Лука 4 - Гирами Китаб

Иблисдин Иса рякъʼан адауз чалишмишʼвал

¹ Гирами Рюгьну ацӀу Иса Ярдан нирхъан кьяляхъ хътакуру, ва Рюгьну Думу ичӀи чюлиз гъахуру.

² Душваъ иблис ягъчӀвур йигъан Иса рякъʼан адауз чалишмиш шулу. Исайи му йигъари фукӀа дирипӀди гъахьну, хъа гьадму йигъар улдучӀвиган, аьхирки, Дугъаз яманди гаш шулу.

³ Хъа иблисди Исайиз гъапи: – Эгер Уву Аллагьдин Бай вуш, гьаму гъвандикан уьл хьуз гъит.

⁴ Исайи жаваб вуди гъапи: – Гирами китабариъ дибикӀнаки: «Инсан ялгъуз уьлʼинди яшамиш шуладар».

⁵ Иса ягъал йишвʼина адаъну, иблисди Дугъаз саб геренди вари дюнʼяйин паччагьлугъар улупуру,

⁶ ва кӀуру: – Вари гьаму паччагьлугъар ва дурарин гьяйбат Увуз тувдиза, фицики дурар йиз ихтиярназ тувна ва узхьан дурар узуз ккунириз тувуз шулзухьан.

⁷ Эгер Уву узуз икрам гъапӀиш, гьадрар вари Явдар хьиди.

⁸ Исайи дугъаз жаваб туву: – Гирами китабариъ дибикӀна: «Яв Агъа Аллагьдиз икрам апӀин ва сар ДугъазтӀан гъуллугъ мапӀан».

⁹ Иблисди хъана Иса, Ерусалимдиз духну, Аллагьдин хулан вартӀан ягълишвʼин дерккру ва кӀуру: – Эгер Уву Аллагьдин Бай вуш, ари гьамлин исина урс,

¹⁰ фицики дибикӀна: «Аллагьди Чан малайикариз, гъайгъушнаъ духьну Уву уьрх кӀури, амур апӀиди.

¹¹ Ва Яв ликкьан гъвандихъ йивуз гъидритруганси, Уву чпин хилариина гъадагъиди».

¹² Исайи дугъаз жаваб вуди гъапи: – Гьамцира дупна: «Яв Агъа Аллагь ахтармиш мапӀан».

¹³ Иса рякъʼан адаъру вари чарйир хътӀарцциган, жара саб ужуб вахт ккабхъайиз, иблис Дугъхьан гьудучӀвну гъушу.

«Гьич сар пайгъамбарра чан ватандиъ лайикьлуди кьабул апӀури шулдар»

¹⁴ Иса Аллагьдин Рюгьнан тясирнаккди Галилей уьлкейиз хътакуру ва Дугъан гьякьнаан бютюн уьлке вуйибси аваза рабгъуру.

¹⁵ Исайи мистариъ аьгъювалар улупуйи, ва вардари Думу адлу апӀуйи.

¹⁶ Хъа Иса, Учв тербияламиш гъаши Назаретдиз дуфну, Чан аьдат вуйиси, султ йигъан мистаъ учӀвру ва Гирами китаб урхуз гъудужвуру.

¹⁷ Гьадмуган Исайихьна Ишая пайгъамбрин китаб тувру. Дугъура китаб абццру ва гьамци дибикӀнайишвʼин алахъуру:

¹⁸ – Агъайин Рюгь Узʼин ал. Узуз Аллагьди касибариз Ужувлан хабар рабгъуз гьюкум тувнайиз ва Узу йисирариз азадвал хьади, курариз акв хьади ва гьацира зулум-зиллетнакк ккайидар азад апӀуз ва

¹⁹ Аллагьдин рягьимнан вахт улубкьну, кӀуру, хабар тувуз гьаъну.

²⁰ Хъасин китаб ккибкну, мистан гъулугънаъ айирихьна тувну, Иса деъру. Хъа мистаъ айи вардарин улар Гьадгъуин алди гъахьну.

²¹ Исайи дурариз кӀуру: – Учвуз гъеерхьу Гирами китабдиъ дидикӀнайи гьаму гафар, магьа, гъи ичв улихь кӀулиз удучӀвна.

²² Исайин улихь варидари гьаци вуйивал улупу ва, Дугъан мелзналан гъюрайи кабалгру гафариин мюгьтал шули, дурари гьерхри гъахьну: – Му ихь Юсуфдин бай даринхъа?

²³ Исайира дурариз гъапи: – Гьелбетки, учву Узуз, абйирин мисалик дупнайиганси, пидичва: «Эй духтир! Сифте Жвуву Жвув сагъ апӀин!» «Уву Кафернагьумдиъ гъапӀу аьламатнан ляхнарикан учуз деебхьначуз, гьамус гьадму ляхнар мушваъ, Яв абайин ватандиъра, апӀин» пидичва.

