаниятдин Бай султ йигъʼинра Агъа ву.