Эвел 26 - Гирами Китаб

Исакь ва Авимелех

¹ Ибрагьимдин вахтариъси, гьамусра уьлкейиъ хъана гаш абхъру. Исакь филистимарин паччагь Авимелехдихьна Герариз рякъюъ учӀвру.

² Гьадмуган Исакьдиз РАББИ ачмиш шулу ва кӀуру: – Египетдиз мягъян. Увуз Узу улупу уьлкейиъ яшамиш йихь.

³ Саб вахтназ гьаму ругариин биналамиш йихь. Узу увухъди хьидиза ва уву ужувлакк ккаъдиза. Гьаз гъапиш, яв адаш Ибрагьимдиз туву гаф Узу тамам апӀидиза. Гьаму вари жилар увуз ва яв наслариз тувдиза.

⁴ Завариъ хядаркьан гизаф наслар тувдизавуз. Гьадрариз гьаму вари жиларра тувдиза. Яв насларилантина дюнʼяйин вари халкьариз ужʼвал хьибди.

⁵ Узу мици Ибрагьим Узухъ хъпехъури Йиз табшуругъар, Йиз къанунар, Йиз къайдйир – вари Узу гъапиб тамам апӀури гъахьиган апӀурайиб вуйиз.

⁶ Гьамци Исакь Герариз яшамиш хьуз гъягъюру.

⁷ Душван адмийири дугъхьан чан хпирикан гьерхиган, Исакьди думу йиз чи вуйиз гъапнийи, гьаз гъапиш дугъаз: хпир вуйиз пуз гучӀ гъабхьнийи, фицики успагьи Ребекайин кӀуллан учв йивну йикӀур кӀури фикир гъапӀнийи.

⁸ Саб хайлин вахтарилан гьаци улдариан гъилигу филистимарин паччагь Авимелехдиз Исакьди Ребекайихъди ккунивалар апӀури рябкъюру.

⁹ Хъа паччагьди Исакьдиз чахьна дих дапӀну дугъхьан гьамци гьерхру: – Думу дишагьли яв хпир вуявки?! Думу чи вуйиз кӀури гьаз гъапунва? – ГучӀ гъабхьунзуз, – кӀуру Исакьди, – гьадгъван кӀуллан узу йивну йикӀур кӀури.

¹⁰ – Уву учкан гьапӀрава? – гъапи Авимелехди. – Хъа сар кас яв хпирихь дахънийиш, учу гунгьиъ итуйваки!

¹¹ Хъа Авимелехди чан халкьдиз гьамциб буйругъ тувнийи: «Исакьдик ва дугъан хпирик кучуриз аьжал гьадабтӀну ккунду».

¹² Гьадму гьюкуматдиз удучӀвну гъафи Исакьди рузи убзуз хъюгънийи. РАББИЙИ думу ужувлакк ккаънийи ва думу йисан Исакьди варж ражари артухъ ризкь ккадабцӀнийи.

¹³ Исакь девлетутӀан девлету шулайи. Дугъан девлет гьадмукьан гизаф шулуки, думу кьадарсуз заан шулу.

¹⁴ Дугъахъ мал-марччлин лижарна бегьем гъаравшар хъайи. Филистимар дугъʼин бахил шулу.

¹⁵ Ва, чан адаш Ибрагьимдин вахтна дугъан лукӀари гъийиркку вари гъуйир филистимари ругар ахьну ацӀру.

¹⁶ Авимелехдира Исакьдиз кӀуру: – Уву удучӀвну гъарах. УчутӀан уву гизаф кьувватлу гъахьунва.

¹⁷ Исакь дилин Герар дерейиз удучӀвну гъягъюру.

¹⁸ Дугъу, чпин адаш Ибрагьимдин вахтари гъийиркку ва Ибрагьим йикӀбалан кьяляхъ филистимари ругар ахьну ацӀу гъуйир таза алауз хъюгъру. Дугъу гъуйириин сифте Ибрагьимди иливу ччвурар иливнийи.

