Эвел 50 - Гирами Китаб

¹ Юсуфди адашдин бедендилан хабар алдагъуру ва, ишури, дукӀнайирин машназ мак гъапӀу.

² Юсуфди чан гъуллугънаъ айи жярягьариз Израилин беден дурубтӀуз мялгьямариан апӀуз буйругъ туву.

³ ЯгъчӀвур йигъан, гьаци апӀуз гьадмукьан йигъар гъягъюйи, жярягьари беден мялгьямариан апӀури гъахьи ва ургцӀур йигъан египтари дерд-гъам зигури имийи.

⁴ Саламдин вахт ккудубкӀиган, Юсуфди фяряуьндин багахь хьайи гъуллугъчйирикан гьамци пуб ккун гъапӀу: – Эгер узу ичв улихь гьюрмат гъазанмиш гъапӀнуш, фяряуьндиз гьамци йипай:

⁵ йиз адашди учв гъачӀиган, улихьдимиди Ханаандиъ чав гьязур дапӀнайи дюрхъяъ кив дупну, узухьди чаз гаф тувуз гъитну. ТӀалаб апӀураза, узу йиз адаш кивуз дина деетуб, хъа, думу кивну, кьяляхъ гъидиза.

⁶ Фяряуьнди ихтияр туву: – Гъарах, яв адаш кив. Яв туву гаф тамам апӀин.

⁷ Юсуф адаш кивуз гъушу. Дугъахъди фяряуьндин вари гъуллугъчйир, агъсакълар ва Египет жиларин вари аьхюдар,

⁸ Юсуфдин вари хизан, дугъан вари гъардшар, ва вари дугъан тухум гъушу. Гошен ругариин анжагъ мал-къарана бицӀидар гъузнийи.

⁹ Дугъахъди аьрабйир, атлуйир ва кьадарсуз халкь хъайи.

¹⁰ Иордан нирин тмуну гъирагъдихъ хъайи Горен-Атаддихьна хъуркьиган, дурари варидари зурба ва учӀвру ишуб ккебгънийи – ургуд йигъан дурар Юсуфдин адашдихъ ишури имийи.

¹¹ Думу ругариин яшамиш шулайи хананей адмийириз Горен-Атаддиъ айи салам гъябкънийи ва гьамци пуз хъюгънийи: – Фукьан учӀвруди ишурадарин египтар! Иордан нирин тмуну гъирагъдихъ хъайи думу йишваз Авел-Мицраим («египтарин ишал») кӀури гъахьи.

¹² Баяри чпин адаш Якьубдин буйругъ тамам гъапӀнийи:

¹³ дугъан беден Ханаандиз гъубхнийи ва Мамрейихьан ярхла дарди Махпела хутӀлиин али, саб вахтна Ибрагьимди хеттжви Эфрундихьан гъийихдар кивру йишв вуди гъадабгъу, дюрхъяъ кивнийи.

¹⁴ Якьуб кивбалан кьяляхъ, Юсуф, дугъан гъардшар ва вари хъади гъахьидар Египетдиз кьяляхъ хътаркнийи.

¹⁵ Гьамус, адаш йикӀбалан кьяляхъ, Юсуфдин гъардшар фикрарик кахъу: «Гьамусра Юсуфдик ухькан хъял кмишул белки, хъа эгер дугъаз, чаз туву дердналан хъял алдабгъуз ккун гъабхьиш, фу шулу?»

¹⁶ Дурари Юсуфдихьна гьамци йипай кӀури гьаъру: – Учв йикӀайиз ихь адашди увуз

¹⁷ гьамциб васият гъапӀнийи: «ТӀалаб апӀураза, гъардшарин гуннагьдилан – увуз дурари гъапӀу писвалилан, хил алдабгъ». Гьаддиз ккун апӀурача, хил алдабгъ учлан, фицики учура яв адашдин Заанурин лукӀар вуча! Гьаму гафарихъ хъпехъури, Юсуф гъишнийи.

¹⁸ Гъардшар чибра гъафнийи ва, дугъан улихь жилиинакьан икрам дапӀну, гъапнийи: – Гьамусдихъантина учу яв лукӀар вуча!

¹⁹ – ГучӀ мапӀанай, – гъапи Юсуфди, – узу Заанур вуйинхъа?

²⁰ Учву узуз писвал апӀуз ккайчва, хъа Заанури думу ужувлаз илтӀибкӀну: гьаддилантина фукьан инсанар гъюрхну!

²¹ ГучӀ мапӀанай. Узу ичвра ва ичв бицӀидаринра гъайгъушнаъ хьидиза. Му гафари гъардшар сикин гъапӀнийи ва дурар ккаарцнийи.

Юсуфдин аьжал

²² Гьамци Юсуф чан багахьлуйирра хъади Египетдиъ ерлешмиш гъахьнийи. Дугъу варжна йицӀуд йисан уьмур хъапӀнийи.

²³ Дугъаз Ефраимдин худларра кмиди гъяркънийи, дугъу Манасдин балин – Махирин – бицӀидарра чан ликрихъ хъитӀнийи.

²⁴ – Багарихьди узу йикӀиди, – гъапи дугъу гъардшариз. – Хъа гьациб йигъ гъибдики: Заанури учву кӀваин апӀиди ва учву мушвʼан Чав Ибрагьимдиз, Исакьдиз ва Якьубдиз гаф тувну улупнайи ругариина гъахидичву.

²⁵ Юсуфди, Израилин баярикан Заанури чиб кӀваин гъапӀган, чпихьди Египетдиан чан гъузу кӀурбар гъахуз, чаз – Юсуфдиз гаф тувуб ккун гъапӀнийи.

²⁶ Юсуф варжна йицӀуд йисаъ ади гъакӀнийи. Беденра мялгьямариан дапӀну, ишкӀиъ итну, Юсуф Египетдиъ гъитнийи.