Лука 8 - Гирами Китаб

Исайихъди лицурайи дишагьлйир

¹ Дидхъантина Иса, шагьрариъна гъулариъ, Аллагьдин Паччагьлугъдикан Ужувлан хабар рабгъури, Чан йицӀикьюр ученикарра хъади, лицури гъахьну.

² Дурарихъди жинарихьан гъюрхю ва уьзрар сагъ гъапӀу бязи дишагьлийир: чаан ургуб жин удучӀву Магдалайиан вуйи Марʼям,

³ Гьироддин мулкар идара апӀурайи Хуздин хпир Югьанна, Сусанна, гьацира чпиз айи-адрубдиинди Дугъан гъайгъу зигурайи жара дишагьлийирра хъади гъахьну.

Тум убзбакан тахалус

⁴ АьхючӀвеъ халкь уч гъашиган ва вари шагьрариан агьалйир Дугъахьна гъафиган, Исайи тахалусдиинди пуз хъюгъру:

⁵ – Сар нежбер тум убзуз удучӀвуру. Убзурайиган, гьацӀар удрар рякъюхъ дахьру, малари ликариккан апӀуру ва жакьвари удуру.

⁶ Сакьюдар гъван ккайи ругдиин дахьру ва ктучӀвиган ерццуру, гьаз гъапиш дурариз ламушин адарди гъабхьну.

⁷ Сакьюдар удрар зазаригъ гъяхьру ва удрартӀан зарбди ктучӀву зазари дурар ккаъру.

⁸ Хъа сакьюдар авадан ругдик кахьру, ктучӀвиган дурари варжбан артухъ бегьер тувру. Гьамци дупну, Исайи гужал дихниинди гъапи: – Шлин ибариз ебхьураш, гъит ебхьри!

Тахалусдин мяна

⁹ Ученикари Дугъхьан гьерхуз хъюгъну: – Му тахалусдин мяна фу ву?

¹⁰ Дугъу гъапи: – Учвуз Аллагьдин Паччагьлугъдин сирар аьгъю хьуб тувначвуз, хъа имбудариз му тахалусариътӀан аьгъю хьуб тувнадар. Гьаци вуйиган, лигурашра, дурариз рябкъюрадар ва, ебхьурашра, дурари аннамиш апӀурадар.

¹¹ Му тахалусдин мяна магьа: тумар – Аллагьдин гаф ву.

¹² Рякъʼина тадахьдар – мурар, чпиз Аллагьдин гаф ебхьурайи, амма чпихьна хъасин иблис дуфну, дурар ебхьурайи гафнахъ хътругъри ва гьаци уьрхювал гъазанмиш дарибшри пну, дурарин кӀваан иблисди гьадму гаф гъабхурайи касар ву.

¹³ Хъа гъванариина ахьдар – мурар, Аллагьдин гаф гъеебхьиган, думу шадди кьабул апӀрудар, хъа чпихъ мюгькам ччивар хътарди хьпаз лигну, бязи вахтари хъугърудар, хъа читин гъабшиган, хътругърудар ву.

¹⁴ Хъа зазаригъ гъяхьдар – мурар Аллагьдин гафнахъ хъпехърудар, амма гъайгъушнари, девлетну ва гешт хъапӀбу йисир дапӀну, Аллагьдин гафнахьан гьудучӀврудар ва, гьаддиз, бегьер дархрудар ву.

¹⁵ Хъа авадан ругдиина ахьдар – мурар, Аллагьдин гаф гъеебхьиган, му чпин марцци кӀваъ уьбхрудар ва сабур апӀбиинди бегьер туврудар ву.

Чирагъ чан йишвʼин дивру

¹⁶ Исайи хъанара давам апӀуру: – Сарира, чирагъ кабхьну, дидʼин гъаб иливдар вая кроватьдикк ккивдар. Дугъу думу, хулаъ учӀврайидариз акв шлуси, чан йишвʼин дивру.

¹⁷ Фицики ашкар даршлу жиниб фукӀара адар ва, мялум даршиди, арайиз ададабхъру гьич саб сир адар.

¹⁸ Гьаци вуйиган, учву Узухъ дикъатниинди хъебехъай: шлиз аш, дугъаз хъана тувди; хъа шлиз адарш, айибдихьна хьибдизуз кӀурубра тадабгъиди.

