Марк 11 - Гирами Китаб

Иса Ерусалимдиз гъюб

¹ Дурар Ерусалимдиз багахь шулайиган, Вифагия ва Вифания гъуларихьан ярхла дарди, Элион кӀуру дагъдин багахь хьимиди, Исайи гьамци дупну, кьюр ученик гьаъру:

² – Гьатму ихь гъаншариъ айи гъулаз гъарахай. Гъулаъ учӀвайиз ярхла дарди, дибтӀнайи жигьил дажи рябкъидичвуз. Дидʼин мегьел фужкӀара элеундар. Тудубчну, думу гьамина аьбкъинай.

³ Хъа эгер учвхьан шли: «ГьапӀрачва?» кӀури гьерхиш, «Думу Агъайиз лазимди ву, Дугъу думу дишла кьяляхъ апӀиди», йипай.

⁴ Дурар гъягъюру, ва кючейиъ урарин багахь дибтӀнайи жигьил дажи рябкъюру. Думу тудубчуз хъюгъру.

⁵ Душвахь дийигънайи адмийири: «ГьапӀрачва? Гъудугъ гьаз тудубчурачва?» – гъапи.

⁶ Хъа дурари чпиз Исайи гъаписи кӀуру, ва дурариз ихтияр тувру.

⁷ Дурари дажи Исайихьна хуру. Дурари чпин палтар дидʼин иличуру, ва зиълан Иса элеуру.

⁸ Гизафдари чпин палтар, хъа имбудари хутӀлиъ гьарарикан ктатӀу кюлер Думу гъягъру рякъюкк ккирчуйи.

⁹ Улихьдира ва кьяляхъдира гъябгъюрайи халкьди гьарйир апӀурайи: – Аллагьдиз тяриф! Агъайин ччвурнахъ Гъюрайириз ужʼвал ибшри!

¹⁰ Ихь аба Давудрин улубкьурайи Паччагьлугъдиз ужʼвал ибшри! Аьршариз тяриф!

¹¹ Иса Ерусалимдиъ учӀвру ва Аллагьдин хулаз гъягъюру. Варишварилан ул илбицну, хябяхъган кьанди, Думу, йицӀикьюрид вакиларра хъади, Вифанияйиз хътакуру.

¹² Хъайигъан, дурар Вифанияйиан удучӀвган, Исайиз гаш хьувал гьибгъру.

¹³ Ярхлаъ инжирин гьар гъябкъю Думу, дидигъ йимишар гъяш лигуз кӀури, багахьна гъягъюру, амма Дугъаз, гьаригъ фукӀара гъибихъундайи, фицики инжирар хъуркьру вахт улубкьнадайи.

¹⁴ Гьадмуган Дугъу гьариз кӀуру: – Сану гьич сарира сабанра яв йимишар диритӀри! Мици кӀури ученикаризра гъеебхьнийи.

Иса Аллагьдин хулаз гъюб

¹⁵ Дурар Ерусалимдиз гъюру. Иса Аллагьдин хулан гьяятдиз гъафи, ва душваъ ариш-вериш апӀурайидар утӀуккуз хъюгъру. Дугъу пул дигиш апӀурайидарин устлар, луфар масу туврайидарин кусрийир ккитӀикӀуру,

¹⁶ ва гьич сарира чан шейʼар Аллагьдин хулʼантина гъахуз гъитдар.

¹⁷ Хъасин Исайи дурариз аьгъювалар улупуз хъюгъю. Дугъу кӀуру: – Гирами китабариъ дибикӀнадаринхъа: «Йиз хулаз вари миллетар ккарагру хал пиди». Хъа учву дидкан тӀарашчйирин мугъара дапӀначва!

¹⁸ Аьхюдаризна къанунчйириз гьамци кӀури гъеебхьиган, Думу йикӀуз, дурар саб чара абгуз хъюгъю. Дугъхьан дурариз гучӀуйи, гьаз гъапиш вари халкь Дугъан аьгъюваларихъ аьхю иштагьниинди хъпехъуйи.

¹⁹ Хябяхъ гъабшиган, Иса ученикарра хъади, шагьриан удучӀвну гъягъюру.

Хъугъвалин кьувватнакан

²⁰ ГвачӀинган инжирин гьарин багхьантина гъягъюрайидариз думу ччиварианзина тап кӀакӀаризкьан вари деебццну рябкъюру.

²¹ Петри, накь гъапиб кӀваин дубхьну, Исайиз кӀуру: – Мялим, лиг, Уву накь чаз люкьян гъапӀу инжирин гьар гъеебццну!

²² Исайи дурариз жаваб туву: – Аллагьдихъ хъугъай!

²³ Гьякь кӀуразачвуз: эгер шли гьаму дагъдиз «Яв йишвʼлан улдубчӀвну, гьюлиъ убс!» гъапиш ва, кӀваъ шаклу даршиди, хъугъиш, гьадмура тамам хьибди.

²⁴ Гьаддиз Узу кӀуразачвуз: учву ккарагури фу ккун гъапӀиш, вари учвухьна рубкьрувалихъ хъугъай, рубкьидичвухьна ва думу ичв хьибди.

²⁵ Аьршарин ичв Адашдихьан ичв гунгьарилан хил алдабгъуз шлуси, ккарагруган, шлик ичв хъял каш, гьадгъулан хил алдабгъай. [

²⁶ ]

Исайин гьюкум наънан ву?

²⁷ Дурар хъана Ерусалимдиз гъюру. Иса Аллагьдин хулан гьяятдиъ лицурайиган, Дугъахьна аьхю маллйирна, къанунчйирна, аьхюдар гъюру.

²⁸ Дурари гьерхру: – Уву му ляхнар фициб гьюкмиинди апӀурава? Шли Увуз гьациб гьюкум тувну?

²⁹ Исайи дурариз кӀуру: – Узу учвуз саб суал тувдиза. Жаваб тувай – Узура, мурар фициб гьюкмиинди апӀураш, пидизачвуз.

³⁰ Ягьʼяйин штуан апӀувал Аллагьдихьан вуйин, даршиш инсанарихьан? Гьан, жаваб тувай!

³¹ Дурар, фикрарикк ккахъну, чиб-чпикди гьамци пуз хъюгъру: «Эгер ухьу „аьршариан“ гъапиш, Дугъу: „Хъа учву дугъахъ гьаз хъугъундайчва?“ пну, гьерхди.

³² Хъа адмийирихьан гъапиш…» Дурариз халкьдихьан гучӀуйи, гьаз гъапиш варидари Ягьʼя дугъриданра пайгъамбар ву кӀурайи.

³³ Гьаддиз дурари гьамциб жаваб тувру: – Аьгъдарчуз. – Дици вуш, Узура учвуз, фициб гьюкмиинди гьамцдар апӀураш, пидарзачвуз, – жаваб тувру Исайи.