Эвел 9 - Гирами Китаб

Заанурин Нюгьдихъди вуйи йикьрар

¹ Заанури Нюгьна дугъан баяр ужувлакк ккаъру хъа кӀуру: – Бегьерлу ва артухъ йихьай ва жил алабцӀай.

² Гъит гучӀ ибшри, гъит гукӀниди юкӀв утӀубччвури ишбри учвхьан жилин вари гьяйванатариз, завун вари ничхрариз, жилин вари чӀивишнариз, гьюлерин вари балугъариз – мурар вари ичв хилариз тувна.

³ Вари гьяйванатар учвуз хурагди, муганайиз вари чрушин тувганси, тувразачвуз.

⁴ Аммаки ифи удудубзди йикк мипӀанай, фицики ифи уьмур ву.

⁵ Ичв ифи удубзурикан (яни уьмур кьатӀ гъапӀурикан) Узу жаваб ккун апӀидиза: гьяйванатди удубзиш – гьяйванатдикан, адмийи чавсирин удубзиш – адмийикан.

⁶ Шли адмийин ифи удубзиш, гъит гъадгъан ифира жарари удубзри, фицики адми Заануриз ухшар вуди дапӀнайир ву.

⁷ Бегьерлу ва артухъ йихьай, дюнʼя алабцӀай ва артмиш йихьай.

⁸ Заанури Нюгьдизна дугъан баяриз гьамци кӀуру:

⁹ – Узу Йиз йикьрар учвухъди, учвлантина шлу ичв насларихъди,

¹⁰ гимийиан учвухъди удучӀву вари жан алибдихъди: ничхрарихъди, мал-къарайихъди ва гьяйванатарихъди – жилиин али варибдихъди, йитӀураза.

¹¹ Узу учвухъди йикьрар йитӀураза: сарун шту вари чӀивиб пуч апӀидар. Сарун шту жил ичӀи апӀидар.

¹² Заанури гъапи: – Узу гьаргандиз, насларилан наслариз учвухъди ва вари чӀивибдихъди гъийитӀу му йикьрарнан лишан магьа:

¹³ Узу дюньяйин агьларихъди гъийитӀу йикьрарнан лишан вуди, дифариин Йиз гъяд – деккучӀимир дебккраза.

¹⁴ Узу дифар жилин зиина уч гъапӀган, дифарин арайиъ деккучӀимир арайиз гъибди.

¹⁵ Хъа гьадмуган Узу, учвухъдина вари чӀивибдихъди гъийитӀу Йиз йикьрар кӀваин апӀидиза – вари чӀивиб пуч апӀру шид улубчӀвувал сарун хьибдар.

¹⁶ ДеккучӀимир дифарин арайиъ ачмиш хьибди – думу Узуз рябкъидизуз ва, дюньяйин вари агьларихъди гъахьи Йиз гьаргандиз вуйи йикьрар кӀваин апӀидиза.

¹⁷ Заанури Нюгьдиз гъапи: – Му жилиин яшамиш шулайи гьарсарихъди Узу гъийитӀу йикьрарнан лишан ву.

Нюгьдин баяр

¹⁸ Сим, Хам ва Яфет – мурар гимийиан удучӀву Нюгьдин баяр ву. Хам Ханаандин адаш вуйи.

¹⁹ Мурар шубридра Нюгьдин баяр вуйи, гьадрариланмина дюнʼяйин вари халкьар арайиз гъафну.

²⁰ Нюгьди жил тартиб апӀуру ва сарпирди тӀумутӀ кивуз хъюгъру.

²¹ Чяхир дубгъну, пиян духьну, Нюгь гъяцӀалди чан чадрикк дахънайи.

²² Хъа Ханаандин адаш вуйи Хамдиз чпин адашдин гъяцӀливал рябкъюру ва удучӀвури чан кьюрид гъардшариз ктибтуру.

²³ Хъа Симдина Яфетди, палтар гъадагъну, чпин гъюнариин илирчну, кьяляхъ-кьяляхъди душну, чпин адашдин гъяцӀливал ккебкру. Чпин адашдин гъяцӀливал дярябкъюз, дурар жара терефназди гъилигнийи.

²⁴ Пиянвал ктубчӀвган, Нюгь уягъ шулу ва чан бицӀину бали гъапӀубдикан аьгъю шулу.

²⁵ Хъа кӀуру: – Ханаан балайикк ккахъри учв! Чан гъардшарин лукӀтӀан лукӀ хьуз ужур!

²⁶ Хъа кӀуру: – Симди икрам апӀурайи Заануриз, РАББИЙИЗ, шюкюр ибшри! Хъа Ханаан гъардшариз лукӀ ишри!

²⁷ Гъит Заанури Яфетдин уьлке яркьу апӀри! Гъит Симдин чадрарикк Яфет яшамиш ишри! Хъа Ханаан гъардшариз лукӀ ишри!

²⁸ Хъа Нюгь, жил шту ккапӀбалан кьяляхъ, шубудваржна хьцӀур йисансана яшамиш шулу.

²⁹ Нюгьдин вари урчӀвудваржна хьцӀур йис шулу, хъа думу йикӀуру.