Марк 12 - Гирами Китаб

Абайи чан бай гьаъра

¹ Иса дурариз тахалус ктибтуз хъюгъру: – Сар касди тӀумтӀин багъ ибтру, арчил илтӀибкӀуру, ичӀ ебккну, тӀумтӀар кчӀюкьрушв ва паж апӀуру. Хъасин багъ арендайиз тӀумутӀчйирихьна тувну, учв удучӀвну жара йишвариз гъягъюру.

² Вахт гъабхьиган, дугъу тӀумутӀчйирихьна чан пай тӀумтӀар хуз лукӀ гьаъру.

³ Хъа дурари думу дисуру, урччвуру ва, фукӀара тутрувди, утӀуккуру.

⁴ ТӀумтӀин багъдин эйсийи сарсана лукӀ гьаъру, аммаки мугъан кӀул уьбгъюру ва, аьйиб алапӀну, утӀуккуру.

⁵ Сарсана гьаъру – му йивну, йикӀуру. Хъана гизаф жарадарра гьаъру – садар урччвуйи, тмундар йивну гъядауйи.

⁶ Эйсийиз хъайина-хътру сар бай ади шулу. Ва аьхиримжи ражари дурарихьна «Йиз балхьан нач апӀурда» пну, гьадму гьаъру.

⁷ Хъа тӀумутӀчйири чиб-чпин арайиъ гьамци кӀуру: «Му эйсийин ирсчи ву. Гъачай, думу йивну йикӀухьа, ва ирс ухьуз гъубзди!»

⁸ Дурари думу дисуру, йикӀуру ва тӀумтӀин багъдиан гатӀахьуру.

⁹ ТӀумтӀин багъдин эйсийи гьапӀди? Думу хъадакну гъиди ва тӀумутӀчйир йихиди, хъа багъ жарадарихьна тувди.

Мурччван гъван

¹⁰ Мегер учву Гирами китабариъ гъурхунданчва: «Устйири гатӀабхьу гъван мурччвануб гъабхьну.

¹¹ Му ухьуз гъябкъю аьламат Агъайи гъапӀуб ву».

¹² Жугьдарин аьхюдариз му тахалус чпиз къаршуди дупнайиваликан аьгъю шулу ва Иса дисуз ккун шулу, аммаки халкьдихьан гучӀуйи. Гьаддиз дурар, Думу гъитну, гъягъюру.

Исайи фукӀа дюз даруб кӀайиз ккеуб

¹³ Хъасин Исайихьна, Дугъу фукӀа дюз даруб кӀайиз ккеъбан бадали, сакьюдар фарисйирна Гьироддин терефкрар гьаъру.

¹⁴ Дурари дуфну кӀуру: – Мялим, учуз аьгъячуз Уву гьякь кӀурайиб, гьич сарихьанра гучӀдарвуз, гьич саризра гучӀар ккаурдарва, хъа дишди ва ачухъди Аллагьди кӀурайиси яшамиш хьуз аьгъювалар улупурава. Йип гьеле, Рим паччагьдиз налук туврувал дюз вуйин, дарш дарин? Учу налук туврин, дарш тувурдарин?

¹⁵ Дурарин чӀуру ниятарин гъаври айи Исайи кӀуру: – Гьаз Узу ахтармиш апӀурачва? Аьбкъинай Узухьна манат, лигуза дидиз.

¹⁶ Дурари хуру. Исайи дурарихьан гьерхру: – Мидик шлин шикилна ччвур ка? – Римдин паччагьдин, – жаваб тувру дурари.

¹⁷ Исайи кӀуру: – Паччагьдинуб паччагьдиз, хъа Аллагьдинуб Аллагьдиз тувай. Дурар Дугъан жавабниин гъах гъаши.

Саддукйир ва Иса

¹⁸ Гьадму вахтна гъачӀидар чӀиви шлуб дар кӀурайи саддукйири дуфну гьерхру.

¹⁹ – Мялим! Мусайи учуз, эгер хпир айи чве веледар даршиди гъачӀиш, гьадгъан хпир тмуну чвуччву гъадагъну, чан чвуччвун тум арайиз дубхну ккунду, кӀури дибикӀна.

²⁰ Ургур чве гъахьну. Сарпи чвуччву шив хуру, амма, веледар дархьиди, йикӀуру.

²¹ Кьюрпи чвуччву дугъан хпир чаз дитру, ва мура, веледар дархьиди, йикӀуру, шубурпирра – гьаци.

²² Ургрид чвйирикан гьич саризра веледар гъахьундар. Вардарилан кьяляхъ гьадму дишагьлира йикӀуру.

²³ Гъиямат йигъан вари чӀиви шлуган, думу шлин хпир хьиди? Ургрид чвйиризра думу швуваз гъушнийи аьхир!

