Коринф-1 5 - Гирами Китаб

Хъугърударин арайиъ улдугнайивал

¹ Узуз ичв арайиъ Аллагь аьгъдрударин арайиъкьан даршлу кьяппавал абхънайиваликан хабар деебхьназуз: ичвдарикан сар чан адашдин хпирихъди хъа кӀура.

² Хъа учвук фурсарра кучӀвначвук! Мици хьайиз, гъамлу духьну, ичв арайиан гьациб гъапӀур утӀуккуб лайикь дайинхъа?

³ Узу бедендиинди учвухъди хътаршра, йиз рюгьниинди хъаза, ва, гьадму касдикан гьапӀруш, гьамустӀанра гьял гъапӀунза:

⁴ ихь Агъа Исайин ччвур бадали учву уч гъахьиган, хъа узу учвухъди йиз рюгьниинди хьидиза ва ухьухъди ихь Агъа Исайин кьувват хьибди,

⁵ учву думу адми иблисдин хилиз тувну ккунду, ва дугъан беден, Гьаргандин Агъа кьяляхъ гъюру Йигъан дугъан рюгькьан дюрхну хьузди, йибкӀри.

⁶ Учвуз фурс апӀуб рубкьудар. Учвуз, дунин тикийи вари хямир утуз гъитруб, аьгъдарди анчвуз?

⁷ Гьаци вуйиган, учву таза, дун ктру хямир хьпан бадали, зат имдарди йирси дунихьан марцц йихьай. Учву гьаци духьну ккунду, фицики ихь Пасха машквран ччил, Месигь, сарун гъурбан гъапӀну.

⁸ Гьаци вуйиган, гъачай, Пасха машквар, йирси дунин чӀурувалииндина писвалиинди ваъ, хъа дун ктру марцци ва гьякь уьлʼинди тебрик апӀидихьа.

⁹ Узу учвкан йиз гъубшу кагъзиъ, улдугнайидарихъди гьич саб аьлакьа дарибшри кӀури, тӀалаб гъапӀнийза,

¹⁰ аммаки узу, гьаму дюнʼяйин адмийирикан – кьяппйирикан, тямягькрарикан, тӀафларикан, идолариз икрам апӀрударикан, гъапундайза. Дици вуйиш, учву му дюнʼя дипбакк ккуркьдийи!

¹¹ Хъа узу, учв кьяппа, тямягькар, идолариз икрам апӀрур, футнакар, пияниска, кучӀлях вуди, гъардаш вуза кӀури, лицурайирикан, кӀураза. Мицирихъди саб суфрайихъ ипӀузкьан мипӀанай.

^12-13 Хътругърударин суд апӀуб йиз ляхин дариз – дурарин суд Аллагьди апӀиди! Учву хъугърударин суд дапӀну ккунду, фицики дибикӀна: «Яв арайиан писур адаъ».