Исайин дадана чвйир

¹⁹ Исайихьна дадана чвйир гъюру ва дурар, халкь гизаф ади хьпаз лигну, Дугъахьна багахь хьуз даршули айи.

²⁰ Хъа Исайиз: «Яв дадана чвйир, Уву рякъюз ккунди, чӀат дийигъна», – кӀури, хабар тувру.

²¹ Дугъу дурариз жаваб вуди кӀуру: – Йиз дадана чвйир, Аллагьдин гафнахъ хъпехърудар ва думу тамам апӀрудар вуйиз.

Исайи тӀурфан яваш апӀуб

²² Сад йигъан Дугъу, Чан ученикарра хъади люткейиъ эъну, дурариз гъапи: – Гьюлин тмуну гъирагъдихъна сирнав апӀидихьа. Дурар люткейиъди гъушу.

²³ Сирнав апӀурайиган, Иса нивкӀуз гъягъюру. Гьюлʼина гужал тӀурфан утӀубччвну, лепйири лютке ккапӀуз хъюгъру, ва дурар хатӀалу гьялнаъ ахьру.

²⁴ Дурар, Исайихьна дуфну, Думу нивкӀʼан хъиргну кӀуру: – Мялим! Мялим! Батмиш шулахьу! Хъа Дугъу, гъудужвну микӀлаз ва штун лепйириз гъадагъа апӀуру, ва дурар лал шулу, архаинвал абхъру.

²⁵ Гьадмуган Исайи дурариз гъапну: – Хъугъʼвал набшдичв? Дурари, гучӀ кабхъну ва мюгьтал духьну, чиб-чпиз кӀури гъахьну: – Му фуж вуйкӀан, микӀаризра, штузра амур апӀрур, ва дурар Мугъаз мютӀюгъра шула?

Жинар кайир сагъ апӀуб

²⁶ Хъа дурари Галилей уьлкейин гъаншариъ айи Герасин юрдназ сирнав апӀуру.

²⁷ Иса гъирагъдихъна ктучӀвиган, Дугъахьна ухдихъанмина жинар кайи сар кас гъюру. Думу, учв шагьриан вушра, палтар алалахьди, хулаъ ваъ, хъа накьварин хьарар-дюрхъяригъ яшамиш шулайир вуйи.

^28-29 Жин гагь-гагьнак кубчӀвруган, дугъан хилар-ликар зунжрарихьди ва гьялкьйирихьди йитӀуйи, амма дерккуз даршули, дурар кьатӀар апӀуйи, жинди думу аьсси апӀуйи, хъа чӀурариз гьергуйи. Исайи чиркин рюгьназ, мугъʼан удубчӀв пну, амур апӀуру. Иса гъяркъиган, дугъʼан чӀигъ утӀубччвуру ва, Дугъан улихьна ккадакну, зарбди кӀуру: – Яв узухъди фу вуяв, ВаритӀанзаан Аллагьдин Бай Иса? Миннат вуйиз, йиз зегьле мабхан!

³⁰ Исайи дугъхьан гьерхру: – Ччвур фуж вуяв? Дугъура: «Кьушум вуйиз» – кӀуру, гьаз гъапиш дугъак гизаф жинар кучӀвнади гъабхьну.

³¹ Хъа жинари Исайикан чпи гурбагуриз гьадрауб тӀалаб апӀуру.

³² Мушвхьан ярхла дарди дагъдик силарин аьхю лиж карабгънайи, ва жинари чпиз гьадрариъ учӀвуз ихтияр тувуб тӀалаб апӀуру. Исайи дурариз ихтияр тувру.

³³ Адмийиан удучӀву жинар силариъ учӀвру, ва силарин лиж гъарзарилан гьюлиъ убсру ва ккабхъру.

³⁴ Му ляхин гъябкъю силарбнари, жаргъну душну, шагьриъ ва гъулариъ гьамдикан халкьдиз ктибту.

³⁵ Хъа му гьякьикьи гъабши ляхниз лигуз халкь Исайихьна гъюру. Жинар ктучӀву кас Исайин ликарихъ деънади, палатра алди ва чан фикрихъ хъади гъяркъиган, дурарик гучӀ кабхъру.

