Лука 5 - Гирами Китаб

«Гьамусдихъантина адмийирин юкӀвар дисидива»

¹ Сабан, Аллагьдин гаф ебхьбан бадали, халкь Исайилан илтӀишуру, хъа Думу Учв Геннисарет гьюлихъ дийигъну айиган,

² Дугъаз гьюлʼин кьюб лютке рякъюру. Дурариан эдеу балугъчйири чулар марцц апӀурайи.

³ Люткйирикан Симондинубдиъ учӀвну, Исайи дугъхьан лютке гъирагъдихъан цӀиб тинаси хъапӀуб ккун гъапӀну ва гьадлин, деъну, аьгъювалар улупуз хъюгъру.

⁴ Чан улхуб ккудубкӀиган, Исайи Симондиз кӀуру: – Яв лютке гьюлин кьялариз хъапӀ, хъа яв чулра ккип.

⁵ Симонди Исайиз жаваб вуди гъапну: – Я Мялим! Ярхи йишвди чалишмиш духьну, учхьан фукӀа бисуз гъабхьундарчухьан, амма Яв гафназ лигну чул ккипарза.

⁶ Хъа гьаци дапӀну, дурари гьадмукьан балугъар гъидиснуки, гьеле чул чӀябгъюзра цӀибтӀан имдайи.

⁷ Дурари тмуну люткейиъ айи юлдшаризра кюмекназ дих дапӀну, дурарра дуфну кьюбиб люткйирра гьаци арцӀруки, люткйир ккадрахьди саб нуфт гъубзнийи.

⁸ Му гъябкъиган, Петр кӀуру лакӀам хъайи Симонди, Исайин кьамкьариина ис духьну: «Я Агъа! Узхьан гьудучӀв, гьаз гъапиш узу гунагькар вуза», гъапи.

⁹ Фицики Симон ва дугъахъ хъайидар, чпи гъидису аьхючӀвеъ балугъариз лигну, русвагь гъахьнийи.

¹⁰ Хъа Симондин дустар вуйи Зеведейин баяр Якьубдикна Югьандик Симондиксиб пис гучӀ кабхъру. Симондиз Исайи: «ГучӀ мапӀан, гьамусдихъантина инсанарин юкӀвар дисидива», кӀуру.

¹¹ Хъасин кьюбиб люткйирра гъирагъдихъна кадагъну, вари душваъ гъибтну, дурар Исайин кьяляхъди гъягъюру.

Хамран аьзар марцц апӀувал

¹² Иса саб шагьриъ айиган, Дугъахьна хамран аьзар кабхьнайи сар кас гъюру. Иса гъяркъиган, жилʼина ккадакну, думу Дугъаз ккарагуру: – Я Агъа! Увуз ккун гъабшиш, узу марцц апӀуз шулвухьан.

¹³ Исайи, хил гьачӀабккну, дугъак кубкӀну, кӀуру: – Ккундузуз, марцц йихь! Ва дишлади дугъан хам аьзарнахьан марцц шулу.

¹⁴ Исайи дугъаз: мидкан саризра макӀан, хъа маллайихьна душну, жвув улуп, халкьдиз уву марцц хьпан шагьидвал вуди, Муса пайгъамбри дупнайиганси, гъурбан апӀуз ужуб гъайибх, кӀури, табшурмиш гъапӀу.

¹⁵ Амма гьаци вушра, Исайикан аваза гъарабгъу, ва Дугъахъ хъпехъуз, чпин уьзрар сагъ апӀуз гизаф халкь гъюз хъюгъру.

¹⁶ Хъа Иса, фужкӀа адру йишвариз гъягъюри, ккарагури шулу.

Паралич кайир сагъ апӀуб

¹⁷ Сад йигъан Исайи аьгъювалар улупурайиган, Галилейна Ягьудия уьлкйириан ва гьацира Ерусалимдиан Дугъахьна дуфнайи фарисйирна къанунчйир деънайи. Дугъу аьзарлуйир Аллагьди туву кьувватниинди сагъ апӀурайи,

¹⁸ ва магьа Дугъахьна ахниин алди паралич кайи сар кас хуз хъюгъю. Думу хулаз духну, Исайин улихь дитуз ккун гъабхьи.