²⁴ Гьякьди кӀуразачвуз, гьич сар пайгъамбарра чан абайин ватандиъ лайикьлуди кьабул апӀури шулдар.

²⁵ Дюзди кӀуразачвуз: Израилиъ Илʼясдин девриъ, шубуд йисанна йирхьуб вазлин арайиъ мархь адарди гъабхьи вахтна, гизаф ачӀни дишагьлийир гъахьнийи, фицики вари жилиин аьхю гаш алабхънийи.

²⁶ Хъа дурарикан гьич сарихьнакьан Илʼяс пайгъамбар гьаундайи. Думу ялгъуз Сайдайин багахь хьайи Сарепта кӀуру шагьриз сар ачӀни дишагьлийихьнатӀан гьаундайи.

²⁷ Гьацира Елисей пайгъамбрин девриъ хамран аьзар кабхьнайидарра гизаф айи, хъа Сирияйиан вуйи Найман кӀуру сар касдикантӀан ктарди, сариканра хам марцц гъабхьундайи.

²⁸ Му гафар гъеерхьиган, мистаъ айидарик хъял кубчӀвру

²⁹ ва, гъудужвну, дурари Иса, гъарзарилан итбан бадали, утӀурккну, шагьур али дагъдиина гъахуз хъюгъру.

³⁰ Хъа Иса, рякъюъди дурарин кьялгъян гъюдучӀвну, гъушнийи.

Исайи жинар кайи кас сагъ апӀуб

³¹ Хъа Галилейиъ айи Кафернагьум кӀуру шагьриз дуфну, Исайи халкьдиз султ йигъари аьгъювалар улупури гъахьну.

³² Исайин улупбариин халкь мюгьтал шуйи, фицики Дугъан гафар гьюкум айидар вуйи.

³³ Мистаъ жин кубчӀвнайи сар кас айи, ва дугъʼан диди зарбди чӀигъ апӀуру:

³⁴ – Учухъ фу хъаяв, Назаретдиан вуйи Иса? Уву учу пуч апӀуз дуфнана? Уву фуж вуш, аьгъязуз, Аллагьдин Гирамир!

³⁵ Исайи, дидиз улхуз гъадагъа дапӀну, гъапи: – ХъючӀюбкь ва удубчӀв дугъʼан! Жин, думу кас мистан кьялʼин алдакну, дугъаз саб зарарра тутрувди, дугъʼан удубчӀвуру.

³⁶ Му гъябкъю вардари, русвагь духьну, чиб-чпиз гьамци кӀури гъахьну: – Мурар фу аьламатнан гафар ву: Дугъу, Чан гьюкмиинди ва кьувватниинди амур апӀури, жинар ктаурада!

³⁷ Юкьуб аьтраф вари йишвариъ Исайин аваза рабгъуру.

Симондин сижарбаб

³⁸ Мистʼан удучӀвну, Думу Симондин хулаз гъушу. Симондин сижарбабак пис убцрушнан уьзур кайи ва Исайикан думу сагъ апӀувал тӀалаб гъапӀнийи.

³⁹ Дугъан зиина ял духьну, Исайи убцрушназ гъадагъа апӀуру ва думу ктубчӀвуру. Симондин сижарбаб, дишла ликриина гъудужвну, хяларин гъайгъушнаъ учӀву.

⁴⁰ Ригъ алабхъурайи вахтна, Исайин багахьна жюрбежюр иццрушнар кайидар хури гъахьну. Исайира, гьаруриин Чан хилар иливури, дурар сагъ апӀури гъахьну.

⁴¹ Гизафдариан жинарра удучӀвури гъахьну. Жинари: «Уву Аллагьдин Бай вува!» – кӀури, чӀигъар апӀуйи. Хъа Дугъу Учв Месигь вуйибдикан жарадариз пуб дурариз гъадагъа апӀури гъахьну, фицики дурариз, Думу Месигь вуйиб, аьгъяйи.

Ягьудияйиъ аьгъювалар улупуб

⁴² Хъайигъан гвачӀин улубкьиган, хулʼан удучӀвну, Иса халват йишваз гъягъюру, хъа халкьди Думу агури шулу. Хъасин Исайихьна дуфну, учхьан мягъян кӀури, Дугъахъ ккарагури хъюгъру.

⁴³ Амма Исайи дурариз гъапи: – Жара шагьраризра Аллагьдин Паччагьлувал гъюрайиваликан Ужувлан хабар рабгъуб лазим ву, гьаз гъапиш Узу гьаддин бадали Гьаънайир вуза.

⁴⁴ Исайи Ягьудия уьлкейин мистариъ аьгъювалар улупувал давам апӀури гъахьну.