Эвел 38 - Гирами Китаб

Ягьудана Тамар

¹ Думу вахтари Ягьуда, чан чвйир гъитну, Адуллам йишвʼан вуйи Хира кӀурурин багахь яшамиш хьуз хъюгънийи.

² Душваъ думу Шуай кӀуру сар хананей жвуван шурахъди таниш гъахьну. Дугъу думу риш чаз хпирди гъадагъуру ва гьадгъвахъди шулу.

³ Хпирик бицӀир киршру, ва дурариз бай шулу. Дугъʼин чпин адашди Эр кӀуру ччвур иливуру.

⁴ Хпир сарсануриз гъагъдиъ шулу ва гъахьи балʼин Онан кӀуру ччвур иливуру.

⁵ Дугъаз сарсана бай шулу. Дугъʼин Шелагь кӀуру ччвур иливуру. Ягьудайиз му бай Хезиб кӀурушваъ гъахьнийи.

⁶ Ягьудайи чан сарпи бай Эриз Тамар кӀуру риш швушвди хуру.

⁷ Аммаки Эр РАББИЙИН улихь гуннагькар кас вуйи, ва РАББИЙИ думу аьжализ тувнийи.

⁸ Гьадмуган Ягьудайи Онандиз кӀуру: – Уву, яв гардандиъ айи буржи тамам апӀин, яв чвуччвун хпир увуз дитдихьа: яв чвуччвун насил артмиш апӀин.

⁹ Онандиз дици дубхьну ккунди адайи, гьаз гъапиш дугъаз шлу бицӀидар чан наслиъ ваъ, хъа чвуччвун наслиъ шлуб агъяйи. Гьаддиз дугъу, чвуччвун хпирихъди гьар ражари сатӀи шлубкьан бицӀир даршлуси апӀуйи.

¹⁰ Дугъу бицӀир даршлуси апӀуб Заанурин улихь гуннагь ляхин вуйи, гьаддиз Дугъу Онанра аьжалихьна тувнийи.

¹¹ Гьадмуган Ягьудайи чан швушв Тамариз гъапи: – Йиз бай Шелагь аьхю шайиз, ачӀни хпирди яв адашдин хулаъ гъуз. Дугъу мици, чвйирин кьяляхъди Шелагьра диликӀри дупну, фикир дапӀну гъапиб вуйи. Тамар чпин адашдин хулаз яшамиш хьуз гъягъюру.

¹² Гизаф вахт улдубчӀвбалан кьяляхъ Ягьудайин хпир, Шуайин ришра йикӀуру. Саламдин йигъар улдучӀвбалан кьяляхъ, Ягьуда чан марччар ултӀукъурайи адмийирихьна Тимна кӀурушваз гъягъюру. Дугъахъди чан дуст адуллам жви Хирара гъягъюру.

¹³ Тамариз гьамциб хабар гъюру: – Яв сижар-аба чан марччар ултӀукъуз Тимнайиз гъягъюра.

¹⁴ Думу, чаин али ачӀни хпирвалин палтар илдитну, учв аьгъю даршуз машра кмиди ккебкну, лицру дишагьлийин жара палтар алахьну, Тимнайиз гъягъру рякъюхъ хъайи Энаимдиъ учӀврушван урнарихъ деъру. Тамари му ляхин, Шелагь аьхю духьну дяркъну, учв дугъаз хпирди гъахури адруган, гъапӀуб вуйи.

¹⁵ Ягьудайиз дишагьли рякъюру ва думу лицру дишагьлиси гьисаб апӀуру, гьаз гъапиш дугъан маш ккебкнайи.

¹⁶ Ягьудайи, чан рякъ гъибтну, думу дишагьлийихьна дуфну дугъаз гьамци кӀуру: – Гъач, увухъди хьуз ккундузуз. Гьелбетда дугъаз думу чан швушв вуйиб аьгъдайи. Хъа дишагьлийи гьерхру: – Узухъди хьузди уву узуз фу тувурва?

¹⁷ Дугъу: – Узу увуз йиз сюрйиригъян саб мудур тувдизавуз, – кӀуру. Дишагьлийи гьерхру: – Мудур узухьна рубкьайиз уву узуз фу аманат апӀидива?

¹⁸ Дугъу кӀуру: – Узу увуз фу аманат апӀузахъа? Дишагьлийи: – Яв ччвур кайи яв гардандиъ айи мугьурна, яв хилиъ айи яв маргъ, – гъапи. Ягьудайи мурар вари дугъахьна тувру ва дугъахъди сатӀи шулу. Хъа дишагьлийик дугъкан бицӀир киршру.

¹⁹ Мушвʼан гъушу Тамари чаин али палтар илдитну, хъана ачӀни дишагьливалин палтариъ учӀвру.

²⁰ Чан нубатнаъ, Ягьудайи думу дишагьлийиз, чан аманат гъапӀдар кьяляхъ дисбан бадали, чан Адуллам йишвʼан вуйи чан дустрахьди мудур хътапӀуру, амма дустраз думу дишагьли гъидихъундайи.

²¹ Дустру душван агьалйирихьан гьерхру: – Наши Энаимдин урнарихъ деънайи гьадму лицру дишагьли? Дурари жаваб туву: – Мушваъ саркьан лицру дишагьли гъяркъюндарчуз.

²² Думу Ягьудайихьна кьяляхъ гъюру: – Узуз думу гъидихъундарзуз, ва гьадушван агьалйирира: «Мушваъ учуз саркьан лицру дишагьли гъяркъюндарчуз», – гъапнийи.

²³ Ягьудайи гъапи: – Гъит чахь гъубзуб чаз ибшри, даршиш ухькан ул кдипиди. Узу дугъаз мудур хътапӀунза, гьамус думу гъидихъундар кӀури йиз фу тахсир ахъа?

²⁴ Шубуб вазлилан Ягьудайиз: – Яв швушв Тамар, гьяясузвалин рякьюъ ахъну, гъагъдиъ духьна, – кӀуру. Ягьудайи: – Дидисну думу цӀигъ ургай! – пну буйругъ тувру дугъу.

²⁵ Дидисну хулʼан адагъурайиган, дишагьлийи сижар-абайиз гьамцдар гафар хътауру: – Узук кайи бицӀир гьаму мутмйирин эйсийикан вуйиз. Ва давам апӀуру: – Лиг, аьгъю хьибдивуз, шлин вуш гьаму мугьурна маргъ?

²⁶ Ягьудайиз чан мутмйир аьгъю шулу ва: – УзутӀан му гьякь ву, гьаз гъапиш узу думу йиз бай Шелагьдиз швушвди дитундайза, – кӀуру. Ягьуда думу дишагьлийихъди гьадму сабантӀан гъахьундайи.

²⁷ БицӀидар шлу вахт хъубкьиган, Тамарик кьюр бай – кӀюдюхрар кайиб аьгъю шулу.

²⁸ Дугъу бицӀидар апӀурайиган, дурарикан сану бицӀири чан хил итӀибгъуру, гьадмуган ганабабу дугъан хилихъ элвен мурсул хъибтӀру ва кӀуру: – Му сарпирди гъашир ву.

²⁹ Аммаки бицӀири чан хил айитӀинди кьяляхъ зигуру, хъа тмунур удучӀвуру. Ва гьадмуган ганабабу кӀуру: – Уву фици утӀурччвунва? Гьаддиз дугъʼин Перез («утӀурччвур») кӀуру ччвур иливуру.

³⁰ Хъасин хилихъ элвен мурсул хъайир удучӀвуру ва дугъазра Зерагь («уьру Ахсрар») ччвур тувру.