¹⁹ Му кас гизаф илтӀишнайи халкьдин арайигъян гъахуз йишв дибрихъди, хулан гъваина за дапӀну, гъваъланди, ахниин илмиди, Исайин улихьна хулан кьялʼина ирхру.

²⁰ Исайира, дурарин зурба хъугъвал рябкъюри, гьадму касдиз кӀуру: – Эй инсан, яв гунгьарилан хил алдабгъураза.

Къанунчйиризна фарисйириз Исайин гьюкум улупуб

²¹ Къанунчйирина фарисйири чиб-чпикди фикир гъапӀу: – Аллагьдиз къаршуди улхурайир гьаму фуж ву? Сар Аллагьдилан гъайри, сарун шлихьан гунгьарилан хил алдабгъуз шулухъа?

²² Исайи, дурарин фикрарин гъаври ахъну, жаваб тувру: «Гьаз дицдар фикрар ичв юкӀвариъ тӀаърачва?

²³ „Яв гунгьарилан хил алдабгъураза“ пуб рягьят вуйин, даршиш „гъудужвну лиц“ пуб?

²⁴ Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай» – пну, Дугъу паралич кайириз: «Гъудужв кӀуразавуз, гъадабгъну яв ахин, яв хулаз гъарах», – кӀуру.

²⁵ Думура дишла гъудужвну, учв дахънайи ахинра гъадабгъну, Аллагьдин адар апӀури, чан хулаз гъягъюру.

²⁶ Хъа вари мюгьтал шулу ва, Аллагьдин тярифар апӀури, гучӀбаан зегьле дубшну, гьамци кӀури гъахьну: – Гъи аьжаб кереметнан ляхнар гъяркъюндарин ухьуз!

Левийиз дих апӀуб

²⁷ Мидхъан хулʼан удучӀву Исайиз налук уч апӀури деънайи Левий кӀуру гъуллугъагьли рякъюру ва дугъаз Чахъди гъач кӀуру.

²⁸ Думура, чан кеспи гъибтну, Дугъан кьяляхъди, гъудужвну, гъягъюру.

²⁹ Хъасин дугъу чан хулаъ Исайиз аьхю хялижвʼвал апӀуру. Душваъ аьхючӀвеъ налукар уч апӀрудар ва дурарихъди гутйириз гъюн йивну дахьнайи жара хяларра айи.

³⁰ Аьлимарина фарисйири наразивал кади Исайин ученикариз: «Учву налукар уч апӀрударихъдина гунагькрарихъди гьапӀуз ипӀури-убхъури шулчва?» – кӀури гъахьну.

³¹ Исайи дурариз жаваб вуди гъапну: – Духтир сагъидариз ваъ, хъа аьзарлуйириз лазим ву.

³² Узу марцци касари ваъ, хъа гунагькрари, чпин гунгьар гардандиъ дидисну, уьмур дигиш апӀбан бадали, дуфнайир вуза.

Ушвар дисбакан

³³ Дурари кӀуруш Исайиз гъапи: – Гьаз Ягьʼяйин ва гьацира фарисйирин ученикар кми-кмиди ушвар дисури ва ккарагури шулу, хъа Явдар чпиз ккун гъабши вахтна ипӀури-убхъури гьаз шулу?

³⁴ Исайи дурариз кӀуру: – Швушв хурайирихъди хъайи сумчрин хяларихьди учвхьан ушвар дисуз гъитуз шулинхъа?

³⁵ Хъа швушв хурайир гужназ гъадагъру вахт гъибди, ва гьадму йигъари ушварра дисиди.

³⁶ Мидихъди сабси Дугъу саб тахалус ктибтуру: – Гьич сарира, цӀийи палатдикан кадабтӀну, йирси палатдик цӀил ктривур, даршиш дугъу цӀийи палатра чӀябгъиди, хъа гьацира дидкан ктабтӀу цӀил йирсибдик балгидира дар.

³⁷ Ва гьич сарира таза чяхир йирси иржариъ убзидар, фицики таза чяхри иржар гьутӀурччвиди, учвра удубзиди ва иржарра пуч хьиди.

³⁸ Гьаддиз таза чяхир цӀийи иржариъ убзуб лазим ву.

³⁹ Ва гьич саризра, кюгьне чяхир дубхъну, дишлади таза чяхир ккун хьидар, фицики «кюгьне чяхир ужу ву» – кӀури шулу.