Марк 14 - Гирами Китаб

Иса йикӀбан ниятар

¹ Кьюд йигълан Пасха ва ЛичӀван лавшарин машкврар улукьурайи. Аьхю маллйирина къанунчйири Иса дидисну йикӀуз чарйир агурайи.

² «Хъа анжагъ машквар йигъан ваъ, – кӀуйи дурари, – даршиш халкьдин арайиъ гъалабулугъ абхъди».

³ Думу Вифания гъулаъ хамран аьзар кади гъахьи Шимондин хулаъ гештнаъ айиган, душваъ, лизи ругдин бетисибдиъди, нард гьарин багьа марцци ягъ хьади, сар дишагьли учӀвру, ва дугъу дидиъ айи ицци ниъ хъайи ягъ Исайин кӀулʼин улубзуру.

⁴ Душваъ айи хяларикан сакьюдари наразиди чиб-чпикди гьамци кӀуйи:

⁵ – Гьамкьан ицци ниъ хъайи ягъ мугъу гьаз чӀур гъапӀу? Гьаму ччим шубудварж динар пулихъ масу тувну, хъа гьадму пул касибариз пай апӀуз шуйи, аьхир! Дурари дишагьлийиз люкьнар апӀуз хъюгъю,

⁶ хъа Исайи кӀуру: – Думу сикинди гъитай! Фу кӀури учву дугъак кудукьначва? Узуз дугъу ужуб ляхин гъапӀну!

⁷ Касибар гьарган учвухъди хьиди, ва учвхьан дурариз кюмекар апӀуз хьибдичвухьан, хъа Узу учвухъди гьарган хьидарза.

⁸ Дугъу чахьан шлуб гъапӀну: улихьмиди дугъу Йиз жан, ччим кадатну, накьвдиъ ивуз гьязур гъапӀну.

⁹ Гьякь кӀуразачвуз: дюнʼяйиъ му Ужувлан хабар наан рабгъури гъабшишра, думу кӀваин апӀиди ва дугъу гъапӀубдикан ктибтиди.

Ягьудайи Иса масу тувуб

¹⁰ Гьадмуган ЙицӀикьюрикан сар, Искариот лакӀам хьайи Ягьуда, аьхюну маллйирихьна, Иса масу тувбан бадали, гъягъюру.

¹¹ Ягьудайихъ хъпехъдар шад шулу ва, дици гъабшиш, пул тувуз гаф тувру. Гьаддихъан думу Иса масу тувуз гъулай вахт абгури шулу.

¹² ЛичӀван лавшарин машквран садпи йигъан, пасхайин ччил гъурбан апӀруган, ученикари Исайихьан гьерхру: – Увуз пасхайин хураг учу наан гьязур дапӀну ккундувуз? Йип, гьязур апӀуз гъягъюча.

¹³ Гьадмуган Дугъу, гьамци дупну, кьюр ученик гьаъру: – Шагьриз гъарахай. Учвуз шид айи гажин гъабхурайи сар кас гьахъдичвуз, гьадгъан кьяляхъди гъарахай,

¹⁴ ва думу учӀву хулан эйсийиз: «Мялимди гьерхра: „Узу ученикарихъди пасхайин хураг ипӀру хал набши?“» йипай.

¹⁵ Дугъу учвуз ккабалгнайи, машквраз вари гьязурди айи, заан аьхю хал улупиди. Гьадушваъ ухьуз вари гьязур апӀинай.

¹⁶ Ученикар гъягъюру. Шагьриз гъафидариз Исайи гъапибси вари шулу ва пасхайин хураг гьязур апӀуру.

¹⁷ Хябяхъ гъабхьибси, йицӀикьюридра хъади, Иса гъюру.

¹⁸ Дурари, суфрайихъ деъну, уьл ипӀурайиган, Исайи кӀуру: – Гьякь кӀуразачвуз: учвкан сари, Узухъди ипӀурайири, Узу масу тувди.

¹⁹ Дурар пашман шулу, ва гьарури гьерхуз хъюгъру: – Думу узу дарза аьхир?

²⁰ Хъа дугъу дурариз жаваб тувру: – Думу йицӀикьюрикан сар, Узухъди саб гъабрак уьл кубсрайир ву!

²¹ Гьамци Инсаниятдин Бай, Гирами китабариъ улупнайиганси, масу тувди, амма шли Инсаниятдин Бай масу тувраш, дугъаз бала хьибди – думу касдиз, учв бабкан гъахьундайиш, ужу шуйи!

Агъайин хябяхъ

²² Дурари хураг ипӀурайи вахтна, Исайи уьл гъадабгъну, ужуб сяаьт ибшри дупну, думу гьудубтӀуру ва, ученикарихьна туври, кӀуру: – Ма гъадабгъай, му Йиз беден вуйиз.

²³ Зах гъадабгъну, чухсагъулин ккарагуб дапӀну, дурарихьна тувру. Хъа варидари дидʼан убхъуру.

