Лука 1 - Гирами Китаб

Лукайин Феофилихьна вуйи гаф

¹ Ич арайиъ гъаши мялум вуйи гьядисйирин гьякьнаан гьамус гизафдари бикӀуз хъюгъна.

² Учузра дурар сифте кӀулиан чпин улариинди гъяркъдари ва Аллагьдин Гафнан гъуллугъниин алидари гизафдар ктитну.

³ Узура, гьарсаб жигьат дикъатниинди сифтейиан аьхиризкьан ахтармиш апӀбалан кьяляхъ, гьамрарикан увуз, гьюрматлу Феофил, хъайи-хъайиси дибикӀну, ктибтуб лазим вуди фикир гъапӀунза.

⁴ Миди увуз туву аьгъюваларин бин мюгькам апӀиди.

Малайикди Закарʼяйиз Ягьʼя бабкан хьубкан туву хабар

⁵ Ягьудия уьлкейин паччагь Гьироддин девриъ душваъ Абияйирин «ражнаъ» гъуллугъ гъабхурайи Закарʼя кӀуру сар малла ва Гьарундин тухмиан вуйи Елисавета кӀуру дугъан хпир ади гъахьну.

⁶ Дурар кьюридра, Аллагьдин вари табшуругъар ва къайдйир уьрхюри, Дугъан улихь дугъри агьлар вуди гъахьну.

⁷ Дурариз веледар адайи, гьаз гъапиш Елисавета бегьерсузур вуйи. Дурар кьюридра агьли яшнахъна хъуркьнайи.

⁸ Сабан, Закарʼяйи Аллагьдиз чан гъуллугъ апӀурайи вахтна (дугъахъди хъайи маллйирин раж, яна гъуллугънан нубат хъубкьнайи),

⁹ маллйирин арайиъ, аьдат вуйиганси, тупут ипиган, думу Аллагьдин хулаъ ицци ниъ хъайидар ургуз гъягъбакк ккуркьнийи.

¹⁰ Хъа Аллагьдин хулан гьяятдиъ халкь му вахтна ккарагурайи.

¹¹ Гьадмуган Закарʼяйиз ицци ниъ хъайидар ургурайишван арччул терефнаъ Аллагьдин малайик дийигъну рякъюру.

¹² Думу гъяркъган, Закарʼя чашмиш шулу ва дугъак яманди гучӀ кабхъру.

¹³ Малайикди дугъаз гьамци кӀуру: – ГучӀ мапӀан, Закарʼя, яв ккарагувал деебхьна, ва яв хпир Елисаветайи увуз бай апӀиди, дугъʼин Ягьʼя кӀуру ччвур илив.

¹⁴ Увуз хушʼвална шадвал хьибди, ва гизафдар думу бабкан хьувалиин шад хьиди,

¹⁵ фицики думу Аллагьдин улихь, зурба касси, заан хьиди. Дугъу чяхир вая жара ички убхъидар. Думу чав бабкан гъахьи йигъхъанмина Аллагьдин Рюгьнахьди ацӀнайир хьиди.

¹⁶ Дугъу Израилин баярикан гизафдар Аллагьдихьинди илтӀикӀиди.

¹⁷ Абйирин юкӀвар веледарихьна илдицбан бадали, мютӀюгъ дарудар марцци касарин фикрарихьна илтӀикӀбан бадали ва Агъа гъяйиз халкь гьязур апӀбан бадали, думу Дугъан улихьди Илʼясдин рюгьнаъди ва кьудратнаъди гъягъюри хьиди.

¹⁸ Закарʼяйи Малайикдиз кӀуру: – Му гьякь вуйиб узуз фици аьгъю хьибди, узу кьабир вуза, хъа йиз хпирра агьли яшариъ а?

¹⁹ Малайикди дугъаз гъапи: – Узу Аллагьдин улихь дийигънайи ва увухьна ужуб хабар тувуз гьаънайи Жабраил вуза.

²⁰ Амма гьадму ляхин кӀулиз удубчӀвру йигъ гъяйиз, яв чӀал бисиди ва увуз улхуз мумкинвал хьибдар. Гьаз гъапиш чарасуз кӀулиз удучӀвру му йиз гафарихъ хъугъундарва.

²¹ Му арайиъ чӀат Закарʼяйиз ккилигурайи халкь думу Аллагьдин хулаъ энгел духьнайивалиин мюгьталди айи.

²² Думу халкьдихьна удучӀвиган, улхуз даршули гъузру ва дурариз, Закарʼяйиз Аллагьдин хулаъ Малайик гъяркъюб, аьгъю шулу. Закарʼяра, лал гъаширси, халкьдихъди хилин ишаратариинди улхуз хъюгъру.

²³ Хъа Аллагьдин хулаъ гъуллугъ апӀбан йигъар ккудукӀиган, Закарʼя чан хулаз хътакуру.