²⁴ Исайи дурариз гьамциб жаваб апӀуру: – Учву, я Гирами китабар, ясана Аллагьдин кьудрат аьгъдарди, улдугурачва.

²⁵ Гъийихдар чӀиви гъахьиган, дурари я швушвар хурдар, я швуваз гъягъюрдар. Дурар аьршариъ айи малайикарси хьиди.

²⁶ Хъа гъийихдар чӀиви хьуваликан кӀури гъабшиш, учву Мусайин китабдиъ, Аллагьди фици убгурайи рукнаан дугъаз «Узу Ибрагьимдин Аллагь, Исакьдин Аллагь ва Якьубдин Аллагь вуза» кӀури дибикӀнайиб гъурхунданчва, дарш?

²⁷ Аллагь дийихнайидарин ваъ, хъа чӀивидарин Аллагь ву. Учву гизаф улдугурачва.

ВаритӀан заан табшуругъ

²⁸ Гьюжат апӀурайишвахь сар къанунчира хьайи. Исайи дурариз фукьан уччвуди жавабар тувраш, дугъаз гъеебхьнийи, ва думу, Дугъахьна дуфну, гьерхру: – Фуну табшуругъ варитӀан заануб ву?

²⁹ – ВаритӀан заан вуйи табшуругъ, – кӀуру Исайи. – «Хъебехъай, эй жугьдар! Ихь Агъа Аллагь – сар АгъатӀан дар.

³⁰ Яв Агъа Аллагь, вари юкӀв хъипну, вари рюгьнаан, вари фагьмиан ва вари жвуван кьувватнаан ккун апӀин».

³¹ Хъа магьа кьюбпиб: «Багахь хьайир увуз жвуваз жвувси ккун апӀин». МурартӀан аьхю табшуругъар сарун адар.

³² – Ужуди дупна, Мялим, – кӀуру къанунчийи. – «Думу сар ву ва, Дугълан гъайри, сану гьич фужкӀара адар», – кӀури, гьякь гъапунва.

³³ «Думу вари юкӀв хъипну, вари фагьмиинди ва вари жвуван кьувватниинди» гьацира «багахь хьайир жвуваз жвувси ккун апӀин» кӀуру гафар, вари урккру ва ургру гъурбнартӀан зиина ву.

³⁴ Дугъу фагьумлуди жаваб тувувал дябкъну, Исайи дугъаз кӀуру: – Уву Аллагьдин Паччагьлугъдихьан ярхла дарва. Гьамдихъан сарун сарира Исайихьан гьич сабдиканра гьерхуз кӀубанвал гъапӀундар.

³⁵ Аллагьдин хулаъ халкьдиз аьгъювалар улупурайиган, Исайи кӀуру: – Къанунчйирихьан, Месигь Давудгъярин Бай ву, пуз, фици удубкьуру?

³⁶ Гирами Рюгьну ацӀнайи чав Давудри гъапну, аьхир: «Агъайи йиз Агъайиз гъапну: „Узу Яв душмнар, духну, Яв ликарикк дахьайизкьан Йиз арччул гъвалахъ деъ“».

³⁷ – Чав Давудри Дугъаз, Думу чан Агъа вуйиз, кӀура. Гьаци вуйиган, Думу дугъан Бай фици хьидихъа? Гизаф халкь Дугъахъ аьхю иштагьниинди хъпехъурайи.

³⁸ Дугъу халкьдиз Чан улупбариъ кӀуйи: – Ярхи палтар алди лицру къанунчйирихьан ихтият йихьай. Дурариз, чпин тяриф апӀури, халкьар уч шлушвариъ чпи тебрик апӀури ккунду,

³⁹ дурар мистариъ ва ипӀру-убхърушвариъ варитӀан гьюрматлу йишвариин деуз ккунидар ву.

⁴⁰ Гьадрар ву дурар, ачӀни хпарин мутму хътипӀурайидар, хъа халкьдин уларихьан ярхи гъудгнар апӀрудар. Гъиямат йигъан дурариз варитӀан пис жаза ккилибгура!

Касиб ачӀни хпирин садакьа

⁴¹ Иса, садакьади пул ипру ишкӀин багахь деъну, фици пул ипраш, лигурайи. Аьхю пай девлетлуйири гизаф пул ипуйи.

⁴² Хъа сар касиб ачӀни хпир дуфну, душваъ кьюб кепек ирчру.

⁴³ Гьадмуган Исайи, ученикариз Чахьна дих дапӀну, кӀуру: – Гьякь кӀуразачвуз: гьаму касиб ачӀни хпири варидаритӀан артухъ пул ипну.

⁴⁴ Пул ипдари варидари чпиз артухъди вуйиб ипну, хъа мугъу, гьамцир касибри, чаз ипӀрубдихъ тувру айи-адруб вари ипну.