¹⁹ Исакьдин лукӀари дерейиъ гъуйи йибккурайиган, дурариз шид утӀубчӀвнийи.

²⁰ Герар марччлихънари Исакьдин марччлихънарихъди: «Му ичуб шид вуйич!» – кӀури гьюжатар апӀуз хъюгъру. Му гъуйин кӀуллан гьюжатар гъахьивализ лигну, дидиз Эсек («гьюжат») гъапнийи.

²¹ Исакьдин гъаравшари жара гъуйи гъийибккнийи ва дидин кӀулланра гъалмагъалар гъахьнийи, хъа дидиз Ситна («гъалмагъал») гъапнийи.

²² Гьадмуганра Исакьди чан бина хъана тинаси алдабгънийи ва сабсана гъуйи гъийибккнийи. Сарун мидин кӀуллан гьюжатар гъитӀирккундайи. Исакьди мидиз: «Аьхирки, РАББИЙИ ухьуз гьаму ругариин артмиш хьуз ачухъ чӀурар багъиш гъапӀну» дупну Рехувут («ачухъ чӀур») кӀуру ччвур тувнийи.

²³ Хъасин Исакь Беэр-Шевайиз гъафнийи.

²⁴ Сабпи йишван дугъаз душваъ РАББИ ачмиш гъахьнийи. – Узу, яв адаш Ибрагьимдин Заанур, вуза, – гъапи Дугъу. – ГучӀ мапӀан, Узу увухъди хъаза. Йиз лукӀ Ибрагьим бадали, Узу уву ужувлакк ккаъдиза ва яв насил гизаф кьадар апӀидиза.

²⁵ Исакьди гьадму йишвʼин гъурбан апӀрушв тикмиш апӀуру, ва РАББИЙИЗ икрам дапӀну чан бина ккатӀабццуру, хъасин дугъу чан лукӀарихьди гъуйи йибккуз гъитру.

²⁶ Гьадмуган дугъахьна Герариан чан насигьятчи Ахузатна чан къушмарин аьхюр вуйи Пихул хъади Авимелех гъюру.

²⁷ – Узухьна гьаз гъафунчва? – гьерхру Исакьди. – Узу даккун дапӀну ичв уьлкейиан учву узу адаънийчва аьхир!

²⁸ – Увухъди РАББИ хъайиб учуз ачухъди гъябкъюнчуз, – гъапи дурари, – гьаддиз увухъди, ху дапӀну, йикьрар йитӀуз ккундучуз.

²⁹ Учу увуз чӀуруб дарапӀганси, увура учуз чӀуруб дарапӀуз пну ху апӀин. Увуз анжагъ гъянибтӀан гъапӀундарча ва мясляаьтниинди деетунчаву. Гьамус РАББИЙИ уву ужувлакк ккаънайир вува!

³⁰ Исакьди дурариз, ипӀруб-убхърубра гьивну, машквар гъапӀну.

³¹ Гьиринган ухди гъудужвну, дурари чиб-чпин улихь ху апӀуру. Исакьди дурар деетуру, ва дурар мясляаьтниинди гъягъюру.

³² Гьадму йигъан гъуйи йибккурайи Исакьдин лукӀар: «Шид гъибихъунчуз», кӀуру хабар хьади дугъахьна гъафнийи.

³³ Дугъу гъуйиз Шева («ху апӀуб») кӀуру ччвур тувнийи. Гьаддиз му шагьриз гьамусра Беэр-Шева («ху гъапӀу йишван гъуйи») кӀури ими.

³⁴ Исакьдин аьхюну бай Исавди, чан ягъчӀвур йис гъабхьиган, чаз хпирди, хеттжви Беэрин риш Эхудит, ва сарсана хпир, хеттжви Элундин риш Басемат, гъадагъуру.

³⁵ Дурариккан Исакьдизна Ребекайиз мумкин кӀуруб адайи.