Эвел 33 - Гирами Китаб

Якьубна Исав къаршуламиш хьуб

¹ Гъилигу Якьубдиз чан гъаншаризди юкьудварж кас хъади гъюрайи Исав гъяркъю. Якьубди чан веледар, гьарсар чан дадайин – Лияйин Рахилин ва кьюрид лукӀ-хпарин гъвалахъ дерккну.

² Дугъу лукӀ-хпарна дурарин бицӀидар улихь дерккнийи, дурарин кьяляхъ – Лияна дугъан бицӀидар, хъа дугъан кьяляхъ – Рахилна Юсуф.

³ ВаритӀан улихьди гъярайи Якьубди, чан гъардшиз багахь хьайиз, дугъаз жилиинакьан ургуб ражари икрам гъапӀу.

⁴ Хъа Исав кӀуруш, жаргъну дугъан гардандиъ макар апӀури архьру ва кьюридра ишуру.

⁵ Хпарна бицӀидар гъяркъю Исавди: – Хъа мурар фужар вуяв? – пну гьерху. – Мурар узуз, яв лукӀраз, Заанури багъиш гъапӀу веледар вуйиз, – гъапи Якьубди.

⁶ ЛукӀ-хпар, чпин бицӀидарра хъади дуфну, Исавдиз икрам гъапӀу.

⁷ Хъасин Лияйи, чан бицӀидар хъади дуфну, икрам гъапӀу, хъасин – Рахилина Юсуфди икрам гъапӀу.

⁸ – ГьапӀру лижар вуяв узуз рякъюъ алахьдар? – гьерху Исавди. – Дурар, уву узу рягьим улупузди гьаънайи пешкешар, йиз агъа, – гъапи Якьубди.

⁹ – Узуз ккунибкьан мутму азуз, йиз гъардаш, – кӀуру Исавди, – гъит, яв мутму увуз гъубзри.

¹⁰ – Ваъ, дици шулдар, узухьна рягьимлу йихь, уву йиз багъиш кьабул апӀин! Уву рякъюб узуз – машна-машди Заанур гъяркъюбси вузуз – гьаци ужуди уву узу кьабул гъапӀунва!

¹¹ Уву йиз багъиш, йиз увухьна вуйи ужʼвалин лишан вуди бис. Заанури узуз бегьемди тувунзуз, узуз вари азуз. Якьубди чан багъиш бисуб ижмишнаан ккун апӀурайи, ва Исав думу кьабул апӀуз рази гъаши.

¹² – Гъач, сарун рякъюъ учӀвурхьа, – гъапи Исавди Якьубдиз. – Узу увухъди гъягъидиза.

¹³ Аммаки Якьубди: – Увуз аьгъявуз, йиз агъа, бицӀидар фици зяифдар шулуш. Хъа марччарна малар ккитрайидар вуйиз. Дурариин маргъ иливиш, вари сад йигъандин арайиъ йихиди.

¹⁴ Гьамци гъапӀиш, йиз агъа, ужу хьибди: уву улихьди гъарах, хъа узу, яв лукӀ, мал-марчч гъябгъруси, бицӀидар гъяруси, Сеириз хъуркьайизкьан увухьна, йиз агъайихьна явашди гъидиза.

¹⁵ – Гъач, узу увухъди йиз адмийирикан гъитдиза, – теклиф диву Исавди. Хъа Якьубди: – Уву фу кӀурава, ваъ! Уву, йиз агъа, гьацира узухьна рягьимлу вува!

¹⁶ Гьадму йигъан Исав, кьяляхъ, Сеириз рякъюъ учӀву.

¹⁷ Хъа Якьубди Суккутдизди рякъ гъибису. Дугъу душваъ чаз хал, мал-къарайиз далда диву. Гьаддиз му йишваз Суккут («далдйир») кӀури гъаши.

¹⁸ Паддан-Арамдиан кьяляхъ гъафи Якьуб, Ханаан жилиин али Шехем шагьриз сагъ-саламатди гъафи, ва шагьрин гъирагъдихъ яшамиш хьуз хъюгъру.

¹⁹ Бина диву жил Якьубди Хамурин баярихьан, Шехемдин адашдихьан, варж кесита арсрахъ гъадабгъуб вуйи.

²⁰ Душваъ дугъу гъурбан апӀрушв тикмиш гъапӀу ва душваз Эл-Элохе-Израил («Заанур – Израилин Заанур ву») кӀуру ччвур туву.