Лука 20 - Гирами Китаб

ТӀумутӀчйирикан тахалус

¹ Гьадму сад йигъан, Исайи Аллагьдин хулан гьяятдиъ Ужувлан хабарнакан аьгъювалар улупурайи вахтна, агъсакъларра хъади Дугъахьна жугьдарин аьхюну маллйирна аьлимар дуфну,

² Дугъаз кӀуру: – Учуз, Уву му ляхнар фициб гьюкмиинди апӀураш, Увуз мициб гьюкум шли тувнаш, йип.

³ Исайи дурариз жаваб вуди кӀуру: – Узура учвуз саб суал тувдиза, йипай Узуз:

⁴ Ягьʼяйин штуан апӀувал аьршариан вуйин, даршиш инсанарихьан?

⁵ Дурари, фикрарикк ккахъну, чиб-чпикди гьамци пуз хъюгъру: – Эгер ухьу «аьршариан» гъапиш, Дугъу пиди: «Учву дугъахъ гьаз хъугъундарчва?»

⁶ Хъа эгер «инсанарихьан» гъапиш, гьадмуган вари халкьди ухьʼина гъван уьлюбхиди, гьаз гъапиш халкь, Ягьʼя пайгъамбар ву кӀури, хъугъна.

⁷ Гьаддиз дурари: «Наънан вуш аьгъдарчуз» гъапнийи.

⁸ Исайи дураризра гъапи: – Узура пидарзачвуз, фициб гьюкмиинди му апӀураш.

⁹ Хъасин халкьдихьинди илдицну, Дугъу гьамциб тахалус ктибтуру: – Сар касди тӀумтӀин багъ ибтру, ва тӀумутӀчйирихьна арендайиз тувру ва учв хайлин вахтназ удучӀвну гъягъюру.

¹⁰ Вахт гъабхьиган, дугъу тӀумутӀчйирихьна чан пай тӀумтӀар хуз лукӀ гьаъру, амма дурари лукӀ дурччвну, фукӀара тутрувди утӀуккуру.

¹¹ Хъана жара лукӀ гьаъру, ва думура дурччвну, сюгмиш дапӀну, фукӀа хьтарди хътауру.

¹² Хъана шубурпирра гьаъру, дурари думура дурччвну, зийнар дапӀну, хътӀурккуру.

¹³ Гьадмуган тӀумтӀин багъдин эйсийи гъапну: «Узу гьапӀну ккунду? Йиз масан бай гьаъдиза, белки, думу дяркъну, дурариз нач шул».

¹⁴ Хъа думу гъяркъиган, тӀумутӀчйири чпин арайиъ гьамци фикир апӀуру: «Му эйсийин ирсчи ву, гъачай думу йивну йикӀухьа, ирс ухьуз гъубзди».

¹⁵ Думу, багъдиан адаъну, йикӀуру. Багъдин эйсийи дурарикан гьапӀди?

¹⁶ Учв дуфну, му тӀумутӀчйир йихиди ва багъ жарадарихьна тувди. Му гъеебхьдари кӀуруки: – Дициб ляхин саб вахтнара дарибшри!

¹⁷ Хъа Исайи, дурарилан ул илбицну, гьерху: – Хъа му дибикӀнайибдин мяна фу ву: «Устйири гатӀабхьу гъван мурччвануб гъабхьну?»

¹⁸ Гьадму гъвандиина ахъу гьарсар парчйир хьиди, хъа думу гъван шилʼина абхъиш, чархьиди.

¹⁹ Жугьдарин аьхюну маллйирна аьлимар Исайи ктибту тахалус чпикан вуйибдин гъаври ахъру. Дурари гьадмуган, Иса йикӀбан бадали, саб багьна абгури гъахьну, хъа халкьдихьан гучӀуйи.

Паччагьдинуб паччагьдиз, Аллагьдинуб Аллагьдиз

²⁰ Хъасин Дугъʼин ул алди гъитру, Дугъахъ футнакрар хъитру. Дурари, чпи зиълан дугъриди улупури, Дугъу гъапи гафарикан багьна дапӀну, хъасин Иса гьюкумдарин хилиз тувбан бадали, чарйир агуз хъюгъру.

²¹ Сабан дурари Исайихьан гьерхру: – Мялим! Учуз Уву гьякь кӀурайиб ва аьгъювалар улупурайиб, гьич сарин машназ дилигди инсанар Аллагьдин дугъри рякъюъ тӀаърайиб аьгъячуз.

