Лука 19 - Гирами Китаб

Заккай

¹ Хъасин Иса, Ерихондиъ учӀвну, шагьриантина гъягъюри гъахьну.

² Душваъ налук гъюдюбхрударин аьхюр вуйи Заккай кӀуру сар девлетлу кас айи.

³ Дугъаз Иса рякъюз ва фицир вуш лигуз ккун гъабхьи, амма халкьдигъян рякъюз шуладайи, фицики Заккай жандкин исчӀлир вуйи.

⁴ Хъа улихьинди жаргъну, Иса рякъбан бадали, Заккай инжирин гьаригъ гъючӀвру, гьаз гъапиш Иса гьадушвхьантина душну ккунди айи.

⁵ Исайиз, душвахьна гъафиган, Заккай рякъюру ва кӀуру: – Заккай! Чикиди гъюдучӀв, фицики гъи Узу яв хулаъ хялижв духьну ккунду.

⁶ Дугъу, дишлади гъюдучӀвну, Иса чан хулаъ шадвалиинди кьабул апӀуру.

⁷ Му гъябкъю халкьдик гъал кабхъру ва, Иса гунагькар касдихь дергну кӀури, наразиди улхури гъахьну.

⁸ Заккайи Агъайиз кӀуруки: – Агъа! Йиз девлетнан гьацӀ узу касибариз тувдиза ва, эгер узу шлихьан артухъ гъадабгънуш, юкьуб ражари артухъ тувдиза.

⁹ Исайи дугъаз гъапи: – Гъи му хулазра уьрхювал гъафну, фицики мура Ибрагьимдин насликан ву.

¹⁰ Инсаниятдин Бай пуч шулайидар агуз ва ккадагъуз дуфнайир ву.

¹¹ Гьамдихъ хъпехъурайидариз Исайи сабсана тахалус ктибтуру, фицики, Думу Ерусалимдиз багахь духьнайиган, гизафдари, лап багарихьди Аллагьдин Паччагьлугъ улубкьиди пну, фикир апӀурайи.

¹² Гьаци вуйиган Исайи кӀуру: – Заан тухмиан вуйи сар кас, учв паччагьвализ тяйин апӀбан кьяляхъ хътакуз кӀури, ярхла уьлкейиз гъягъюру.

¹³ Рякъюъ учӀвайиз, дугъу чан йицӀур гъуллугъчийиз дих дапӀну, гьардихьна йицӀуб гъизилин манат тувру ва кӀуру: «Узу хътакайиз, му пул ляхник кипай».

¹⁴ Хъа му юрднан агьалйириз думу ккунир дайи, ва дугъан кьяляхъди учв гъягърушваз адмийир гьаъру: «Дугъу ич паччагьвал дапӀну ккундарчуз» пуз.

¹⁵ Мидизра дилигди, паччагьди тяйин дапӀну хътакиган, чав пул туву гъуллугъчйириз, шли фу гъазанмиш гъапӀнуш аьгъю апӀбахъди, чахьна дих апӀуру.

¹⁶ Сарпири дуфну кӀуру: – Агъа, яв саб гъизилин манатди йицӀуб гъизилин манат гъазанж гъабхну.

¹⁷ Агъайи дугъаз гъапну: – Аферин увуз, ужур гъуллугъчи! Уву бицӀи ляхниъ дугъри хьувализ яв хилиз йицӀуб шагьур гъадагъ.

¹⁸ Кьюрпири дуфну кӀуру: – Агъа, яв саб гъизилин пули хьуб гъизилин манат гъазанж гъабхну.

¹⁹ Мугъазра кӀуру: – Увухьнара идара апӀуз хьуб шагьур тувраза.

²⁰ Шубурпири дуфну кӀуру: – Агъа, магьа яв гъизилин манат: ягълухъигъ гъивну гъюбхюнза.

²¹ Фицики узуз увхьан гучӀ гъабхьнийзуз, гьаз гъапиш уву инсафсуз адми вува: жвуву дидривуб гъадабгърур ва жвуву дурубзуб ккадабцӀрур.

²² Паччагьди дугъаз гъапну: – Узу яв гафариинди яв диван апӀидиза, аьмалдар лукӀ! Увуз узу инсафсуз адми вуйиб, жвуву дидривуб гъадабгърур ва жвуву дурубзуб ккадабцӀрур вуйиб аьгъяди,

²³ уву йиз пул, узуз гъазанж гъюруганси, гьаз ишлетмиш гъапӀундарва?

