Эвел 42 - Гирами Китаб

Юсуфдин гъардшар Египетдиз ризкь гъадабгъуз гъягъюб

¹ Якьубдиз Египетдиъ рузи айиб аьгъю гъабхьиган, дугъу чан баяриз кӀуру: – Сар-сариз гьаз лигурачва?

² Хъа давам апӀуру: – Узуз Египетдиъ рузи а кӀури деебхьназуз. Гъарахай, ухьу дарчӀиди гъузбан бадали, ухьуз рузи гъадабгъай.

³ Юсуфдин йицӀур гъардаш Египетдиз ризкь гъадабгъуз гъягъюру,

⁴ амма Вениамин, Юсуфдин багъри чве, Якьубди дурарихъди деетундайи, гьаз гъапиш дугъу гъапнийи: – Нагагь фукӀа дугъаз гъабшиш…

⁵ Гьамци имбударихъди Израилин (Якьубдин) баярра ризкь гъадабгъуз гъафнийи, гьаз гъапиш Ханаан жилариинра гаш алийи.

⁶ Гьюкуматдин аьхювал апӀурайир Юсуф вуйи. Гьадму вуйи гьюкуматдиъ вари халкьдиз рузи масу туврайирра. Юсуфдин гъардшар гъафиган, дурари дугъаз жилиинакьан икрам гъапӀу.

⁷ Юсуфдиз гъардшар, гъяркъюбси, аьгъю гъаши, аммаки, чаз дурар аьгъдру мисал дапӀну, думу дурарихъди ижмиди улхуз хъюгъю. – Наънан гъафидар вучва? – гьерхру дугъу. – Ханаан жиларилан, – жаваб туву дурари, – ипӀруб гъадабгъуз.

⁸ Юсуфдиз дурар аьгъю гъахьнийи, хъа гъардшариз думу аьгъю гъахьундайи.

⁹ Дугъаз дурарикан вуйи чан нивкӀар кӀваин гъаши ва гъапи: – Учву шпионар вучва! Учву ич гьюкуматдин зяиф йишвар агуз дуфнайидар вучва.

¹⁰ – Уву фу кӀурава, агъа, – жаваб туву дурари, – яв лукӀар ипӀруб гъадабгъуз дуфнайидар ву.

¹¹ Учу вари сар адашдин баяр вуча. Яв лукӀар марцци касар ву, шпионар дар.

¹² Дугъу дурариз: – Ваъ, учву ич гьюкуматдин зяиф йишвар агуз дуфнайидар вучва, – гъапи.

¹³ Амма дурари гьамциб жаваб туву: – Яв лукӀар, Ханаан жилариин яшамиш шулайи сар адашдин баяр – йицӀикьюр гъардаш вуча. БицӀинур адашдихъди хъми, хъа сарнур – сарун амдар.

¹⁴ Юсуфди дурариз гъапи: – Узу гъапнийзаки, учву шпионар вучва!

¹⁵ Магьа гьамус узу учву ахтармиш апӀидизачву: фяряуьндин уьмриинди ху апӀураза, мина ичв бицӀину гъардаш дарфиди учву мушвʼан гъягърудар дарчва.

¹⁶ Учвкан сар, чве хуз гъарахри, хъа имбудар дустагъдиъ деъди. Гьамци узу учву дюз кӀураш-кӀурадарш ахтармиш апӀидиза. Эгер дюз дарш, фяряуьндин уьмриинди ху апӀураза, учву якьин шпионар вучва! – гъапи.

¹⁷ Хъасин дурар Юсуфди шубуд йигъазди дустагъдиъ иту.

¹⁸ Шубудпи йигъан Юсуфди дурариз гъапи: – Учву чӀивиди гъузуз, узу кӀурубси апӀинай. Узу Заанурихьан гучӀ хьади лицурайир вуза.

¹⁹ Эгер учву дюз ксар вуш, гъит учвкан сар гьаму дустагъдиъ гъузри, хъа имбудар ичв гаш хизанариз рузи хьади гъарахри.

²⁰ Лигай гьа, ичв гафар гьякь хьузди ва учву чӀивиди гъузузди, ичв бицӀи гъардаш учву узухьна хъади дуфну ккунду. Дурари гьаци гъапӀу.

²¹ Чвйири чиб-чпиз гъапи: – Рябкъру гьялнаан, Заанури ихь гъардшин жазайикк ккаънахьу. Дугъу ухькан аман-миннат апӀурайи вахтна дугъахъ хъпехъундайхьа ва магьа гьамус бедбахтвал ихь кӀулʼина гъафийихь.