²⁴ Гьадму йигъарилан кьяляхъ дугъан шив Елисавета, гъагъдиъ духьну, хьуб вазлин арайиъ чӀатна удудучӀвди, учв улупури гъахьундар. Дугъу гьамци кӀуйи:

²⁵ – Гьаму йигъари узухьинди илдицу Аллагьди инсанарин арайиъ узʼин али бегьерсузвалин нянат алдабгъруганси гъапӀну.

Малайикди Марʼямдиз Иса бабкан хьуваликан туву хабар

²⁶ Хъа йирхьубпи ваз улубкьиган, Аллагьди Галилей уьлкейиъ айи Назарет кӀуру шагьриз

²⁷ Давудрин тухмиан вуйи Юсуф кӀуру касдиз хъирснайи шурахьна Жабраил малайик гьаъру. Шуран ччвур Марʼям вуйи.

²⁸ Малайикди, риш айи хулаъ учӀвну, гъапну: – Хайир ибшри, Аллагьди кадагънайи Дишагьли! Аллагь гьарган увухъди хъади хьиди!

²⁹ Думу гъяркъиган, Марʼям дугъан гафариин мюгьтал шулу ва, учв мици саламламиш апӀувал фу вуйкӀан кӀури, фикрарик кахъру.

³⁰ Хъа малайикди дугъаз гъапну: – ГучӀ мапӀан, Марʼям, Аллагьди увуз ужʼвал улупна:

³¹ магьа БицӀир киршдивук ва Бай апӀидива. Дугъʼин Иса кӀуру ччвур иливидива.

³² Думу зурба Кас хьиди, ва Дугъаз ВаритӀанзаанурин Бай пиди. Агъа Аллагьди Дугъаз Чан аба Давудрин паччагьвалин тахт тувди.

³³ Дугъу Якьубдин халкьдиин уьмурлугъди паччагьвал апӀиди, ва Дугъан паччагьвалин аьхир хьибдар.

³⁴ Марʼямди малайикдиз кӀуру: – Му ляхин хьуб фици мумкин вухъа, узу мегьел швуваз душнадарди?

³⁵ Малайикди Дугъаз гъапи: – Аллагьдин Рюгь учӀвди увуъ ва ВаритӀанзаанури уву Чан кьувватнакк ккаъди, гьаддиз бабкан шулайи Гирамийиз Аллагьдин Бай пиди.

³⁶ Магьа чаз бегьерсузур кӀурайи яв багахьлу Елисаветара чан кьабишнаккди, бицӀир кади гъагъдиъ ади, йирхьубпи ваз ву,

³⁷ гьаз гъапиш Аллагьдин гьич саб гафра кьувватсузди гъубзурдар.

³⁸ Марʼямди: – Узу Аллагьдин лукӀ вуза, узʼин уву кӀурайидар улуркьри, – кӀуру. Хъа малайик Дугъхьан гьудучӀвуру.

Марʼямдинна Елисаветайин сюгьбат

³⁹ Гьадму йигъарикан сад йигъан Марʼям, гьялаквал кади, Ягьудия уьлкейин дагълариъ айи саб шагьриз гъягъюру

⁴⁰ ва, Закарʼяйин хулаъ учӀвну, Елисаветайиз салам тувру.

⁴¹ Марʼямдин салам гъеебхьиган, Елисаветайин фуниъ бицӀир гъиришву ва Елисавета Аллагьдин Рюгьнахьди ацӀру.

⁴² Елисаветайи, зарбди чӀигъ дапӀну, гъапну: – Уву дишагьлийирин арайиъ бахтавар вува, ва яв фуниъ айи бегьерра бахтавар ву!

⁴³ Узухьна йиз Агъайин дада гъювалин бахт узуз наънан гъафиб вуйкӀан?

⁴⁴ Яв салам туврайи сес йиз ибарихъна гъурубкьубси, йиз фуниъ айи бицӀир шадди гьялак гъахьну.

⁴⁵ Аллагьдихьан дупнайиб тамам шлувалихъ хъугънайир, хуш бахтавар вува.

⁴⁶ Марʼямди гьамци жаваб тувру: – Узу йиз кӀваан Агъа заан апӀураза.

⁴⁷ Йиз рюгь узу гьарсабдихьан уьрхюрайи Аллагьдикан шад духьна.

⁴⁸ Дугъу чан лукӀран аьжуз гьялназ лигну рягьим гъапӀну, гьамусдихъантина вари наслари узуз ужʼвал алабхъу кас пиди,

⁴⁹ Гьаз гъапиш Кьувватлури узуз зурба ляхин гъапӀну, ва Дугъан ччвур гирами ву.

⁵⁰ Чахьан гучӀрудариз наслариан наслариз Дугъан ужʼвал а.

