Эвел 8 - Гирами Китаб

Шту дюнья ккапӀну ккудубкӀуб

¹ Заанурин Нюгьна, дугъахъди гимийиъ айи хулан ва вягьши вари гьяйванатар кӀваин алийи. Заанури жилиин микӀ утӀубччвуз гъитру ва штар кьяляхъ гъягъюру.

² Жилин бушлугъарин булагъар хъяркьру, заварин улдар хъирхьру, мархь ктӀиппуру.

³ Шид явашди жилилан улдубчӀвурайи. Штар варжна хьцӀурпи йигъаз цӀиб хьуз хъюгънийи.

⁴ Ургубпи вазли, вазлин йицӀиургудпи йигъан Арарат дагълариъ гими дийибгънийи.

⁵ ЙицӀубпи вазлиз штар яваш-явашди айибтӀан кам хьуз хъюгънийи. ЙицӀубпи вазлин садпи йигъан дагъларин кӀакӀар кказаргнийи.

⁶ ЯгъчӀвур йигълан Нюгьди гимийин чав гъапӀу улд абццру

⁷ ва хъют деебтуру. Думу, шидхьан жил азад хьайиз, мина-тина тӀибхури гъубзру.

⁸ Хъасин Нюгьди, жилилан шид улдубчӀвнуш аьгъю апӀуз, луф деебтуру.

⁹ Луфраз чан ликар дивуз ужуб йишв гъибихъундайи ва гимийиз кьяляхъ гъитӀибхнийи, фицики сабан дюнʼяйиин шид илмийи. Нюгьди хил гьачӀабккну, луф чахьди гимийизди хуру.

¹⁰ Ургуд йигълан дугъу луф хъана деебтуру.

¹¹ Луф дугъахьна хябяхъдин вахтна гъюру. Дидин ушвнигъ олива гьарин таза кюл гъяйи. Сарун Нюгьдиз жилилан шид улдубчӀвуб аьгъю шулу.

¹² Думу ургуд йигъансана ккилигури гъузру. Хъасин луф деебтуру, сарун думу кьяляхъ гъафундайи.

¹³ Нюгьдин уьмрин йирхьудваржна садпи йисан ва гьадму йисандин садпи вазлин садпи йигъан жилилан шид кам гъабхьнийи. Нюгьди гимийин гъваъ абццру, лигуруш, жилилан шид улдубчӀвнайи.

¹⁴ Кьюбпи вазлин къанна ургудпи йигъан, жил гъеебцциган,

¹⁵ Заанури Нюгьдиз гъапну:

¹⁶ – Гимийиан яв хпирра, баярра, баярин хпарра хъади удучӀв.

¹⁷ Вари чӀивишнар: ничхрар, гьяйванатар, мал-къара ва вари гьяшаратар адаъ. Гъит дурари вари дюнʼя алабцӀри, дурар бегьерлу, артмиш ва артухъ ишри.

¹⁸ Хъа Нюгь чан хпир, баяр ва баярин хпар хъади удучӀвуру.

¹⁹ Дурарин кьяляхъди гьарсаб жинснан жилин вари гьяйванатар жа-жаради – нахшрар, гьяшаратар, ничхрар удучӀвуру.

²⁰ Нюгьди РАББИЙИЗ гъурбан апӀрушв дивру. Хъа Нюгьди душвʼин, гьарсаб гьялал гьяйванатдикан ва вари гьялал ничхрарикан гъадагъну, вари цӀигъ дургну, гъурбан апӀуру.

²¹ РАББИЙИЗ кабалгру ниъ гъюру ва Чан кӀваъ гьамци кӀуру: «Инсан себеб духьну, сарун Узу дюнʼя балайикк ккипидарза. БицӀидихъанмина инсандин апӀурайи фикир ужуб даршра, Узу вари жан алиб сарун тӀанкь апӀидарза.

²² Сабан, дюнʼя имбукьан гагьди, убзубна ккадабцӀуб, аьхълушинна манишин, хьадна кьюрд, йигъна йишв ккудуркӀидар».