³⁶ Му аьламат гъябкъдари дурариз, жинар кайир фици сагъ гъахьнуш, ктибту.

³⁷ Хъа Герасин юрднан вари халкьди Исайикан чпихьан гьудучӀвну гъягъювал ккун апӀуру, фицики дурарик зурба гучӀ кабхънайи. Исара, люткейиъ эъну, кьяляхъ хътаку.

³⁸ Чакан жинар ктучӀву касди учвра гъадагъуб Исайикан тӀалаб гъапӀнийи. Амма Исайи думу гьамци дупну гьадауру:

³⁹ – Яв хулаз хъадакну, Аллагьди увуз фу гъапӀнуш, кидибт. Дугъура душну, Исайи чакан гьапӀнуш, шагьур вуйибси ктибтуру.

«Яв хъугъували уву гъюрхну»

⁴⁰ Иса кьяляхъ хътакиган, халкьди думу тебрик апӀуру, фицики вари Дугъаз ккилигурайи.

⁴¹ Ва магьа жугьдарин мистан аьхюр вуйи Ягьир кӀуру сар кас дуфну, Исайин ликарикк дахъну, Дугъаз чан хулаз гъюб тӀалаб апӀуру,

⁴² гьаз гъапиш дугъахъ йикӀру гьялнаъ айи йицӀикьюд йисаъкьан айи риш хъайи. Иса дина гъягъру вахтна халкь, Дугълан илтӀишну, кьяляхъди гъюри гъахьну.

⁴³ Му арайиъ, йицӀикьюд йисан ифи хътадабтӀрайи, духтрариз вари чан айи-адруб харж дапӀну, сарихьанра сагъ апӀуз дархьи сар дишагьлийи,

⁴⁴ кьялхъянди дуфну, Исайин палатдин гъирагъдик хил кубкӀру ва дишлади дугъан ифи хътабтӀуру.

⁴⁵ Хъа Исайи гьерхру: – Узук фуж куркӀну? Вари инкар шулайиган, Петри кӀуру: – Я Мялим! Халкьди уву кьялаъ тӀаъна ва хъуржра.

⁴⁶ Хъа Исайи гъапи: – Фуж-вуш Узук куркӀну, Узʼан кьувват удубчӀвуб гьисс гъапӀунза.

⁴⁷ Дишагьлийиз чахьан гьитӀикӀуз даршлуб дябкъну, гукӀунди багахь духьну, Исайин ликарикк ккархьну, чав Дугъак гьаз куркӀнуш ва фици учв дишла сагъ гъахьнуш, вари халкьдин улихь мялум гъапӀу.

⁴⁸ Исайи дишагьлийиз гъапи: – Йиз риш! Яв хъугъували уву сагъ гъапӀунву; архаин духьну, гъарах.

Ягьирин риш сагъ апӀуб

⁴⁹ Исайи гьамци кӀури имиди, жугьдарин мистан аьхюрин хулʼан дуфну, сар касди дугъаз кӀуру: – Яв риш гъакӀну, сарун Мялим инжик мапӀан.

⁵⁰ Хъа Исайи, гьаму гафар деерхьну, дугъаз кӀуру: – ГучӀ мапӀан, анжагъ хъугъ, яв риш ккадархьиди.

⁵¹ Дурарин хулаз хъуркьган, Исайи Петризна, Югьандизна Якьубдиз ва гьацира шуран адашдизна дадайизтӀан хулаъ учӀвуз ихтияр тувундайи.

⁵² Вари гъачӀи шурахъ ишури ва ишлар апӀури айи. Хъа Исайи дурариз гъапи: – Мишанай, думу дукӀнадар, хъа даахна.

⁵³ Хъа халкь, думу дукӀнайиб аьгъяди, Исайиин аьлхъюри гъахьну.

⁵⁴ Дугъу, кӀуруш, вари хулʼан утӀурккну, шуран хил дибисну, кӀуру: – Я риш! Гъудужв!

⁵⁵ Ва шуран рюгь кьяляхъ хътабкуру, думу дишлади гъудужвуру. Исайи, шураз ипӀруб тувай, кӀуру.

⁵⁶ Шуран абйир-бабар мюгьтал шулу. Исайи му ляхникан шлизкӀа даркӀуб амур апӀуру.