⁵¹ Дугъу, Чан хиларин кьувват улупури, кӀваъ дамагълу фикрар айидар гьубкьушвахъинди гъарагъну.

⁵² Кьудратлудар тахтарилан илдитну ва аьжузар заан гъапӀну.

⁵³ Дарвал айидар ужувлариинди рази гъапӀну, хъа девлетлутӀан девлетлу шулайидар фукӀа адарди деетну.

^54-55 Чан гъуллугъниин али Израилин халкьдиз кюмек гъапӀну, Чав ихь абйириз гъапиганси, Ибрагьимдиз ва дугъан тухмиз гьаргандиз ужʼвал апӀуз тувнайи гаф кӀваин уьбхюра.

⁵⁶ Марʼям Елисаветайихь шубуб вазлиъкьан гъузну, хъа чан хулаз хътакуру.

Ягьʼя бабкан хьуб

⁵⁷ Елисаветайи, вахт улубкьиган, бицӀир апӀуру.

⁵⁸ Агъайи рягьим дапӀну думу за апӀбакан гъуншйиризна майил-мадатдиз гъеебхьнийи ва дурар дугъахъди сабси шад гъахьнийи.

⁵⁹ Миржидпи йигъан багахьлуйир бицӀирин суннат апӀуз гъюру ва дугъʼин чан адашдин ччвур Закарʼя иливуз ккун шулу.

⁶⁰ Мидʼин балин дада рази даршиди, дугъаз Ягьʼя кӀурхьа, гъапну.

⁶¹ Хъа дугъаз: «Яв багахьлуйиригъ дициб ччвур алир фужкӀа гъядар», кӀуру.

⁶² Хъасин, балʼин фициб ччвур иливуруш, хилин ишаратариинди Закарʼяйихьан гьерхру.

⁶³ Дугъу, чахьна чан кьул хуз гъитну, дидик гьамци бикӀуру: «Дугъан ччвур Ягьʼя хьибди». Хъа вари мюгьтал шулу.

⁶⁴ Гьадму сяаьт дугъан ушвна мелз деебтнийи ва думу, Аллагьдин ад апӀури, улхуз хъюгъру.

⁶⁵ Дурарин гъуншйир-мирасарик гучӀ кабхъру ва вари гьамрарикан бютюн дагълу Ягьудия уьлке вуйибси ктибтури гъахьну.

⁶⁶ Мидкан гъеебхьдари, мурар чпин кӀваъ уьрхюри, гьамци кӀури гъахьну: – Аллагьдин хил али му балкан фуж шуйкӀан?

Закарʼяйин чан балихьна вуйи гаф

⁶⁷ Хъа балин адаш Закарʼяйира, Аллагьдин Рюгьнахьди ацӀнади, гьамци кӀури, чан аьяндарвал улупуру:

⁶⁸ – Израилин Аллагь вуйи Агъайиз чухсагъул! Дугъу, кюмекназ дуфну, Чан халкь азад гъапӀну.

^69-70 Дегьзаманайи гъахьи марцци пайгъамбрарин мелзналан мялум гъапӀубси, Дугъу Чан лукӀ вуйи Давудрин тухмиан Кьудратлур – ухьу гунгьарикан азад АпӀрур – адаъну.

⁷¹ Дугъу ухьу вари ихь душмнарихьан ва ухьу даккнидарихьан уьрхюз гаф тувну.

⁷² Дугъу ихь абйириз ужʼвал апӀуз ва дурарихъди гъийитӀу гирами вуйи йикьрар тамам апӀуз гаф тувну.

⁷³ Му йикьрар Аллагьди ихь аьхю аба Ибрагьимдиз ухьу душмнарихьан уьрхюз туву аьгьт ву:

^74-75 Дурари ухьуз, гучӀ дарди, ихь уьмрин кӀулиан аьхиризкьан Дугъан улихь марцциди ва гьякьди гъуллугъ апӀуз гъитди.

⁷⁶ Хъа увуз, йиз бай, ВаритӀанзаанурин пайгъамбар пиди, гьаз гъапиш уву Агъайин улихьди Дугъаз рякъяр ккабалгуз,

⁷⁷ Дугъу халкь уьрхрувалин ва инсанарин гунгьарилан хил алдабгърувалин гьякьнаан халкь гъаврикк ккауз,

⁷⁸ Аллагьдин зурба ужʼвал ахсрарин Нурси ухьʼина дуфну,

⁷⁹ МучӀушнаъ ва аьжалин гъабгъу дяхъникк деънайидариз акв тувуз, ихь рякъяр мясляаьтниина хуз, гъидива.

⁸⁰ БицӀи Ягьʼя, аьхю шули, рюгьниинди мюгькам хьуз хъюгъру. Думу, Израилин халкьдиз гъуллугъ апӀуз гъяйизкьан, ичӀи чюллериъ яшамиш шулу.