²² Рувимди гъапи: – Узу учвуз гъапундайин: бализ къаршу гуннагь мапӀанай кӀури, хъа учву хъпехъундайчва! Гьамус дугъан ифдихъанди жаваб тувуб алабхъна.

²³ Чпин гафарин Юсуф гъавриъ ахърайиваликан дурарин гьич фикриъкьан адайи, гьаз гъапиш думу дурарихъди таржумачийин кюмекниинди улхурайи.

²⁴ Юсуф дурарихьан гьудучӀвну ишуз хъюгъю, ва хъана, дуфну, дугъу улхуб давам гъапӀу. Дугъу, дураригъян Симеон гъядягъну, дурарин улихь думу гъийитӀу.

Юсуфдин гъардшар Ханаандиз адашдихьна гъюб

²⁵ Юсуфди дурарин шишлар ризкьнахьди ацӀуз, гьардихь хьайи арсар кьяляхъ, чпин билхаризди къяляхъ ивуз ва дурариз рякъюзра кади гьюрбйириъ ипӀруб ивуз буйругъ туву. Гьаци гъапӀнира вуйи.

²⁶ Гъардшари рузи дажйириин иливу ва рякъюъ учӀву.

²⁷ Чвйир йишв адапӀуз дийигъган, сари даждиз ккабхьруб адабцӀуз шишал хъадабшву ва билхиъ дугъаз чан арс гъябкъю: фу лигурва – чан арс ими.

²⁸ – Йиз арс кьяляхъ гъафи! – гъапи дугъу чвйириз. – Лигуруш, магьа думу йиз шишлиъ ади гъабхьну. Дурарин юкӀв дийибгъу. Дурар, гучӀ кабхъну, чиб-чпихьинди гъилигу ва гъапи: – Ухькан Заанури гьапӀра?

²⁹ Ханаан жилиина чпин адаш Якьубдихьна гъафиган, дурари гъабхьиб вари хъайи-хъайибси ктибтуру. Чвйири:

³⁰ – Гьадму жилариин гьюкум гъабхурайи адми учухъди писди улхуз хъюгънийи, – кӀуру, – ва учу шпионар вуди гьисаб гъапӀнийи.

³¹ Амма учу дугъаз: «Учу шпионар дарча, марцци адмийир вуча.

³² Учу йицӀикьюр гъардаш вуйча, сар адашдин баяр. Сарнур сарун имдар, хъа гьамусяаьт бицӀинур адашдихъди Ханаандиъ айич», – гъапнийча.

³³ Гьадму жилариин гьюкум гъабхурайи адмийи: «Магьа узуз учву дюз касар вуйиб фици аьгъю шулуш: сар гъардаш узухъди гьамушваъ гъитай, ичв гаш хизанариз ипӀруб гъабадгъну, ичв рякъ дибисну, гъарахай.

³⁴ Аммаки ичв бицину гъардаш узухьна хъади гъачай – гьаци узуз учву шпионар даруб, хъа дюз адмийир вуйиб аьгъю хьибдизуз. Гьадмуган узу учвухьна ичв гъардаш тувдизачвухьна ва архаинди му жилариин лицуз гъитдизачвухьди», – гъапунчуз.

³⁵ Шишлариан мутмйир адагъруган, гъардшариз гьардиз чан арс айи турба гъибихънийи. Чпин адашдикси, арс гъябкъю дурарикра гучӀ кабхънийи.

³⁶ Якьубди дурариз гъапи: – Учву узу веледарихьан гъапӀунчва. Сарун Юсуф имдар, Симеонра имдар, хъа гьамус Вениамин гъадагъуз ккундачвуз. Вари узуз къаршуди гъедебгну!

³⁷ Рувимди адашдиз гъапи: – Эгер узу увухьна Вениамин кьяляхъ дархиш, йиз кьюрид баярра йивну йикӀ. Думу йиз ихтиярназ тув, Вениамин узу кьяляхъ хидиза.

³⁸ Аммаки Якьубди гъапи: – Йиз бай увухъди дина гъягъидар! Дугъан гъахи чве дукӀна. Чан дадайин веледарикан гъузнайир сар гьадму вуйиз! Эгер рякъюъ дугъаз фукӀа гъабшиш, гьадму дердерихьди йиз лизи кӀул накьвдиз гъябгъюз гъитдичва.