Эвел 45 - Гирами Китаб

Юсуфди гъардшариз учв фуж вуш ктибтуб

¹ Гьадмуган Юсуфдихьан гъаравашарин улихь учв хилиъ дисуз шули имдайи. Дугъу чан гъуллугъчйириз чӀигъ гъапӀу: – Дург йихьай йиз багарихьан! Дугъу чан гъардшариз учв ачмиш апӀруган, мушвахь сарун фужкӀа хьимдайи.

² Думу гьаци зарбди ишуз хъюгъюки, египтаризра кмиди гъеебхьнийи ва дидкан хабар фяряуьндин дараматариз гъубшнийи.

³ Юсуфди чан гъардшариз гъапи: – Узу Юсуф вуза! Якьин йиз адаш чӀивиди имийин? Хъа гъардшарихьан жаваб тувуз шули адайи, дурар гъах духьнайи.

⁴ Хъа гьадмуган Юсуфди гъардшариз гъапи: – Йиз багахьнаси гъачай гьеле. Дурар багахь улучӀвган, дугъу гъапи: – Узу ичв гъардаш Юсуф вуза, учву Египетдиз масу туву!

⁵ Узу мина масу тувну кӀури, дерд мапӀанай, кӀваз гуж мутуванай. Мици, ичв улихьди, ичв уьмрар уьрхбан бадали, Заанури узу мина гьаур ву.

⁶ Кьюд йис ву уьлкейиъ гаш абхъну. Хьуд йисансана я жил хътабкуб, я ккадабццуб хьибдар.

⁷ Заанури ичв улихьди, ичв тухум дюнʼяйиин артмиш хьпан бадали ва, гьамциб аьжайиб къайдайиинди, ичв уьмрар уьрхбан бадали, узу мина гьаъна.

⁸ Гьаци вуйиган, учву дарчва узу мина гьаъдар, хъа – Заанур ву. Дугъу узкан фяряуьндиз адаш ктаъну, дугъан вари хулан зиин узкан агъа гъапӀну ва вари Египетдиъ гьюкум гъабхрурди дерккну.

⁹ Йиз адашдихьна кьяляхъ хътаркуз гьялак йихьай ва дугъаз йипай: «Магьа яв бай Юсуфди гьамци кӀура: „Заанури узкан вари Египетдиин гьюкум гъабхру кас ктаъну. Зат дийийигъди узухьна гъач.

¹⁰ Уву, яв веледарна худлар хъади, яв мал-къарана увуз айиб вари хьади, йиз багахь, Гошен кӀурушваъ яшамиш хьидива.

¹¹ Гошендиъ узхьан увуз ипӀруб хъапӀуз хьибдизухьан. Даршиш, увура, яв халра ва вари явдарра ризкь гьудрубкӀри гъуздичва, гьаз гъапиш гашʼвалин хьуд йиссан улихь хьми“».

¹² Учвузра, йиз чве Вениаминдизра ичв улариинди рябкъюрачвуз: узу, учвухъди улхурайир, якьин узу вуза.

¹³ Учвуз вари гъябкъюбдикан ва Египетдиъ узу фукьан адлу адми духьнаш, гьаддикан адашдиз кидибтай. Ухди мина адаш хъади гъачай!

¹⁴ Дугъу чан чве Вениамин хабаъ тӀау ва ишуз хъюгъю. Вениаминра, чан гъардшилан хабар алдагъну, ишури айи.

¹⁵ Хъа ишурайи Юсуфди имбуну гъардшаризра макар гъапӀу. Хъасин гъардшари дугъахъди сюгьбатар ккергънийи.

¹⁶ Юсуфдихьна гъардшар гъафну кӀуру хабар фяряуьндин дараматаризкьан гъубшнийи. Фяряуьнна дугъан гъуллугъчйир му ляхниин шад гъахьнийи.

¹⁷ Фяряуьнди Юсуфдиз гъапи: – Яв гъардшариз йип: «Гьязур дапӀну дажйир, Ханаандиз гъарахай

¹⁸ ва ичв адашна ичв хизанар хъади гъачай. Узу учвуз Египетдиъ варитӀан ужударстар жилар тувдизачвуз ва думу жиларин бегьерариинди яшамиш хьидичва».

¹⁹ Узу увуз дурариз хъана гьамци пуз буйругъ тувразавуз: «Гьамци апӀинай: ичв бицӀидарна дишагьлийир хуз, Египетдиан аьрабйир хъаъну гъарахай; ичв адаш аькъинай ва учвура гъачай.

²⁰ Ичв мутму гьяйиф мапӀанай, гьаз гъапиш Египетдиъ ужубсиб мутму ичвуб хьибди».

²¹ Израилин баяри чпиз гъаписи апӀузра апӀуру. Фяряуьнди гъапиганси, Юсуфди дурариз аьрабйир, рякъюз ипӀруб ва гьардиз цӀийи палтар тувру.

²² Хъа Вениаминдиз, шубудварж шекел арс ва хьуб жут цӀийи палтар тувнийи.

²³ Чпин адашдиз дугъу, йицӀуб даждиинди Египетдин жил фтиинди девлетлу вуш, гьадму вари гьапӀру. Хъа адаш Египетдиз гъюруган, рякъюз кӀури, йицӀуб хпи даждиинди ризкь, уьл ва жара сурсатар гьаъру.

²⁴ – Гьич сабдиканра фикир мапӀанай, гъарахай, – гъапи дугъу гъардшариз, рякъюъ тӀаъри.

²⁵ Дурар, Египет гъибтну, Ханаандиз чпин адашдихьна гъафнийи.

²⁶ – Юсуф чӀивиди ими, – гъапи дурари Якьубдиз. – Дугъу вари Египетдиин гьюкум гъабхура! Якьубдиз чан юкӀв дугъубжвганси гъабхьнийи – дугъхьан хъугъуз шули адайи.

²⁷ Хъа баяри Юсуфди гъапиб вари ктибтган ва чан улариз, учв гъахуз кӀури Юсуфди хътау аьрабйир гъяркъган, дугъаз чан юкӀв либхуз хъюбганси гъабши.

²⁸ Израили: – Гъабхьи, чӀяаьн ву! Йиз бай Юсуф чӀивиди ими! Узу йикӀайиз, дугъʼин улукьуз гъягъидиза! – гъапи.