²⁴ Дугъу дурариз кӀуру: – Му цӀийи йикьрар йитӀурайи ва гизафдарихъанди удубзурайи Йиз ифи вуйиз.

²⁵ Гьякь кӀуразачвуз: Узу сарун тӀумтӀарин му чяхир убхъидарза. Узу цӀийи чяхир Аллагьдин Паччагьлугъдиъ убхъидиза.

²⁶ Хъасин Аллагьдин тярифназ мяъли дапӀну, дурар Елион дагъдиз удучӀвуру.

Ученикари Учв нигь апӀрубдикан Исайи улихьмиди пуб

²⁷ Исайи дурариз кӀуру: – Учву варидари Узлан хъугъвал алдабгъидичва, Гирами китабариъ дупнайиси: «Марччлихъан йикӀидиза, ва марччар даргъиди».

²⁸ Хъа Узу чӀиви гъашиган, Узу Галилейиз гъягъидиза ва душваъ учвуз ккилигури хьидиза.

²⁹ – Варидари хъугъвал алдабгъишра, узу алдабгъидарза! – кӀуру Петри.

³⁰ – Гьякь кӀуразавуз, – кӀуру дугъаз Исайи, – гъи, гьаму йишван, даттли кьюб ражари уьъйир апӀайиз, шубуб ражари Узу аьгъюр дарзуз, пидива.

³¹ Хъа Петри айибтӀан артухъ гьисс кади текрар апӀуру: – Узуз Увухъди йикӀуб алабхъурушра, Уву «аьгъюр дарзуз» пидарза! Имбударира гьамцдар гафар гъапнийи.

Исайин ккарагуб

³² Мидхъан дурар Гефсимания кӀуру йишваз гъюру, ва Исайи ученикариз кӀуру: – Узу ккарагури имиди гьамшвахь деай.

³³ Дугъу Чахъди Петрна, Якьубна Югьан гъадагъуру. Дугъан кӀваъ дердна гъалабулугъ абхъру.

³⁴ Исайи дурариз кӀуру: – Йиз юкӀв яман хажалатнаъ абхънайиз, гьамшвахь гъузай, гъафил махьанай!

³⁵ Думу сацӀиб тина гьудучӀвуру, жилиина кьамкьарихъди ис духьну, му аьзаб, эгер шулуш, Чахьан гьадапӀбан бадали, ккарагуз хъюгъру.

³⁶ Дугъу кӀуйи: – Авва! Адаш! Увхьан вари шулвухьан! Гьаму аьзабнаккан Узу ккадаъ! Аммаки Узуз ккунибси дарибшри, хъа – Увуз.

³⁷ Хъасин ученикарихьна гъафиган, лигуруш, дурар нивкӀуз душнади рякъюру. Дугъу Петриз кӀуру: – Симон, уву даахнана? Саб сяаьтдикьан нивкӀ дарди гъузуз гъабхьундарнухьан?

³⁸ Гъафил махьанай. Учву тямягьвалариъ адрахъбан бадали ккарагай. Рюгь кӀубан ву, хъа беден – зяиф!

³⁹ Иса хъана гьудучӀвуру ва гьацдар гафариинди хъана ккарагуру.

⁴⁰ Кьяляхъ гъафириз, дурар хъана даахну рякъюру. Дурарин улар гъагъи духьнайи. Дурарихьан Дугъаз саб жавабра тувуз шуладайи.

⁴¹ Шубубпи ражарира Иса кьяляхъ гъюру, Дугъу кӀуру: – Гьамусра даахну имичва, рягьятвал гъадабгъуранчва? ИкибаштӀан! Вахт хътубкьну: магьа Инсаниятдин Бай гунагькрарин хилиз тувра.

⁴² Гъудужвай, гъачай гъягъюрхьа! Лигай, масу туврайир багахь хьа.

Иса дисуб

⁴³ Дугъу гьамци кӀайизра, ЙицӀикьюрикан сар Ягьуда кказагуру, ва дугъахъди аьхю маллйирина, къанунчйирина, аьхюдари ханжларна маргъар хьади гьаънайи адмийирин гъварчра хъайи.

⁴⁴ Иса масу тувуз дуфнайи Ягьудайи дурариз гьамци дупнайи: «Салам тувруган, узу шлиз мак гъапӀиш, гьадму Иса ву, ари Гьадму дисай, ва дишла, дидисну, мюгькам гъаравликкди гъайихай».

⁴⁵ Ягьуда диш дапӀну Исайихьинди гъюру. – Мялим! – кӀуру дугъу, ва Исайиз мак апӀуру.

⁴⁶ Гьадму сяаьт Иса дисуру ва гъаравлиъ уьрхюру.

⁴⁷ Хъа багахь дугъужвнайи сар ученикди ханжал уьчӀюбгъну, аьхю маллайин гъаравшин иб ктабтӀуру.

⁴⁸ Гьадмуган Исайи кӀуру: – Учву Узʼин ханжларна маргъар хьади алжагъуз Узу гъачагъ вуйин?