²⁴ Ва чан улихь дийигънайидариз кӀуру: – Дугъахь хьайи пул дибисну, йицӀуб гъизилин пул хьайириз тувай.

²⁵ Хъа дурари паччагьдиз кӀуру: – Я агъа, дугъахь йицӀуб гъизилин манат гьацира хьа.

²⁶ – КӀуразачвуз, гьарсар айириз хъана тувну хьибди, хъа адрурихьан айибра тадабгъиди.

²⁷ Хъа узу чпин паччагь духьну даккни, йиз душмнар гьамина аькъинай ва йиз улихь урччвай.

²⁸ Гьамци дупну, рякъ давам апӀури, Иса Ерусалимдиз багахь шулайи.

²⁹ Елион дагъдихь, Вифагия ва Вифания гъуларихьна багахь шулайиган, Дугъу Чан кьюр ученик, гьамци дупну, дина гьаъру:

³⁰ – Гьатму гъаншариъ айи гъулаз гъарахай, душваъ учӀвиган, мегьел сар каскьан элелеу, дибтӀнайи гъудугъ бихъидичвуз. Думу тудубчну гьамина аьбкъинай.

³¹ Нагагь шликӀа: «Му гьаз тудубчурачва?» пну, гьерхиш, дугъаз гьамци йипай: «Думу Агъайиз бакарди ву».

³² Гьаъдар гъушу ва, Исайи гъаписи, дурариз гъудугъ бихъуру.

³³ Дурари гъудугъ тудубчурайиган, дидин эйсийи дурарихьан гьерхру: – Гъудугъ гьаз тудубчурачва?

³⁴ Дурари жаваб тувру: – Думу Агъайиз бакарди ву.

³⁵ Думу Исайихьна хуру. Даждиин чпин палтар илирчну, хъасин Иса дидʼин илитуру.

³⁶ Иса гъягъруган, халкьди рякъюкк чпин палтар ккирчуйи.

³⁷ Хъа Думу Елион дагъдин канчӀлихъна гъурукьиган, вари Дугъан ученикари шадвалиан, чпиз гъяркъю вари аьламатарин сагълугънаан, зарб сесниинди Аллагьдин тяриф апӀуз хъюгъру:

³⁸ – Агъайин ччвурнахъди гъюрайи Паччагьдиз ужʼвал ишри! Завариин мясляаьт, аьршариъ ад ибшри!

³⁹ Халкьдин арайигъян бязи фарисйири Исайиз кӀуру: – Мялим! Яв ученикариз гъадагъа апӀин.

⁴⁰ Хъа Дугъу дурариз жаваб вуди кӀуру: – КӀуразачвузки, нагагь дурар ккебехъиш, гъванар улхиди.

⁴¹ Хъа Ерусалимдиз багахь гъашиган, дидиз лигури, Иса гъишу.

⁴² Хъа кӀуру: – Хуб ужу шлийи, эгер увуз мясляаьт шли хураш, гьамус аьгъю гъабхьнийиш! Амма му яв уларихьан гьамусяаьт гьебкна.

⁴³ Увʼин гьацдар йигъар улуркьидики, яв душмнари увлан барйир илтӀикӀиди, кьялаъ тӀапӀди ва варишварихъанди увʼина гьюжум апӀиди.

⁴⁴ Ва яв веледарихъди уву ккидипиди, яв гъван гъвандиин гъибтидар, фицики увухьна Аллагь гъафи йигъ аьгъю гъабхьундарвуз.

⁴⁵ Хъасин Аллагьдин хулаъ учӀвну, Дугъу душваъ шейʼар масу туврайидарна гъадагъурайидар, гьамци кӀури, утӀурккуру:

⁴⁶ – Гирами китабариъ дибикӀна: «Йиз хал ккарагру хал хьибди», хъа учву дидкан тӀарашчйирин мугъара дапӀначва.

⁴⁷ Хъа гьаддихъантина Исайи Аллагьдин хулаъ гьар йигъан аьгъювалар улупури гъахьну. Жугьдарин аьхюну маллйирина, аьлимарина халкьдин улихь хьайидари Думу йикӀуз чара абгури шулу.

⁴⁸ Хъа бихъури гъабхундар, гьаз гъапиш халкь, Дугъхьан гьудудучӀври, Дугъахъ хъпехъури шуйи.