Эвел 5 - Гирами Китаб

Адамдихъан Нюгьдихъна

¹ Магьа Адамдин тухмикан ихтилат. Заанури адми арайиз хруган, Чаз ухшар вуйир арайиз гъахну.

² Жилижви ва дишагьли арайиз гъахну, дурар ужувлакк ккаъну, ва, арайиз гъахиган, дурариин «инсаният» кӀуру ччвур иливну.

³ Адамдиз, дугъан варжна сумчӀур йис вуйиган, чаз ухшар вуйи бай шулу. Дугъаз Шит кӀуру ччвурра тувру.

⁴ Шит бабкан хьпан кьяляхъ Адам миржидварж йисансана яшамиш шулу. Дугъаз хъанара баяр-шубар айи.

⁵ Адам вари урчӀвудваржна сумчӀур йисан яшамиш гъахьну, хъа думу йикӀуру.

⁶ Шитдин варжна хьуд йис гъабхьиган, дугъаз Энош шулу.

⁷ Энош бабкан гъахьихъан, Шит миржидваржна ургуд йисансана яшамиш шулу. Дугъаз хъанара баяр-шубар айи.

⁸ Шитдин вари урчӀвудваржна йицӀикьюд йис шулу, хъа йикӀуру.

⁹ Эношдин урчӀвцӀур йис вуйиган дугъаз Кайнан шулу.

¹⁰ Кайнан бабкан хьпан кьяляхъ Энош миржидваржна йицӀихьуд йисансана яшамиш шулу. Дугъаз хъанара баяр-шубар айи.

¹¹ Эношдин вари урчӀвудваржна хьуд йис шулу, хъа думура йикӀуру.

¹² Кайнандин ургцӀур йис вуйиган дугъаз Магьалеел шулу.

¹³ Магьалеел бабкан хьпан кьяляхъ Кайнан миржидваржна ягъчӀвур йисансана яшамиш шулу. Дугъаз хъанара баяр-шубар айи.

¹⁴ Кайнандин вари урчӀвудваржна йицӀуд йис шулу, хъа думура йикӀуру.

¹⁵ Магьалеелин йирхьцӀурна хьуд йис вуйиган дугъаз Яред шулу.

¹⁶ Яред бабкан хьпан кьяляхъ Магьалеел миржидваржна сумчӀур йисансана яшамиш шулу. Дугъаз хъанара баяр-шубар айи.

¹⁷ Магьалеелин вари миржидваржна урчӀвцӀурна хьуд йис шулу, хъа думура йикӀуру.

¹⁸ Яреддин варжна йирхьцӀурна кьюд йис вуйиган дугъаз Янок шулу.

¹⁹ Янок бабкан хьпан кьяляхъ Яред миржидварж йисансана яшамиш шулу. Дугъаз хъанара баяр-шубар айи.

²⁰ Яреддин вари урчӀвудваржна йирхьцӀурна кьюд йис шулу, хъа думура йикӀуру.

²¹ Янокдин йирхьцӀурна хьуд йис вуйиган дугъаз Метушелах шулу.

²² Метушелах бабкан хьпан кьяляхъ Янок шубудварж йисансана яшамиш шулу. Янокдин уьмур Заанурихъди гъубшну. Дугъаз хъанара баяр-шубар айи.

²³ Янокдин вари шубудваржна йирхьцӀурна хьуд йис шулу.

²⁴ Янокдин уьмур Заанурихъди гъубшну. Хъа думу дургру, гьаз гъапиш думу Заанури Чахьна гъахуру.

²⁵ Метушелахдин варжна миржцӀурна ургуд йис вуйиган дугъаз Лемек шулу.

²⁶ Лемек бабкан хьпан кьяляхъ Метушелах ургудваржна миржцӀурна кьюд йисансана яшамиш шулу. Дугъаз хъанара баяр-шубар айи.

²⁷ Метушелахдин вари урчӀвудваржна йирхьцӀурна урчӀвуд йис шулу, хъа думура йикӀуру.

²⁸ Лемекдин варжна миржцӀурна кьюд йис вуйиган, дугъаз бай шулу.

²⁹ Дугъʼин Нюгь («ккарццру») кӀуру ччвур иливруган, Лемекди кӀуру: «Дугъу РАББИЙИ балайикк ккипу жилиин жафа зигурайи ухьу ккаарциди».

³⁰ Нюгь бабкан хьпан кьяляхъ Лемек хьудваржна урчӀвцӀурна хьуд йисансана яшамиш шулу. Дугъаз хъанара баяр-шубар айи.

³¹ Лемекдин вари ургудваржна ургцӀурна ургуд йис шулу, хъа думура йикӀуру.

³² Нюгьдин хьудварж йис вуйиган, дугъаз Сим, Хам ва Яфет кӀуру баяр шулу.