Лука 23 - Гирами Китаб

Иса Пилатдин улихь

¹ Хъасин дурари, гъудужвну, Иса Пилатдихьна гъуху

² ва Дугъак гьамцдар тахсрар кирчуз хъюгъю: – Мугъу, Чаз Месигь, паччагь кӀури, халкь рякъʼан адаура, Римдин паччагьдиз налук тувуб дюз дар кӀури, гьисаб апӀура.

³ Пилатди Исайихьан гьерхру: – Уву «жугьдарин Паччагь» вуна? Исайи жаваб вуди дугъаз кӀуру: – Уву гьаци ву кӀурава.

⁴ Пилатди жугьдарин аьхюну маллйириз ва халкьдиз гъапи: – Узуз Гьаму Касдик саб тахсирра бихъурадарзуз.

⁵ Амма дурари гужниинди алаурайи: – Дугъу Галилей уьлкейилан ккебгъну гьамина гъяйиз, вари Ягьудия уьлке вуйибси, аьгъювалар улупури, халкьарин арайиъ наразивал ипра.

⁶ Галилейикан деебхьну, Пилатди гьерху: – Му Галилейин агьали вуйинхъа?

⁷ Хъа Иса Гьироддин вилаятдиан вуйиб аьгъю гъабшиган, Пилатди Иса гьадму йигъари Ерусалимдиъ айи Гьироддихьна гьаъру.

⁸ Иса гъяркъиган, Гьирод гизаф шад шулу. Дугъаз ухдитӀан Думу рякъюз ккунди айи, гьаз гъапиш дугъаз Исайикан гизафдар деерхьнайи ва Дугъкан саб аьламат рябкъюз миж кади айир вуйи.

⁹ Гьиродди Исайиз гизаф суалар туври гъахьну, амма Дугъу саб жавабра тувундар.

¹⁰ Жугьдарин аьхюну маллйирина аьлимари, гъудужвну, гужниинди Иса тахсиркар апӀурайи.

¹¹ Гьиродна чан эскрар, Дугъʼина аьрвалар хури, кялхъру. Исайиин паччгьаринсдар палтар алахьну, Пилатдихьна кьяляхъ гьаъру.

¹² Ва гьадму йигъан Гьиродна Пилат дустар шулу; улихьди дурар чиб-чпихъди душманвалиъ ади гъахьнийи.

¹³ Пилатди, аьхюну маллйиризна гьюкумдрариз ва халкьдиз дих дапӀну,

¹⁴ гъапи: – Учву гьаму Кас, халкь рякъʼан адаурайирси гьисаб дапӀну, узухьна гъахунчва. Хъа магьа, ичв улихь ахтармиш дапӀну, узуз гьаму Касдик учву кӀуру саб тахсирра гъибихъундарзуз.

¹⁵ Ва Гьироддизра гъибихъундар, узу Му дугъахьна гьаунза ва Мугъак йикӀбаз лайикьлу вуйи саб тахсирра дибихънадар.

¹⁶ Гьаддиз, жаза тувну, Му деетидиза. [

¹⁷ ]

¹⁸ Гьадмуган вардари сабси чӀигъар апӀуз хъюгъру: – Дугъаз аьжал, хъа учухьна Варава деет.

¹⁹ Варава, шагьриъ гъалабулугъ ипбаз ва адми йивну йикӀбаз лигну, дустагъдиъ итнайир вуйи.

²⁰ Пилатди хъанара, Иса деетуз ккунди, чан сес за апӀуру,

²¹ хъа дурари: «Хачрак карс, хачрак карс Думу!» – кӀури, чӀигъар апӀуйи.

²² Пилатди шубубпи ражари гьерхру: – Исайи фу чӀурувал дапӀнахъа? Узуз Мугъак йикӀбаз лайикьлу вуйи саб тахсирра гъябкъюндарзуз, гьаци вуйиган, Мугъаз саб бицӀи жаза тувну, деетидиза.

²³ Амма мушвʼин уч духьнайидари зарбди чӀигъар апӀури, Иса хачрак карсуб ккун апӀурайи, ва дурарин чӀигъар гъалиб шулу.

²⁴ Пилатди гьадрари кӀуруси апӀуз гьял апӀуру:

²⁵ Шагьриъ гъалабулугъ ипбазна адми йикӀбаз лигну дустагъдиъ итнайи Варав деетуру, хъа Иса дурарин ихтиярназ тувру.

²⁶ Иса гъахуз хъюгъиган, рякъюъ чан хутӀлиан гъюрайи сар Симон кӀуру Киринеяйин агьали гьахъру. Дурари, Иса карсру хач дугъан кьялʼин иливну, думу гъабхуз гъитру.

²⁷ Исайин кьяляхъди гизаф адмийир ва Дугъахъ зарбди ишурайи дишагьлийир гъягъюру.

