Эвел 47 - Гирами Китаб

¹ Фяряуьндихьна гъафи Юсуфди гъапи: – Йиз адашна гъардшар Ханаан жиларилан чпин мал-къарайин лижарна вари мутму хьади дуфна. Гьамусяаьт дурар Гошендиъ а.

² Дугъу, чан гъардшаригъян хьур кас гъядягъну, фяряуьндиз улупуз хъади гъахуру.

³ Фяряуьнди дурарихьан гьерхру: – Учву фу ляхнар апӀури шулчва? Дурари: – Учу, яв лукӀар, ич абйирси, габнар вуча, – гъапи,

⁴ хъа дурари давам гъапӀу: – Учу му жилариин гъурабйир вуча, фицики Ханаандиъ пис гашʼвал абхъна. Яв лукӀариз чпин сюрйир уьрхру йишв адар, гьаддиз учуз, яв лукӀариз, Гошендиъ яшамиш хьуз ихтияр тува.

⁵ Фяряуьнди Юсуфдиз гъапи: – Яв адашна гъардшар увухьна дуфна.

⁶ Египетдин вари жил яв улихь хьа, дурариз, яшамиш хьуз, варитӀан ужубсиб йишв улуп. Гъит Гошендиъ яшамиш ишри. Эгер дураригъ йиз мал-къарайиз лигуз ужудар гъяш, дурар йиз мал-къарайиз лигрударди деркк.

⁷ Хъа Юсуфди чан адаш фяряуьндихьна гъахи. Якьубди фяряуьндиз ужʼвал ккун гъапӀу.

⁸ Фяряуьнди: – Швнуд йис вуяв? – гьерху.

⁹ Якьубди фяряуьндиз: – Варжна сумчӀур йис вуйиз му дюньяйиъ яшамиш шули, рякъяр ккадаури, – гъапи. – Му думукьан ярхи уьмур дар, вушра гизаф читин йисар гъахьнийиз. Хъа йиз абйиринси ярхи уьмрихъна дуфнадарзу.

¹⁰ Фяряуьндиз ужʼвал ккун дапӀну, Якьуб гъушу.

¹¹ Юсуфди, фяряуьнди гъапиганси, чан адашдизна гъардшариз Египетдиъ варитӀан ужудар вуйи Раамсес ругариин яшамиш хьуз жил туву.

¹² Юсуфди чан адаш, гъардшар ва вари тухум, гьардин хизандиъ айи бицӀидарин кьадарназ дилигну, ипӀрубдихъди тямин гъапӀу.

Египетдиъ – гаш

¹³ Хъасин пис гашʼвалиан варишваъриан рузи хътӀабццуру. Египетна Ханаан гашʼвали гъаллаш дапӀнайи.

¹⁴ Рузи масу туври, Юсуфди фяряуьндин хазнайиз Египетдиъна Ханаандиъ айи-адру вари арс уч гъапӀнийи.

¹⁵ Сарун я Египетдиъ, я Ханаандиъ арс имдайи. Египтари, Юсуфдихьна дуфну, кӀуру: – Учуз рузи ча! Гьамус яв уларикк учу йихну ккунди айвуз? Арс хътӀабццнийич.

¹⁶ – Эгер арс хътӀабццнуш, – жаваб туву Юсуфди, – мина ичв мал-къара абкъинай. Мал-къарана рузи гьюдюхидихьа.

¹⁷ Дурари чпин лижар хъаъну гъафи. Юсуфди рузи мал-къарайихъ – гьяйвнар, марччар, цӀигьар, хюнйир, дажйир – гьюдюхюз хъюгъю. Думу йисан дугъу инсанар чпин вари мал-къарайихъ гъадабгъу ипӀрубдихьди ацӀу.

¹⁸ Хъа йисан дурар Юсуфдихьна гьамци кӀури гъафи: – Увхьан жин апӀурадарча, ич агъа, ич арсра, мал-къарара ккудуркӀнийич, вари увухьна гъафну. Учуз, ич жанариланна хутӀларилан гъайри, сарун увуз тувуз ужуб имдарич.

¹⁹ Гьамус учура яв уларикк йикӀуча, жиларра ккадахьуз гъитча? Гъадагъ увуз руздихъ учуна ич хутӀлар. Учу, ич хутӀларра хъади, фяряуьндиз лукӀар хьидича. Анжагъ учуз, учу чӀивиди гъузбан ва хутӀлар ккададахьбан бадали, тум ча.

²⁰ Гьамци Юсуфди фяряуьндиз Египетдин вари жилар гъадагъуру. Египтари, саркьан гъидидитди, вариди чпин хутӀлар масу тувнийи – гьацикьан аьхю гаш абхънийи. Вари жил фяряуьндин хусусивализ илтӀибкӀнийи.

²¹ Хъа египтар, гьюкуматдин му гъирагъдихъан гъадабгъуб тмунуб гъирагъдихънакьан вари, Юсуфди фяряуьндин лукӀариз илтӀикӀнийи.

²² Анжагъ египет диндин гъуллугъчйирин хутӀлар Юсуфдихьан гъадагъуз гъахьундайи – диндин гъуллугъчйир фяряуьнди уьрхюрайи ва гьаддиинди ипӀурайи, гьаддиз дурари чпин хутӀлар масу тувундайи.

²³ Юсуфди египтариз гъапи: – Сарун учвуна ичв хутӀлар фяряуьндиндар ву, гьаддиз, магьа учвуз тум, хутӀлар урзай.

²⁴ Гьамусдихъантина бегьернан хьубпи пай фяряуьндиз тувдичва, хъа хьубдик юкьуб пай – тумразна учвуз, ичв хуландариз ва ичв бицӀидариз ипӀуз гъубзри.

²⁵ Египтари гъапи: – Уву учу аьжалихьан гъюрхюнва! Ич агъа, уву учухьна рягьимлу вуйва. Гьамусдихъантина учу фяряуьндин лукӀар вуча.

²⁶ Юсуфди дебкку гьюкум Египетдиъ гьамусра хъапӀри ими: ккадабцӀу бегьернан хьубпи пай фяряуьндиз тувра. Анжагъ диндин гъуллугъчйирин жилар фяряуьндихьинди гъушундайи.

²⁷ Израилин тухум Египетдин Гошен жилариин ерлешмиш гъаши. Душваъ дурарихъ жилар хъиршу. Дурарин тухум бегьерлу ва артухъ гъаши.

²⁸ Якьуб йицӀиургуд йисан Египетдиъ гъузнийи. Думу варжна ягъчӀвурна ургуд йисан яшамиш гъахьнийи.

²⁹ Чан йикӀру вахт хъубкьган, дугъу Юсуфдиз дих гъапӀу ва гъапи: – Узухьна рягьимлу йихь, йиз бакьбакьикк хил ккивнумиди ху апӀин, увуз кӀваълан гьадрархди йиз тӀалаб тамам апӀин: узу Египетдиъ микиван!

³⁰ Узу ихь абйирихьна гъушиган, узу Египетдиан гъайих ва гьадрар кивнайи йишваъ кив. Юсуфди гъапи: – Узу уву гъапибси апӀидиза.

³¹ – Ху апӀин, – гъапи Якьубди. Юсуфди ху гъапӀу ва аьхниъ айи Якьубдира кӀул хъапӀу.