²² Учуз йип: Учу Римдин паччагьдиз налук тувуз хай шулин, дарш шулдарин?

²³ Исайи дурарин аьмалдарвалин гъаври ахъну, гъапи:

²⁴ – Узуз пул улупай: мидик шлин шикилна ччвур ка? Дурари: «Рим паччагьдин» – пну, жаваб тувру.

²⁵ Дугъу дурариз кӀуру: – Гьаци вуйиган, паччагьдинуб паччагьдиз, хъа Аллагьдинуб Аллагьдиз тувай.

²⁶ Гьамци халкьдин улихь, Исайин гафариъ гьякьсузвал абгуз даршиди, Дугъан жавабниин мюгьтал духьну, дурар ккебехъу.

Ургур чвуччвуз гъушу сар хпирикан

²⁷ Гьадму вахтна гъачӀидар чӀиви шлуб дар кӀурайи саддукйирикан сакьюдари дуфну гьерхру:

²⁸ – Мялим! Мусайи учуз, эгер хпир айи чве веледар даршиди гъачӀиш, гьадгъан хпир тмуну чвуччву гъадагъну, чан чвуччвун тум арайиз дубхьну ккунду, кӀури дибикӀна.

²⁹ Ургур чве гъахьну: сарпир, хпир духну, велед даршиди гъакӀну.

³⁰ Гьадму хпир кьюрпи чвуччву чаз дитну, хъа гьадмура велед даршиди гъакӀну.

³¹ Думу хпир шубурпири, хъасин – вари ургрид чвйирира чпиз дитри, велед даршиди, вари чвйир гъийихну.

³² Аьхирки гьадму дишагьлира гъакӀну.

³³ Гьаци вуйиган, гъиямат йигъан вари чӀиви шлуган, думу шлин хпир хьиди? Ургрид чвйиризра думу швуваз гъушнийи аьхир!

³⁴ Исайи дурариз жаваб вуди гъапи: – Гьамус яшамиш шулайи гьаму аьсрин веледари швушвар хура ва швуваз гъягъюра.

³⁵ Хъа ккудудубкӀру уьмриз гъачӀихъан чӀиви хьуз лайикь вуйидари душваъ я швушвар хурдар, я швуваз гъягъюрдар.

³⁶ Дурарихьан сарун йикӀузра хьидар, фицики дурар малайикарси ву. Хъа дурар чӀиви хьувалиинди Аллагьдин веледар ву.

³⁷ Хъа гъийихдар чӀиви хьуб дугъридан гьякь вуйивал Мусайира улупураки: учв зазран рукнахь хьайиган Агъайиз «Ибрагьимдин Аллагь, Исакьдин Аллагь ва Якьубдин Аллагь» гъапнийики.

³⁸ Аллагь дийихнайидарин ваъ, хъа чӀивидарин Аллагь ву, фицики дугъандар вари чӀивидар ву.

³⁹ Мидиз аьлимарикан бязидари гъапну: – Мялим! Уву дурариз ужуди гъапунва.

⁴⁰ Сарун сарира Исайихьан гьич сабдиканра гьерхуз кӀубанвал гъапӀундар.

Месигь шлин Бай ву?

⁴¹ Хъа Исайи дурариз кӀуру: – Гьаз Месигь Давудгъярин Бай ву кӀура?

^42-43 Чав Давудри Мяълийирин китабдиъ кӀура: «Аллагьди йиз Агъайиз гъапну: Узу Яв душмнар, духну, Яв ликарикк дахьайизкьан, Йиз арччул гъвалахъ деъ».

⁴⁴ Давудри Дугъаз Агъа кӀура, гьаци вуйиган Думу дугъан Бай фици хьидихъа?

Аьлимарихьан ихтият хьуб

⁴⁵ Вари халкь хъпехъурайиган, Исайи Чан ученикариз кӀуру:

^46-47 – Ярхи палтар алди лицру къанунчйирихьан ихтият йихьай. Дурариз чпин тяриф апӀури, халкьар уч шлушвариъ чпи тебрик апӀури ккунду, мистариъ ва ипӀру-убхърушвариъ варитӀан гьюрматлу йишвариин деуз ккунидар ву. Дурари ачӀни хпарин хулар тадагъну хътитӀуру, кьюб маш гъяди гъудгнар апӀуру. Дурариз варитӀан яман жаза хьибди.