²⁸ Исайи, дурарихьинди илтӀикӀну, гъапи: – Ерусалимдин дишагьлийир! Узухъ мишанай, хъа учвухъ ва ичв веледарихъ ишай.

²⁹ Гьамци кӀуру йигъар гъюра: «велед даршлудар, бицӀир дархьидар ва нана тутрувдар хушбахтаврар ву!»

³⁰ Гьадмуган дагълариз: «учʼина ахьай», хъа тепйириз: «учу элеркай» пуз хъюгъдичва,

³¹ адмийири ужур касдиз гьамцдар чӀуру ляхнар апӀурайган, дурари чӀуру касариз фицдар ляхнар апӀуйкӀан?

³² Исайихъди сатӀиди дариз зигбан бадали, кьюр гъачагъра хурайи.

³³ «Келле» кӀурушвʼина гъафиган, Иса ва гъачгъар, сар Исайин арччул, тмунур – гагул терефназди хачарик карсру.

³⁴ Хъа му арайиъ эскрари, тупут ипри, Дугъан палтар пай апӀурайи.

³⁵ Халкь лигури дийигънайи. Дурарин гьякимдрар Дугъʼин аьлхъюрайи: – Жарадар уьрхюри гъахьну, гъит Чав Учв уьрхри, эгер Думу Аллагьди кадагънайи Месигь вуш.

³⁶ Эскрарира, Исайиз люкьнар апӀури, Дугъан багахьна гъюри, кӀвантӀарихьна сирке хуйи

³⁷ ва гьамци кӀуйи: «Эгер Уву жугьдарин паччагь вуш, Яв Уву уьрх».

³⁸ Дугъан кӀулихъ «Му жугьдарин паччагь ву» дибикӀнайиб кебхнийи.

³⁹ Исайихъди дариз дизигнайи гъачгъарикан сари Дугъаз чӀуру гафар апӀурайи: – Эгер Уву Месигь вуш, Увура, учура уьрх.

⁴⁰ Тмунури чан юлдшиз кӀуру: – Увуз Аллагьдихьан гучӀ шуладарнуз, увузра гьациб жаза тувнайиган?

⁴¹ Ухьуз гьякьди жаза тувна, гьаз гъапиш ухьуз ихь тахсрариз лайикь вуйиб гъурубкьунхьуз, хъа Мугъу саб чӀуру ляхинра гъапӀундар.

⁴² Хъа Исайиз кӀуру: – Уву Яв Паччагьлугъдиз гъафиган, узу кӀваин апӀина, Иса!

⁴³ Исайи дугъаз гъапи: – Гьякьди кӀуразавуз, гъи Узухъди женнетдиъ хьидива.

⁴⁴ Лисундин вахт вуйи. Сабпну вари уьлкейиин сяаьт шубубдизкьан мучӀушин улубчӀвнийи.

⁴⁵ Ригъдин акв хътабтӀу ва Аллагьдин хулаъ Гирамишвахь гьибхнайи чарч гьацӀкьялʼансина гъячӀябгъю.

⁴⁶ Исайи зарбди гьарай гъапӀу: – Адаш! Йиз рюгь Яв ихтиярназ тувраза. Ва гьамци дупну, Дугъан нефес хътубтӀу.

⁴⁷ Гьаму гъябкъю эскрарин юзбашийи, Аллагьдин ад за дапӀну, гъапи: – Дугъриданна, гьаму Кас марццир вуйиштӀан!

⁴⁸ Гьаму тамашайиз лигуз уч духьнайидар, душвахь гъабшиб дябкъну, чпин мухрар убччвури, алдагъуру.

⁴⁹ Иса аьгъюкьандар вари ва Дугъахъди гъахьи Галилей уьлкейианмина гъафи дишагьлийир, ярхлаанси дийигъну, мидиз лигурайи.

⁵⁰ Гьадму арайиъ Юсуф кӀуру сар гъяни ва гьякьлу вуйи, заан диванханайин иштиракчи,

⁵¹ дидин къарарихъди рази дарши кас гъюру. Думу Аллагьдин Паччагьвализ ккилигурайи Ягьудия уьлкейин Аримафей кӀуру шагьриан вуйи.

⁵² Пилатдихьна душну, дугъу Исайин беден чахьна тувуб тӀалаб гъапӀнийи.

⁵³ Дугъу Исайин беден хачракан кадабгъну, иригъян гъибиржну, гъарзуъ дапӀнайи ва гьелелиг фужкӀа кивнадру накьвдиъ ивру.

⁵⁴ Жвуми йигъ вуйи, султ йигъ улубкьуз багахь шулайи.

⁵⁵ Исайихъди Галилей уьлкейиан гъафи дишагьлийирра, накьвдихьна дуфну, Исайин беден фици ивнаш, лигуру.

⁵⁶ Хъасин хулариз хътаку, дурари ицци ниъ хъайи аьтрарна ягъар гьязур гъапӀу, хъа султ йигъан, Къанундиъ улупнайиганси, дурар фаракьат гъахьи.