Эвел 48 - Гирами Китаб

Манас ва Ефраим

¹ СацӀиб вахтналан Юсуфди, чан адаш иццурайиб аьгъю дубхьну, дугъахьна чан баяр – Манасна Ефраим хъади гъюру.

² – Яв бай Юсуф дуфна, – гъапи Якьубдиз. Думу гужназ аьхниин деу

³ ва Юсуфдихьинди илтӀикӀу: – Ханаан жилиин али Луз шагьриъ, Кьудратлу Заанур ачмиш гъахьунзуз. Дугъу узу ужувлакк ккаъну,

⁴ гъапизуз: «Узу яв тухум бегьерлу ва артухъ апӀидиза. Узу увлантина гизаф халкьар апӀидиза, ва му жил яв наслариз гьаргандиз вуди тувдиза».

⁵ Ва магьа гьамус, – гъапи Якьубди Юсуфдиз, – узу гъяйиз Египетдиъ гъахьи кьюрид яв баяр йиз ликрихъ хъитӀраза. Сарун Ефраимна Манас, Рувимдихъдина Симеондихъди сабси, йиз баяр хьиди.

⁶ Ефраимдинна Манасдин кьялхъян увуз гъаши веледариз чпин аьхюну гъардшарин мал-мутмуйикан пай рубкьиди. Гьаз гъапиш, имбуну яв веледар узу йиз баярди гьисаб апӀурадарза. Дурар яв баяр, йиз худлар ву.

⁷ Узу Паддандиан кьяляхъ хъадакну гъюрайи вахтна Ханаандиъ, Эфратайихьан ярхла дарди, рякъюъ йиз Рахил гъакӀнийиз. Узу думу гьадушваъ, Эфратайиз (гьамус душваз Вифлеем кӀура) гъябгъюрайи рякъюхъ, кивунза.

⁸ Израили, Юсуфдин бицӀидариз дилигну, дугъхьан гьерху: – Мурар фужар ву?

⁹ – Мурар, Заанури узуз гьамшваъ багъиш гъапӀу йиз баяр вуйиз, – жаваб туву Юсуфди. – Узухьнаси хъади гъач дурар, – гъапи Израили. – Узу РАББИЙИКАН берекет хьуб ккун дапӀну, дурар йиз ирснан эйсйир шлуганси апӀидиза.

¹⁰ Кьабивалиан Израилин уларин акв зяиф гъабхьнийи – дугъаз рябкъюри имдайи. Юсуфди бицӀидар дугъан багахьнаси гъапӀу. Израили дурар, макар дапӀну, хабаъ тӀау.

¹¹ Хъа Юсуфдиз гъапи: – Йиз уву рякъюзра умуд кадайиз, хъа магьа Заанури яв бицӀидарра рякъюз гъитунзухьди.

¹² Юсуфди, бицӀидар Израилин кьамкьарилан алдагъну, чпин адашдиз жилиинакьан икрам гъапӀу.

¹³ Юсуфди чан баяр Израилихьна духнайиган, Ефраим чпин адашдин арччул гъвалахъ (Израилиз гагул гъвал шула), хъа Манас гагул гъвалахъ (Израилиз арччул гъвал шула) дийигънайи.

¹⁴ Израили чан арччул хил бицӀину бай Ефраимдин кӀулʼин, хъа гагул хил аьхюну бай Манасдин кӀулʼин, гьюдюхну иливу.

¹⁵ Хъа Израили Юсуфдиз гьамцдар ужувлан гафар гъапи: – Заанури – Дугъан улихь йиз абйир Ибрагьимна Исакь яшамиш гъахьну, Заанури – гьарган ва гьамусра узу уьрхюрайи йиз Марччлихъан ву Думу,

¹⁶ йиз Малайик вуйи Заанури – узу гьарсаб балайиккан Ккадаърур ву Думу – гъит баяр ужувлакк ккаъри! Гъит дурариина йиз ва йиз абйир Ибрагьимдинна Исакьдин ччвур гъарабхри! Дурарин насил жилариин гизаф хьибди.

¹⁷ Юсуфдиз чпин адашди Ефраимдиин арччул хил иливну гъябкъю, ва дугъу дици гъапӀуб Юсуфдиз кьабул гъабхьдар. Юсуфдиз, адашдин хил дибисну, Ефраимдилан Манасдиин иливуз ккун гъабхьи.

¹⁸ – Я адаш, дици ваъ, – гъапи Юсуфди. – Аьхюнур гьамунур ву, арччул хил гьамгъуин илив.

¹⁹ Хъа Израили дици гъапӀундайи ва гъапнийи: – Узуз аьгъязуз, йиз бай, узуз аьгъязуз. Гьадгъалантинара зурба халкь арайиз гъибди. Хъа бицӀину чве, аьхюнуртӀан аьхюр хьиди ва гьамгъалантина гизаф халкьар арайиз гъиди.

²⁰ Гьадму йигъан Израили Ефраимдиз ва Манасдиз ужʼвал ккун гъапӀну ва гъапну: – Израилари ичв ччвурар ужʼвал вуди дисиди ва пиди: «Гъит Заанури увкан Ефраимдизна Манасдиз ухшар вуйир кадаъри!» Гьамци дугъу Ефраим Манасдин улихь деркку.

²¹ Хъасин Израили Юсуфдиз кӀуру: – Багарихьди узу йикӀиди. Заанур учвухъди хьиди ва Дугъу ичв абйирин ругариина кьяляхъ гъахидичву.

²² Узу увуз артухъди, яв гъардшаригъ уву зина вуйивализ дилигну, аморей халкьдихьан турииндина чӀимриинди гъадагъу Шехем дагълар тувдизавуз.