⁴⁹ Гьар йигъан Узу учвухъди, аьгъювалар улупури, Аллагьдин хулаъ айза, ва учву Узу гъидисундайчва. Хъа гъит Гирами китабариъ дупнайиси ибшри!

⁵⁰ Гьадмуган Думу сарди гъитну, ученикар вари гьергну гъягъюру.

⁵¹ Исайин терефкрарихъди хъади гъахьи сар жигьил, гъяцӀли жандиин ирин чарч илипну, Иса дидисну гъахурайидарин кьяляхъди гъягъюру. Думу дурари дисуру,

⁵² амма думу, чарч дурарин хилиъ гъибтну, гъютӀурччвну, гъяцӀалди гьергну гъягъюру.

Иса аьхюдарин улихь дерккуб

⁵³ Иса аьхю маллйирихьна гъахуру. Душвахьна аьхю маллйирна, агъсакъларна къанунчйир уч духьнайи.

⁵⁴ Хъа Петр ярхла-ярхлади дурарин кьяляхъди гъюру, аьхюну маллайин гьяятдизди учӀвну, гъаравшарихъди учвра цӀихъ мани апӀуз деъру.

⁵⁵ Аьхю маллйирина вари дурарин мажлисди Исайиз аьжал адабтӀбан бадали Дугъаз къаршу шагьидвалар агурайи.

⁵⁶ Гьеле кучӀлин шагьидар гизаф удучӀвнийишра, дурарин улупбар дюзди алахьурадайи.

⁵⁷ Гьадмуган гьамцдар кучӀлин шагьидвалар улупру касар дихъуру:

⁵⁸ – Ич ибариинди гъеебхьунчуз, Мугъу: «Хилариинди гъапӀу гьаму Аллагьдин хал дабгъурза ва шубуд йигъандин арайиъ, хилариинди дарди, жараб дивурза», – кӀура.

⁵⁹ Гьеле гьаму улупбаркьана дурарин дюзди алахьдайи.

⁶⁰ Гьадмуган аьхюну маллайи, кьялазси дуфну, Исайихьан гьерхру: – Увуз къаршуди кӀурайидариз гьаз жаваб туврадарва?

⁶¹ Амма Исайи, ккебехъну, жаваб туврадайи. Аьхюну маллайи хъана Дугъхьан гьерхру: – Уву Месигь вуна, ВаритӀанзаанурин Бай?

⁶² – Ав, вуза, – жаваб тувру Исайи. – Ва учвуз, вари Удукьрурин арччул хилихъинди деъну, аьршарин дифариинди Инсаниятдин Бай гъюри рякъидичвуз.

⁶³ Аьхюну маллайи, хъял кубчӀвбаан чан ккурттар дячӀяргъну, кӀуру: – Ихь сарун шагьидар гьаз ву?

⁶⁴ Аллагьдикан рихшанд апӀури учвузра гъеебхьунчвуз! Ичв къарар фициб хьибди? – Тахсиркар ву, ва аьжал адабтӀну ккунду, – кӀуйи варидари.

⁶⁵ Дурарикан бязидари Дугъак тутйир катӀуйи, Дугъан маш илибкну, кӀуллан йивуйи, хъа кӀуйи: – Эй, Пайгъамбар! Увуз шли гъивнуш, йип гьеле!

Петри Иса аьгъюр дарзуз пуб

⁶⁶ Хъа гьадму вахтна Петр тинаси хьайи гьяятдиъ айи. Дина аьхюну маллайин гъараваш дишагьлийирикан сар гъюру.

⁶⁷ Дугъаз цӀихъ чаз мани апӀурайи Петр рякъюру ва, дугъахьинди дикъатниинди дилигну, кӀуру: – Хъа увура хъайва гьаму Назаретжви Исайихъди.

⁶⁸ Амма Петри кӀулʼин бисдар: – Узуз аьгъюб фукӀара адарзуз, узу гъаври адарза, уву фтикан кӀураш. – Думу чӀатинди улихь гьяятдизди удучӀву. Гьадмуган даттли уьуь гъапӀу.

⁶⁹ Гъараваш дишагьлийиз думу душваъ дяркъну, душваъ айи адмийириз хъана кӀуру: – Гьаму гьадрарикан сар ву.

⁷⁰ Петри хъана кӀулʼин бисдар. СацӀиб хъугъужвну, гьяятдиъ дугъужвнайидари Петриз кӀуру: – Хъа уву дугъриданра гьадрарикан вува. Уву Галилейиан вува, аьхир.

⁷¹ Хъа Дугъу хуйир апӀуйи: – Учву кӀурайи Кас узуз аьгъюр дарзуз!

⁷² Гьадмуган кьюбпи ражнура даттли уьъйир апӀуру. Петрин, Исайи гъапи гьаму гафар, кӀваин шулу: «Даттли кьюб ражари уьъйир апӀайиз, шубуб ражари Узу аьгъюр дарзуз пидива». Ва ишуру.